ຫາລືກ່ຽວກັບການສ້າງຕັ້ງສະພາວິທະຍາສາດ ກະຊວງ ກວຕ

821

ກະຊວງວິທະຍາສາດ ແລະ ເຕັກໂນໂລຊີ ໄດ້ເປິດກອງປະຊຸມກ່ຽວກັບການສ້າງຕັ້ງສະພາວິທະຍາສາດ ຂອງກະຊວງວິທະຍາສາດ ແລະ ເຕັກໂນໂລຊີ, ພາຍໃຕ້ການເປັນປະທານຂອງທ່ານ ບັນດິດ ສຈ. ບໍ່ວຽງຄຳ ວົງດາລາ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ປະທານສະພາວິທະຍາສາດແຫ່ງຊາດ, ມີບັນດາທ່ານຮອງລັດຖະມົນຕີ, ຫ້ອງການ, ກົມ, ສະຖາບັນ ແລະ ຜູ້ທີ່ມີວຸດທິການສຶກສາລະດັບປະລິນຍາເອກເຂົ້າຮ່ວມ.   

ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອປຶກສາຫາລືກ່ຽວກັບການສ້າງຕັ້ງສະພາວິທະຍາສາດ ແລະ ໄດ້ເລືອກເອົາຄະນະສະພາວິທະຍາສາດປະທານ, ຮອງປະທານ ແລະ ເລຂາວິທະຍາສາດຂອງກະຊວງວິທະຍາສາດ ແລະ ເຕັກໂນໂລຊີ; ເຊິ່ງການເລືອກຕັ້ງດັ່ງກ່າວມີຜູ້ແທນທັງໝົດຈຳນວນ 25 ທ່ານ, ຍິງ 05 ທ່ານ ທີ່ເປັນຜູ້ລົງສະໝັກເລືອກຕັ້ງຈາກກະຊວງວິທະຍາສາດ ແລະ ເຕັກໂນໂລຊີທັງໝົດ.

ກອງປະຊຸມເລືອກເອົາຄະນະສະພາວິທະຍາສາດ 11 ທ່ານ ທີ່ມີຄະແນນສຽງຫຼາຍທີ່ສຸດຕາມລໍາດັບ. ພ້ອມກັນນີ້, ຍັງໄດ້ເລືອກເອົາປະທານ 01 ທ່ານ, ຮອງປະທານ 01 ທ່ານ ແລະ ເລຂາສະພາວິທະຍາສາດ 01 ທ່ານຂອງກະຊວງວິທະຍາສາດ ແລະ ເຕັກໂນໂລຊີ.

ສໍາລັບຜົນຂອງການເລືອກຕັ້ງຄັ້ງນີ້ແມ່ນໄດ້ເລືອກເອົາ ທ່ານ ບັນດິດ ສຈ. ບໍ່ວຽງຄຳ ວົງດາລາ ເປັນປະທານ; ທ່ານ ປອ. ສຸລິອຸດົງ ສູນດາລາ ເປັນຮອງປະທານ ແລະ ທ່ານ ປອ. ນາງ ອຸດົມພອນ ອິນສີຊຽງໄໝ່ ເປັນເລຂາວິທະຍາສາດ ຂອງ ກະຊວງວິທະຍາສາດ ແລະ ເຕັກໂນໂລຊີ ໂດຍກອງປະຊຸມດັ່ງກ່າວຈັດຂຶ້ນໃນທ້າຍອາທິດຜ່ານມາທີກະຊວງດັ່ງກ່າວ.