ຂ່າວດີ! ປິ່ນປົວຜູ້ຕິດເຊື້ອໂຄວິດຫາຍດີອີກ 2 ກໍລະນີວັນນີ້ ແລະ ຍັງສືບຕໍ່ປິ່ນປົວ 3 ກໍລະນີ

573

ຜູ້ຕິດເຊື້ອ ກໍລະນີທີ່ 16 ແລະ 18 ປິ່ນປົວຫາຍດີ ແລະ ໄດ້ກັບບ້ານແລ້ວ ແຕ່ຕ້ອງໄປຈຳກັດບໍລິເວນຢູ່ເຮືອນຈົນກ່ວາຈະຄົບ 14 ວັນ. ມາຮອດປັດຈຸບັນ ຜູ້ຕິດເຊື້ອໂຄວິດ-19 ຢູ່ ສປປ ລາວ ປິ່ນປົວຫານດີ ແລະ ກັບບ້ານແລ້ວທັງໝົດ 16 ກໍລະນີ ຍັງສືບຕໍ່ປິ່ນປົວຕໍ່ 3 ກໍລະນີ.

ໃນວັນທີ 27 ພຶດສາພາ 2020 ທີ່ສູນປະຕິບັດງານ ຄະນະສະເພາະກິດ ຄວບຄຸມ COVID-19ກະຊວງສາທາລະນະສຸກ ນະຄອນຫຼວງວຽງຈັນ ໄດ້ມີພິທີຖະແຫຼງຂ່າວລາຍງານສະພາບການລະບາດຂອງໂຄວິດ-19 ໂດຍທ່ານ ຮສ ປອ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ຫົວໜ້າກອງເລຂາຄະນະສະເພາະກິດ ພ້ອມດ້ວຍຄະນະ ຕໍ່ສື່ມວນຊົນ.
ທ່ານ ຮສ ປອ ພູທອນ ເມືອງປາກ ກ່າວວ່າ: ການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດ ໃນວັນທີ 26 ພຶດສະພາ 2020, ໄດ້ເກັບຕົວຢ່າງມາກວດວິເຄາະທັງໝົດ 83 ຄົນ, ໃນນັ້ນ: ມີແຮງງານລາວທີ່ກັບມາແຕ່ໄທ 72 ຄົນ, ແຮງງານຫວຽດນາມ 06 ຄົນ, ກໍລະນີສົງໃສ 01 ຄົນ ແລະ ຄົນເຈັບຕິດເຊື້ອນອນປີ່ນປົວຢູ່ໂຮງໝໍມິດຕະພາບທີ່ເກັບຕົວຢ່າງມາກວດຄືນ 04 ຄົນ. ຜົນກວດ ແຮງງານລາວ ແລະ ກໍລະນີສົງໃສທັງໝົດ ທີ່ກວດມື້ວານນີ້ ບໍ່ພົບເຊື້ອ.

ສຳລັບຜົນກວດຄົນເຈັບຕິດເຊື້ອ 4 ຄົນ ໃຫ້ຜົນລົບ 02 ຄົນ ເປັນຈຳນວນ 2 ຄັ້ງ. ໝາຍຄວາມວ່າໃນວັນທີ 26 ພຶດສະພາ 2020 ບໍ່ມີຜູ້ຕິດເຊື້ອໃໝ່. ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 26 ພຶດສະພາ 2020 ໄດ້ເກັບຕົວຢ່າງມາກວດທັງໝົດ ມີ 5.938 ຕົວຢ່າງ, ກວດພົບເຊື້ອສະສົມ 19 ຄົນ (45 ມື້ແລ້ວທີ່ບໍ່ພົບຜູ້ຕິດເຊື້ອໃໝ່).

ການຕິດຕາມປີ່ນປົວຄົນເຈັບຢູ່ໂຮງໝໍ ປັດຈຸບັນ, ມີຜູ້ນອນຕິດຕາມຢູ່ໂຮງໝໍມິດຕະພາບ 05 ຄົນ ຍິງ 04 ຄົນ ທັງໝົດເຫັນວ່າມີອາການປົກກະຕິ ຕາມການເກັບຕົວຢ່າງມາກວດຫາເຊື້ອຄືນເຫັນວ່າມີ 02 ຄົນ (ກໍລະນີທີ່ 16 ແລະ 18) ຜົນກວດບໍ່ພົບເຊື້ອພະຍາດ 02 ຄັ້ງ, ໝາຍຄວາມວ່າຈະໃຫ້ພວກກ່ຽວອອກຈາກໂຮງໝໍໄປຈຳກັດບໍລິເວນຢູ່ເຮືອນຈົນກ່ວາຈະຄົບ 14 ວັນ.