ກົມການເງິນຕ່າງປະເທດ ແລະ ຄຸ້ມຄອງໜີ້ສິນ ດຳເນີນກອງປະຊຸມໃຫຍ່ ຄັ້ງທີ V 

589

ໜ່ວຍພັກກົມການເງິນຕ່າງປະເທດ ແລະ ຄຸ້ມຄອງໜີ້ສິນ (ກງຕສ) ກະຊວງການເງິນ ໄດ້ດຳເນີນກອງປະຊຸມໃຫຍ່ ຄັ້ງທີ V ຂຶ້ນທີ່ກົມສ່ວຍສາອາກອນ ໂດຍການເຂົ້າຮ່ວມຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ທ່ານ ສຸລິວັດ ສຸວັນນະຈູມຄໍາ ເລຂາໜ່ວຍພັກກົມການເງິນຕ່າງປະເທດ ແລະ ຄຸ້ມຄອງໜີ້ສິນ, ມີບັນດາເລຂາໜ່ວຍພັກບັນດາກົມອ້ອມຂ້າງກະຊວງ,ສະມາຊິກພັກສົມບູນ-ສໍາຮອງເຂົ້າຮ່ວມ.

ໃນກອງປະຊຸມ, ທ່ານ ສຸລິວັດ ສຸວັນນະຈູມຄໍາ ໄດ້ຜ່ານບົດລາຍງານການເມືອງເພື່ອສະຫຼຸບການ ເຄື່ອນໄຫວວຽກງານໃນໄລຍະຜ່ານມາ ແລະ ໄດ້ພ້ອມກັນຄົ້ນຄວ້າປະກອບຄໍາເຫັນໃສ່ບົດລາຍງານການເມືອງຕໍ່ກອງປະຊຸມໃຫຍ່ຄັ້ງທີ່ V ຂອງໜ່ວຍພັກກົມການເງິນຕ່າງປະເທດ ແລະ ຄຸ້ມຄອງໜີ້ສິນ ແລະ ວາງທິດທາງແຜນການວຽກງານຕໍ່ໜ້າ ແລະ ຄາດໝາຍສູ້ຊົນໃນແຕ່ລະດ້ານກ່ຽວກັບວຽກງານກໍ່ສ້າງພັກພະນັກງານ ແລະ ບົດສຳຫຼວດການນຳພາລວມຂອງຄະນະໜ່ວຍພັກໄລຍະຜ່ານມາ.

ພ້ອມນັ້ນ, ຍັງໄດ້ຕີລາຄາດ້ານດີ, ດ້ານອ່ອນຂໍ້ຄົງຄ້າງ, ສາເຫດ, ບົດຮຽນໃນການຊີ້ນໍາ-ນໍາພາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ໃນໜຶ່ງສະໄໝຜ່ານມາ.ໃນກອງປະຊຸມໄດ້ເປັນເອກະສັນກັນຮັບຮອງເອົາທິດທາງແຜນການ 5 ປີນັບແຕ່ປີ 2020-2025.
ນອກນັ້ນ, ຜູ້ແທນກອງປະຊຸມຍັງໄດ້ປ່ອນບັດຄັດເລືອກເອົາຄະນະໜ່ວຍຊຸດໃໝ່ມີຜູ້ສະໝັກເລືອກຕັ້ງ 5 ສະຫາຍ, ຍິງ 3 ສະຫາຍ ແລະ ໄດ້ເລືອກເອົາຄະນະໜ່ວຍພັກຊຸດໃໝ່ຈໍານວນ 3 ສະຫາຍຄື: ສະຫາຍ ສຸລິວັດ ສຸວັນນະຈູມຄໍາ ເປັນເລຂາໜ່ວຍພັກ, ສະຫາຍ ນາງ ໄມທິບ ລັດຕະນະບຸນຍັງ ເປັນຮອງເລຂາໜ່ວຍພັກ ທັງເປັນປະທານກວດກາ, ສະຫາຍ ນາງ ມະນີວອນ ພົນອາມາດ ຄະນະໜ່ວຍພັກ.