ກັກຕົວຜູ້ຄ້າຂາຍຢາເສບຕິດ ໄດ້ 03 ຄົນພ້ອມຂອງກາງຢາບ້າ ໜື່ງໝື່ນເກົ້າພັນກວ່າເມັດ

530

ປກສ ນະຄອນໄກສອນພົມວິຫານ ກັກຕົວຜູ້ຄ້າຂາຍ ຢາເສບຕິດ ໄດ້ 03 ຄົນ ຄື ທ້າວ ວິດກີ້ວື່ ອາຍຸ 21 ປີ ກຳມະກອນ ບ້ານຢູ່ປະຈຸບັນ ນາກຸງ, ທ້າວ ຟືວາງ ອາຍຸ 20 ປີ ກຳມະກອນ ບ້ານຢູ່ປະຈຸບັນ ຕານມີໄຊ ທັງສອງ ເປັນຄົນ ເມືອງໄຊທານີ ນະຄອນຫຼວງວຽງຈັນ ແລະ ທ້າວ ແກ້ວອິນປັນ ຫຼື ອ່ອນ ອາຍຸ 24 ປີ ກຳມະກອນ ບ້ານຢູ່ປະຈຸບັນ ຫົວເມືອງໃຕ້ ນະຄອນໄກສອນພົມວະຫານ ແຂວງສະຫວັນນະເຂດ ພ້ອມຢຶດຂອງກາງ ຢາບ້າ ຈຳນວນ 09 ມັດ, 10 ຖົງ ເທົ່າກັບ 19,930 ເມັດ, ລົດເກງ 01 ຄັນ ຍີ່ຫໍ້ ເກຍ (KIA) ສີິດຳ ປ້າຍທະບຽນ ກຣ 7369 ກຳແພງນະຄອນ, ລົດຈັກ ຮອນດ້າ ເອັມເອັສເອກສ໌(MSX125) ສີແດງ 01 ຄັນ

ເຈົ້າໜ້າທີ່ ປກສ ນະຄອນໄກສອນພົມວິຫານໃຫ້ຮູ້ວ່າ ໃນວັນທີ 23 ພຶດສະພາ 2020 ໄດ້ຮັບການລາຍງານຈາກແຫຼ່ງຂ່າວ ວ່າຈະມີກຸ່ມແກ້ງ ເປົ້າໝາຍຄ້າຂາຍຢາເສບຕິດ ນັດສົ່ງຢາບ້າ ຢູ່ຈຸດເສັ້ນທາງຂອບເຂດບ້ານ ນາແກ ນະຄອນໄກສອນພົມວິຫານ ຈື່ງໄດ້ຈັດຕັ້ງເຈົ້າໜ້າທີ່ວິຊາສະເພາະລົງກວດກາພິສູດແຫຼ່ງຂ່າວເຫັນວ່າມີມູນຄວາມຈິງແທ້ ຈື່ງໄດ້ວາງແຜນເພື່ອເຂົ້າທຳການຈັບກຸມກຸ່ມເປົ້າໝາຍດັ່ງກ່າວ ຮອດເວລາ 07 ໂມງ ຂອງວັນດຽວກັນ ຈື່ງພົບເຫັນເປົ້າໝາຍເປັນຊາຍໄວລຸ້ນ 02 ສອງ ຄົນ ຂີ່ລົດຈັກ ຮອນດ້າ ເອັມເອສເອກສ໌ ສີແດງ ບໍ່ຕິດປ້າຍທະບຽນ ຂັບຂີ່ມາຈຸດດັ່ງກ່າວ

ຈາກນັ້ນ ໄດ້ມີລົດ ເກງເກຍ ສີດຳ ປ້າຍທະບຽນ ກຣ 7369 ກຳແພງນະຄອນ ໄດ້ຂີ່ເຂົ້າມາຫາ ຊາຍສອງຄົນດັ່ງກ່າວ ເພື່ອກະກຽມສົ່ງຢາເສບຕິດໃຫ້ກັນ ເຈົ້າໜ້າທີ່ ສະກັດກັ້ນ ແລະ ຕ້ານຢາເສບຕິດ ປກສ ນະຄອນໄກສອນພົມວິຫານ ຈື່ງໄດ້ສະແດງຕົວເຂົ້າທຳການຈັບກຸມ ກຸ່ມເປົ້າໝາຍດັ່ງກ່າວ ແລະ ສາມາດກັກຕົວເປົ້າໝາຍ ທີ່ຢູ່ໃນລົດເກງ ໄດ້ 02 ຄົນ ຊື່ ທ້າວ ວິດກີ້ວື່ ແລະ ທ້າວ ຟືວາງ ພ້ອມຢຶດຂອງກາງໃນລົດມີ ຢາບ້າ ຈຳນວນ 09 ມັດ, 08 ຖົງ, ແລະ ກັກເປົ້າໝາຍທີ່ຂີ່ລົດຈັກມາ ໄດ້ 01 ຄົນ ຊື່ ທ້າວ ແກ້ວອິນປັນ ຫຼື ອ່ອນ ພ້ອມຂອງກາງຢາບ້າ 02 ຖົງ ສ່ວນອີກຄົນໜື່ງທີ່ຂີ່ລົດຈັກມາກັບ ທ້າວ ແກ້ວອິນປັນ ແມ່ນໄດ້ໄຫວໂຕທັນເອົາໂຕຫຼົບໜີການຈັບກຸມຂອງເຈົ້າໜ້າທີ່ ຈາກນັ້ນເຈົ້າໜ້າທີ່ຈື່ງໄດ້ນຳເອົາຂອງກາງຄະດີ, ພາຫະນະ ແລະ ພວກກ່ຽວ ເຂົ້າໄປ ປກສ ນະຄອນໄກສອນພົມວິຫານ ເພື່ອທຳການ ສືບສວນ-ສອບສວນ ແລະ ດຳເນີນຕາມຂັ້ນຕອນກົດໝາຍຕໍ່ໄປ.
ຂ່າວ : ວິໄຊ ສຽງສະຫວັນ