ເບິ່ງ! ຄວາມຄືບໜ້າຂອງໂຄງການເຂດເສດຖະກິດໃໝ່ສີທັນດອນ.

619

ທ່ານ ນາງ ຄຳພູ ລິດທິສັກ ເຈົ້າເມືອງໆໂຂງ ແຂວງຈຳປາສັກ ໄດ້ນຳພາຄະນະວິຊາການຈາກຫ້ອງການເຂດເສດຖະກິດພິເສດແຂວງຈຳປາສັກ, ພະແນກການທີ່ກ່ຽວຂ້ອງອ້ອມຂ້າງແຂວງ ແລະ ກະຊວງທີ່ກ່ຽວຂ້ອງ ລົງເບິ່ງການຈັດຕັ້ງປະຕິບັດໜ້າວຽກຕົວຈິງຂອງທາງໂຄງການພັດທະນາເຂດເສດຖະກິດພິເສດມະຫານະທີສີທັນດອນ ທີ່ພວມລົງມືກໍ່ສ້າງໃນປັດຈຸບັນ ເຊິ່ງເປັນການພັດທະນາໂຄງການໄລຍະທີ 1 ໃນໄລຍະເວລານັບແຕ່ປີ 2018-2020 ເປັນຕົ້ນ: ໂຄງການກໍ່ສ້າງເສັ້ນທາງເບຕົງອ້ອມດອນໂຂງ, ໂຄງການກໍ່ສ້າງໂຮງແຮມສີທັນດອນອິນເຕີເນເຊີນແນວ ແລະ ເສັ້ນທາງຫຼັກເລກທີ 1.

ວິຊາການຂອງທາງໂຄງການພັດທະນາເຂດເສດຖະກິດພິເສດ ມະຫານະທີສັນທັນດອນ ໄດ້ລາຍງານວ່າ: ປັດຈຸບັນໂຄງການແມ່ນພວມດຳເນີນການກໍ່ສ້າງ ແລະ ພັດທະນາຣີສອດຄອນພະເພັງໃຫ້ກາຍ ເປັນແຫຼ່ງທ່ອງທ່ຽວຄົບວົງຈອນ ປະກອບດ້ວຍໂຮງແຮມລະດັບ 5 ດາວ, ເຮືອນພັກຕາກອາກາດ, ສະ  ໜາມກ໊ອຟ, ສະຖານບັນເທິງ, ສູນບໍລິການນັກທ່ອງທ່ຽວ ແລະ ອື່ນໆ. ສຳລັບແຜນການໃນຕໍ່ໜ້າ ແມ່ນຈະສືບຕໍ່ເລ່ັງລົງມືກໍ່ສ້າງໂຮງແຮມດອກຈຳປາ, ຂະຫຍາຍສະໜາມກ໊ອຟ, ສ້າງຖະໜົນຄົນຍ່າງໃນຍາມກາງຄືນ, ປັບປຸງແຫຼ່ງທ່ອງທ່ຽວນ້ຳຕົກຕາດຄອນພະເພັງ ແລະ ນ້ຳຕົກຕາດສົມພະມິດ. ທັງນີ້, ກໍ່ເພື່ອພັດທະນາພື້ນຖານໂຄງລ່າງການທ່ອງທ່ຽວ ຮອງຮັບນັກທ່ອງທ່ຽວທັງພາຍໃນ ແລະ ຕ່າງປະເທດທີ່ເພີ່ມຂຶ້ນໃນແຕ່ລະປີ.

ກ່ອນໜ້ານີ້, ທ່ານເຈົ້າເມືອງໆໂຂງ ຍັງໄດ້ພາຄະນະໄປເບິ່ງໂຄງການກໍ່ສ້າງເສັ້ນທາງເບຕົງເສີມເຫຼັກໃນເຂດເທສະບານເມືອງໂຂງ (ຈຸດຫົວໂຂງ) ເຊິ່ງເປັນໜຶ່ງໃນໜ້າວຽກຫຼັກໃນການປັບປຸງພື້ນຖານໂຄງລ່າງດ້ານຄົມມະນາຄົມຂົນສົ່ງດ້ານການຄ້າ ແລະ ການທ່ອງທ່ຽວໃນເຂດດອນໂຂງ ເພື່ອອຳນວຍຄວາມສະດວກ ແລະ ດຶ່ງດູດນັກທ່ອງທ່ຽວໃຫ້ເຂົ້າມາທ່ຽວນັບມື້ຫຼາຍຂຶ້ນ.