ການ​ຄ້າ ທຳລາຍຢາສູບ ແລະ ເຄື່ອງໃນສັດ ນຳເຂົ້າບໍ່ຖືກຕ້ອງ ມູນຄ່າ 130 ກວ່າລ້ານກີບ

561

ໃນວັນທີ 26 ພຶດສະພາ 2020 ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ (ອຄ.ນວ) ໄດ້ຈັດພິທີທຳລາຍຢາສູບ ແລະ ເຄື່ອງໃນສັດ ນຳເຂົ້າບໍ່ຖືກຕ້ອງ
ໂດຍການເຂົ້າຮ່ວມຂອງ ທ່ານ ນັນຕາ ສານຸວົງ ຮອງຫົວໜ້າພະແນກ ອຄ.ນວ, ມີຕ່າງໜ້າກົມການຄ້າພາຍໃນ, ພະແນກສາທາລະນະສຸກ ນວ ແລະ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ພູວອນ ພູສະເຫວີຍ ຮອງຂະແໜງການຄ້າພາຍໃນ, ພະແນກ ອຄ.ນວ ກ່າວວ່າ: ພະແນກ ອຄ ນວ ໄດ້ນຳສິນຄ້ານອກລະບົບທີ່ນຳເຂົ້າບໍ່ຖືກຕ້ອງນຳມາທຳລາຍໃນຄັ້ງນີ້ປະກອບມີ: ຢາສູບ ຈຳນວນ 30 ແກັດ ແລະ ເຄື່ອງໃນສັດ ຈໍານວນ 11 ແກັດ ນ້ຳໜັກ 500 ກິໂລ ລວມມູນຄ່າທັງໝົດ 136 ລ້ານກວ່າກີບ ເຊິ່ງສິນຄ້າດັ່ງກ່າວໜ່ວຍງານກວດກາການຄ້າຂັ້ນພະແນກ ແລະ ຈຸງານກວດກາຂັ້ນເມືອງ ໃຫ້ເພີ່ມທະວີເອົາໃຈໃສ່ຕິດຕາມກວດກາສິນຄ້າລັກລອບນຳເຂົ້ານອກລະບົບ ມາຮອດວັນທີ 16 ພຶດສະພາ 2020 ສາມາດຢຶດສາສູບໄດ້ ຈຳນວນ 30 ແກັດ ຢູ່ເດີ່ນຄ່ຽນຖ່າຍສິນຄ້າ ຫຼັກ 16 ເມືອງໄຊທານີ

ໃນວັນທີ 25 ພຶດສະພາ 2020 ກໍ່ໄດ້ກວດກາພົບເຫັນລົດແກ່ເຄື່ອງໃນສັດ ສາມາດຢືດໄດ້ ຈຳນວນ 11 ແກັດ ເປັນສິນຄ້ານຳເຂົ້າຈາກປະເທດເພື່ອນບ້ານ ແລະ ຕໍ່ກັບສິນຄ້າດັ່ງກ່າວໂດຍສະເພາະເຄື່ອງໃນສັດແມ່ນບໍ່ໄດ້ຜ່ານການກວດກາຢັ້ງຢືນຈາກສັດຕະວະແພດຂະແໜງກະສິກຳ ແລະ ປ່າໄມ້ ແລະ ບໍ່ມີເອກະສານອະນຸຍາດນຳເຂົ້າຈາກພາກສ່ວນກ່ຽວຂ້ອງ. ສະນັ້ນ, ຈຶ່ງໄດ້ຢຶດມາທຳລາຍຖີ້ມ ພ້ອມທັງຢາສູບ.

ຂ່າວ: ​ໜັງ​ສື​ພິມ​ເສດ​ຖະ​ກິດ​ການ​ຄ້າ