ສປປ ລາວ ເປັນ​ປະ​ທານ​ຮ່ວມ​ເປີດປີ​ສົ່ງ​ເສີມ​ເສດ​ຖະ​ກິດ​ດິ​ຈິ​ຕອລ ອາ​ຊຽນ ແລະ ສ​ປ ຈີນ

559

ທ່ານ ປອ. ທັນສະໄໝ ກົມມະສິດ ລັດຖະມົນຕີກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ເປັນ​ປະ​ທານ​ຮ່ວມ​ກັບ ທ່ານ ມຽວ ເຫວີຍ (MIAO WEI) ລັດຖະມົນຕີກະຊວງອຸດສາ ຫະກໍາ ແລະ ໄອຊີທີ ຂອງ ສປ ຈີນ ໃນ​ພິ​ທີ​ເປີດປີ​ສົ່ງ​ເສີມ​ເສດ​ຖະ​ກິດ​ດິ​ຈິ​ຕອລລະ​ຫວ່າງ​ອາ​ຊຽນ ແລະ ສ​ປ ຈີນ ໂດຍ​ຜ່ານກອງ​ປະ​ຊຸມ​ທາງ​ໄກ (ASEAN-China Year of Digital Economy Cooperation 2020). ໂດຍເຂົ້າຮ່ວມໃນຄັ້ງນີ້, ມີບັນດາລັດຖະມົນຕີດິຈິຕອລອາຊຽນ, ເລຂາທິ ການໃຫ່ຍອາຊຽນ ແລະ ບັນດາເຈົ້າໜ້າທີອາວຸໂສດິຈິຕອລຂອງອາຊຽນ ແລະ ສປ ຈີນ.ພິທີເປີດປີ​ສົ່ງ​ເສີມ​ເສດ​ຖະ​ກິດໃນຄັ້ງນີ້, ແມ່ນ​ພາຍ​ໃຕ້​ຄຳ​ຂວັນ​ “ການຮ່ວມ​ມື​ກັນເພື່ອຕໍ່​ສູ້​ກັບ​ການ​ແຜ່​ລະ​ບາດ​ພະ​ຍາດ COVID-19 ​ໂດຍການນຳ​ໃຊ້ໄອ​ຊີ​ທີ ແລະ ການພັດທະນາ​ດິ​ຈິ​ຕອລ” ​ເຊິ່ງເປັນ​ການ​ເນັ້ນ​ຢ້ຳ​ຄວາມ​ສຳ​ຄັນຂອງ​ການ​ຮ່ວມ​ມື​ລະ​ຫວ່າງ​ບັນ​ດາ​ປະ​ເທດ​ສະ​ມາ​ຊິກ​ອາ​ຊຽນ ແລະ ສ​ປ ຈີນ ​ຖືເປັນ​ການ​ກຳ​ນົດຂໍ້ລິເລີ່ມ​ຂອງການຮ່ວມມື, ສະໜັບສະໜູນການພັດທະນາດິຈິຕອລຂອງອາຊຽນ ແລະ ສປ ຈີນ ​ເປັນ​ຕົ້ນ​ແມ່ນການສົ່ງເສີມການນຳໃຊ້ເຕັກໂນໂລຊີດິຈິຕອລໃນການປ້ອງກັນ ແລະ ຄວບຄຸມການລະບາດຂອງພະ ຍາດໂຄວິດ-19; ການສ້າງຄວາມເຂັ້ມແຂງໃນການກໍ່ສ້າງພື້ນຖານໂຄງລ່າງຂໍ້ມູນຂ່າວສານ; ສະໜັບສະໜູນຜູ້ປະກອບການ, ນະວັດຕະກຳ ແລະ ການຫັນເປັນອຸດສາຫະກຳດິຈິຕອລ.

ໂອກາດນີ້, ທ່ານ ປອ. ທັນສະໄໝ ກົມມະສິດ ໄດ້​ກ່າວ​ເປີດ​ພິ​ທີ ແລະ ສະແດງຄວາມຊົມເຊີຍຕໍ່ ສປ. ຈີນ ທີ່ໄດ້ເອົາໃຈໃສ່ໃນການກະກຽມງານດັ່ງກ່າວ ສະແດງໃຫ້ເຫັນເຖິງຄວາມເອົາໃຈໃສ່ຂອງ ສປ.ຈີນ ຕໍ່ການຮ່ວມມືກັບອາຊຽນໃນໄລຍະຜ່ານມາຈົນ​ເຖິງ​ປັດ​ຈຸ​ບັນ. ນອກນັ້ນ, ທ່ານຍັງໄດ້ກ່າວຢືນຢັນ​ວ່າ: ບັນດາປະເທດສະມາຊິກໃນອາຊຽນ​ຈະ​ສືບຕໍ່ການຮ່ວມມື ກັບ ສ​ປ ຈີນ ກໍ​ຄືບັນ​ດາປະ​ເທດຄູ່ຮ່ວມມືຂອງອາຊຽນ ເພື່ອສາມາດຜັນຂະຫຍາຍ ແລະ ຊຸກ​ດັນບັນດາແຜນ​ງານຕ່າງໆ​​ດ້ານ​ໄອ​ຊີ​ທີ/ດິ​ຈິ​ຕອລ ໃຫ້​ບັນ​ລຸ​ຕາມ​ຄາດ  ​ໝາຍ​ທີ່​​ອາ​ຊຽນໄດ້​ວາງ​ອອກໃຫ້ທັນກັບສະພາບການ ແລະ ຄວາມຕ້ອງການຕົວຈິງຂອງສັງຄົມ.

ທ່ານຍັງໄດ້ຊົມເຊີຍຕໍ່ຄວາມພະຍາຍາມຂອງບັນດາປະເທດໃນອາຊຽນ ແລະ ສປ ຈີນ ທີ່ໄດ້ເອົາ ໃຈໃສ່ຊີ້ນຳເຮັດໃຫ້ແຜນວຽກ 2020 ຂອງຂະແໜງການແມ່ນເປັນໄປຕາມແຜນການ ເຖິງວ່າຈະມີສະພາບການພະຍາດໂຄວິດ-19 ກໍ່ຕາມ. ພ້ອມທັງ, ການປະກອບສ່ວນຊ່ວຍປະເທດ ແລະ ສັງຄົມຂອງແຕ່ລະກະຊວງ ຢູ່ປະເທດຂອງຕົນໃນໄລຍະທີ່ທ້າທາຍນີ້.

ນອກນີ້, ໃນ​ພິ​ທີ​ດັ່ງ​ກ່າວບັນ​ດາ​ລັດ​ຖະ​ມົນ​ຕີດິ​ຈິ​ຕອລຂອງ​ປະ​ເທດ​ສະ​ມາ​ຊິກ​ອາ​ຊຽນ, ເລ​ຂາ​ທິ​ການ​ໃຫຍ່​ອາ​ຊຽນ ແລະ ສ​ປ ຈີນ ໄດ້​​ກ່າວ​ຊົມ​ເຊີຍ, ປະ​ກອບ​ຄຳ​ຄິດ​ເຫັນ ແລະ ພ້ອມ​ທັງ​ຢືນ​ຢັນ​ຈະ​ຮ່ວມ​ມື​ຢ່າງ​ສະ​ໜິດ​ແໜ້ນ ເພື່ອ​ເຮັດ​ໃຫ້​ປີ​ແຫ່ງ​ການ​ສົ່ງ​ເສີມ​ເສດ​ຖະ​ກິດ​ດິ​ຈິ​ຕອລອາ​ຊຽນ-ຈີນ ໄດ້​ຮັບ​ໝາກ​ຜົນ​ຢ່າງ​ຈົບ​ງາມ. ພິ​ທີ​ດັ່ງ​ກ່າວນີ້, ແມ່ນເປັນການຜັນຂະຫຍາຍຜົນຂອງກອງປະຊຸມ TELMIN19 ທີ່ ສປປ ລາວ ເປັນເຈົ້າ ພາບໃນເດືອນ ຕຸລາ 2019 ຜ່ານມາ ແລະ ໄດ້ຮັບຮອງເອົາປີ 2020 ເປັນປີແຫ່ງການຮ່ວມມືເສດຖະກິດດິຈິຕອລ ອາຊຽນ – ສປ ຈີນ. ພິທີດັ່ງກ່າວ, ຈັດຂຶ້ນໃນວັນທີ 12 ມີຖຸນາ 2020 ຜ່ານມາ.

(ເນື້ອໃນ-ພາບ: ກົມແຜນການ ແລະ ການຮ່ວມມື)