ສຄອຊ ຖະແຫຼງຂ່າວກຽມຈັດງານຊິງລາງວັນທຸລະກິດອາຊຽນດີເດັ່ນ ແຫ່ງ ສປປ ລາວ 2020

525

ເພື່ອເປັນການສ້າງແຮງບັນດານໃຈໃຫ້ແກ່ຫົວໜ່ວຍທຸລະກິດລາວ ທີ່ທຸ້ມເທເຮື່ອແຮງສະຕິປັນຍາ ແລະ ອື່ນໆຕະຫຼອດປີ 2020 ແລະ ຫຼາຍປີ ຜ່ານມາ ສະພາການຄ້າ ແລະ ອຸດສາຫະກໍາແຫ່ງຊາດລາວ (ສຄອຊ) ຮ່ວມໂຄງການ RELATED ຂອງ GIZ ປະຈຳລາວ ກຽມຈະຈັດງານຊິງລາງທຸລະກິດອາຊຽນດີເດັ່ນ ແຫ່ງ ສປປ ລາວ 2020 ຂຶ້ນໃນເດືອນກັນຍານີ້

ພິທີຖະແຫຼງຂ່າວກຽມຈັດງານຊິງລາງວັນທຸລະກິດອາຊຽນດີເດັ່ນ ແຫ່ງ ສປປ ລາວ 2020 ຫຼື ASEAN Business Award Laos 2020 ຈັດຂຶ້ນໃນວັນທີ 16 ມິຖຸນາ 2020 ຜ່ານມາທີ່ ສຄອຊ, ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ທະນົງສິນ ກັນລະຍາ, ຮອງປະທານ ສຄອຊ, ທ່ານ ນາງ ຢັນ ເຊິນ ທີ່ປຶກສາແຜນງານເຊື່ອມໂຍງເສດຖະກິດອາຊຽນຂອງ ສປປ ລາວ ເພື່ອການພັດທະນາດ້ານທຸລະກິດ ແລະ ການຄ້າ, ຂອງ GIZ ປະຈຳລາວ, ທ່ານ ສະຫວັນຄອນ ຣາຊມຸນຕີ ຮອງລັດຖະມົນຕີກະຊວງຖະແຫຼງຂ່າວ, ວັດທະນາທຳ ແລະ ທ່ອງທ່ຽວ ແລະ ສື່ມ່ວນຊົນເຂົ້າຮ່ວມ.

ທ່ານ ທະນົງສິນ ກັນລະຍາ ກ່າວວ່າ: ງານຊິງລາງວັນທຸລະກິດອາຊຽນດີເດັ່ນ ແຫ່ງ ສປປ ລາວ 2020 ແມ່ນເປັນງານມອບລາງວັນທີ່ເປີດກ້ວາງຕໍ່ສະມາຊິກ ສຄອຊ ແລະ ທຸກໆຫົວໜ່ວຍທຸລະກິດ ໃນຂອບເຂດທົ່ວປະເທດ ທີ່ດໍາເນີນທຸລະກິດຖືກຕ້ອງຕາມກົດໝາຍ, ບໍ່ວ່ານ້ອຍ ຫຼື ໃຫຍ່ ກໍ່ສາມາດສົ່ງເຂົ້າສະໝັກແຂ່ງຂັນເອົາລາງວັນໄດ້ ເຊິ່ງທຸລະກິດທີ່ຊະນະເລີດໄດ້ຮັບລາງວັນທຸລະກິດອາຊຽນດີເດັ່ນ ແຫ່ງ ສປປ ລາວ 2020 ຈະຖືກສົ່ງສະໝັກເຂົ້າແຂ່ງຂັນຕໍ່ໃນລະດັບອາຊຽນ ເຊິ່ງຈະໄດ້ພົບກັບບັນດາຫົວຫນ່ວຍທຸລະກິດທີ່ມີຊື່ສຽງໃນລະດັບພາກພື້ນ ແລະ ການປະກາດຜົນຜູ້ທີ່ໄດ້ຮັບລາງວັນລະດັບພາກພື້ນແມ່ນຈະໄດ້ຈັດຂຶ້ນໃນໄລຍະການຈັດກອງກອງປະຊຸມສຸດຍອດທຸລະກິດ ແລະ ການລົງທຶນອາຊຽນ (ASEAN Business & Investment) ແລະ ກອງປະຊຸມສຸດຍອດອາຊຽນ (ASEAN Summit) ຄັ້ງທີ 36 ປີ 2020 ນີ້ ທີ່ປະເທດຫວຽດນາມ.

ປະເພດລາງວັນສຳລັບປີ 2020 ປະກອບມີ 3 ປະເພດເຊັ່ນ: ຂະແໜງບູລິມະສິດດີເດັ່ນ ປະກອບມີ 12 ຂະແໜງການເຊັ່ນ: ຂະແໜງກະສິກໍາ, ພະລັງງານ, ປະມົງ, ປຸງແຕ່ງອາຫານ ແລະ ເຄື່ອງດື່ມ, ຫັດຖະກຳ, ຂະແໜງ ICT, ພື້ນຖານໂຄງລ່າງ, ຕັດຍິບ, ທ່ອງທ່ຽວ, ຂົນສົ່ງ ແລະ ໂລຈີດຕິກ, ຂາຍຍົກ/ຂາຍຍ່ອຍ ແລະ ຂະແໜງຜະລິດຕະພັນໄມ້. ພ້ອມນັ້ນ, ຍັງມີລາງວັນສຳລັບຂະແໜງທຸລະກິດ SME ດີເດັ່ນ (SME Excellence Award) ປະກອບມີ 4 ຂະແໜງການເຊັ່ນ: ລາງວັນການຂະຫຍາຍໂຕທຸລະກິດດີເດັ່ນ, ການຈ້າງງານດີເດັ່ນ, ນະວັດຕະກຳດີເດັ່ນ ແລະ ການປະກອບສ່ວນຕໍ່ສັງຄົມ ແລະ ສຸດທ້າຍແມ່ນລາງວັນພິເສດ ປະກອບມີ 7 ເຊັ່ນ: ລາງວັນເພື່ອນມິດ ສປປ ລາວ ດີເດ່ັນ, ລາງວັນທຸລະກິດຄອບຄົວດີເດັ່ນ, ລາງວັນທຸລະກິດເພື່ອສັງຄົມແບບຍືນຍົງ, ລາງວັນທຸລະກິດສີຂຽວ, ລາງວັນທຸລະກິດລິເລີ່ມ, ລາງວັນນັກທຸລະກິດໜຸ່ມດີເດັ່ນ ແລະ ລາງວັນຜູ້ປະກອບການແມ່ຍິງດີເດັ່ນ.

ທັງນີ້, ສຳລັບພິທີມອບລາງວັນທຸລະກິດອາຊຽນດີເດັ່ນ ແຫ່ງ ສປປ ລາວ 2020 ຈະໄດ້ຈັດຂຶ້ນໃນວັນທີ 18 ກັນຍາ 2020 ທີ່ນະຄອນຫຼວງວຽງຈັນ. ທ່ານພ້ອມທີ່ຈະເຂົ້າຮ່ວມແຂ່ງຂັນແລ້ວ ຫຼື ຍັງ ໂດຍສາມາດຢືນແບບຟອມສະໝັກຜ່ານທາງອີເມວຈົນເຖິງວັນທີ 14 ສິງຫາ 2020 ແລະ ສໍາລັບຂໍ້ມູນເພີ່ມເຕີມກ່ຽວກັບຂັ້ນຕອນໃນການສະໝັກ ຕິດຕໍ່ທີມງານຊີງລາງວັນທຸລະກິດອາຊຽນດີເດັ່ນ ແຫ່ງ ສປປ ລາວ ໄດ້ທີ່ ສຄອຊ ຫຼືຜ່ານທາງອີເມວ [email protected] ແລະ ເວບໄຊ www.Incci.la/aba2020