ມອບ-ຮັບໜ້າທີ່ຫົວໜ້າພະແນກພະລັງງານ ແລະ ບໍ່ແຮ່ ແຂວງໄຊສົມບູນ ຜູ້ເກົ່າ ແລະ ຜູ້ໃໝ່.

529
ພິທີ ມອບ-ຮັບ ໜ້າທີ່ຫົວໜ້າພະແນກພະລັງງານ ແລະ ບໍ່ແຮ່ #ແຂວງໄຊສົມບູນ ລະຫວ່າງ ຜູ່ເກົ່າ ແລະ ຜູ່ໃໝ່ ໄດ້ຈັດຂື້ນໃນຕອນເຊົ້າ ຂອງວັນທີ 2 ມິຖຸນາ 2020 ນີ້ ທີ່ຫ້ອງປະຊຸມລັດວິສາຫະກິດ ໄຟຟ້າລາວ ສາຂາ ແຂວງໄຊສົມບູນ ໂດຍການເຂົ້າຮ່ວມ ເປັນປະທານ ຂອງທ່ານ ຄຳມະນີ ອິນທິລາດ, ລັດຖະມົນຕີ ກະຊວງພະລັງງານ ແລະ ບໍ່ແຮ່, ທ່ານ ພົຕ ຄຳລຽງ ອຸທະໄກສອນ, ເຈົ້າແຂວງໄຊສົມບູນ, ມີປະທານສະພາປະຊາຊົນແຂວງ, ພະແນກການທີ່ກ່ຽວຂ້ອງ ເຂົ້າຮ່ວມ.
  
ໃນພິທີ ຜູ່ເຂົ້າຮ່ວມໄດ້ຮັບຟັງການຜ່ານ ຂໍ້ຕົກລົງ ຂອງທ່ານເຈົ້າແຂວງໄຊສົມບູນ ວ່າດ້ວຍການໂຍກຍ້າຍ ພະນັກງານໄປຮັບໜ້າທີ່ໃໝ່ ແລະ ຂໍ້ຕົກລົງ ວ່າດ້ວຍການແຕ່ງຕັ້ງພະນັກງານ ເຊິ່ງໄດ້ໂຍກຍ້າຍ ທ່ານ ອານຸສອນ ທິບດວງໃຈ, ຫົວໜ້າພະແນກພະລັງງານ ແລະ ບໍ່ແຮ່ ແຂວງໄຊສົມບູນ ໄປປະຈໍາການ ຢູ່ກະຊວງພະລັງງານ ແລະ ບໍ່ແຮ່ ແລະ ແຕ່ງຕັ້ງ ທ່ານ ບຸນທຽມ ໄຊສົງຄາມ, ຮອງຫົວໜ້າກົມທຸລະກິດພະລັງງານ ກະຊວງພະລັງງານ ແລະ ບໍ່ແຮ່ ຂື້ນຮັກສາການ ຫົວໜ້າພະແນກພະລັງງານ ແລະ ບໍ່ແຮ່ ແຂວງໄຊສົມບູນ.
ຈາກນັ້ນ ພິທີໄດ້ຮັບຟັງການຜ່ານບົດສະຫລຸບລາຍງານໂດຍຫຍໍ້ ກ່ຽວກັບການເຄື່ອນໄຫວວຽກງານຂອງພະແນກພະລັງງານ ແລະ ບໍ່ແຮ່ ໃນໄລຍະທີ່ຜ່ານມາ ເຊິ່ງຍົກໃຫ້ເຫັນດ້ານດີ-ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້, ຍົກໃຫ້ເຫັນດ້ານວຽກງານວິຊາສະເພາະ ແມ່ນໄດ້ເອົາໃຈໃສ່ຄົ້ນຄວ້າ, ຕິດຕາມ, ກວດກາ, ວາງແຜນ ຄຸ້ມຄອງ ແລະ ສົ່ງເສີມວຽກງານພະລັງງານ ແລະ ບໍ່ແຮ່ ອຳນວຍຄວາມສະດວກໃນການປະສານພົວພັນກັບຂະແໜງການທີ່ກ່ຽວຂ້ອງ ໃນການປະຕິບັດວຽກງານດ້ານວິຊາສະເພາະ,
ຊຶ່ງໃນໄລຍະທີ່ຜ່ານມາທົ່ວແຂວງໄຊສົມບູນ ມີເຂື່ອນໄຟຟ້າ ທັງໝົດ 16 ໂຄງການ, ເຂື່ອນຂະໜາດໃຫຍ່ ມີ 8 ໂຄງການ ສໍາເລັດການກໍ່ສ້າງແລ້ວ ມີ 7 ເຂື່ອນ ແລະ ກໍາລັງກໍ່ສ້າງມີ 1ເຂື່ອນ, ເຂື່ອນຂະໜາດນ້ອຍ ມີ 11 ໂຄງການ, ສໍາເລັດການກໍ່ສ້າງແລ້ວ ມີ 3 ເຂື່ອນ ແລະ ກໍາລັງກໍ່ສ້າງ 8 ເຂື່ອນ, ໂຄງການກໍ່ສ້າງຕາຂ່າຍໄຟຟ້າ ມີ 11 ໂຄງການ, ມີມູນຄ່າການກໍ່ສ້າງທັງໝົດ 224.035.274.153 ກີບ, ໂຄງການສະເໜໃໝ່ມີ 3 ໂຄງການ ມີມູນຄ່າທັງໝົດ 35.625.223.873 ກີບ, ສ່ວນວຽກງານແຮ່ທາດ ພາຍໃນແຂວງ ມີທັງໝົດ 9 ໂຄງການ, ມີ 11 ກິດຈະການ ໃນນີ້ ໂຄງການທີ່ສະເໜີຂໍເຊັນບົດບັນທຶກຄວາມເຂົ້າໃຈ MOU ມີ 5 ບໍລິສັດ, ມີ 6 ກິດຈະການ. ຫລັງຈາກນັ້ນ ພິທີ ໄດ້ເຊັນບົດບັນທຶກມອບ-ຮັບ ໜ້າທີ່ ຫົວໜ້າພະແນກພະລັງງານ ແລະ ບໍ່ແຮ່ ແຂວງໄຊສົມບູນ ລະຫວ່າງ ຜູ່ເກົ່າ ແລະ ຜູ່ໃໝ່ ຢ່າງເປັນທາງການ.
ພາບ-ຂ່າວ: ພາພອນ ນະວົງໄຊ