44 ມື້ແລ້ວລາວບໍພົບຜູ້ຕິດເຊື້ອ

519

ຖືວ່າເປັນຂ່າວດີ ທີ່ມາຮອດວັນທີ 26 ພຶດສະພາ ລາວເຮົາຍັງບໍ່ພົບຜູ້ຕິດເຊື້ອໂຄວິດ-19 ລາວໃໝ່ ຈາກຜົນກວດຕົວຢ່າງຫຼ້າສຸດໃນວັນທີ 25 ພຶດສະພາ 2020 ທັງໝົດ 60 ກໍລະນີ ບໍ່ພົບຜູ້ຕິດເຊື້ອ ແຕ່ສິ່ງທີ່ເປັນຂ່າວດີ ໃນຕົວຢ່າງທັງໝົດນັ້ນມີ 3 ຕົວຢ່າງທີ່ເປັນຂອງຜູ້ປ່ວຍຕິດເຊື້ອທີ່ນອນຕິດຕາມອາການຢູ່ທີ່ໂຮງໝໍ 3 ຄົນ ແຕ່ຜົນກວດອອກມາມີຄ່າເປັນລົບ 2 ຄົນ ແລະ ສືບຕໍ່ລໍຖ້າກວດຄືນອີກ ຫາກຍັງເປັນຄ່າລົບ ອາດຈະໄດ້ອອກໂຮງໝໍໄປຕິດຕາມອາການຢູ່ເຮືອນ.

ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ກ່າວວ່າ: ການຕິດຕາມຄົນເຂົ້າ-ອອກຜ່ານແດນທັງໝົດ ມີ 1. 934 ຄົນ ໃນນັ້ນຜ່ານດ່ານລາວ-ໄທ 1.093 ຄົນ ໃນນັ້ນມີແຮງງານລາວ ກັບຈາກປະເທດໄທທັງໝົດ 30 ຄົນ ເຫຼືອນັ້ນມແມ່ນຄົນຂັບລົດບັນທຸກສິນຄ້າ; ຜ່ານດ່ານລາວ-ຈີນ ມີທັງໝົດ 4 ຄົນ ໃນນັ້ນມີແຮງງານລາວທີ່ກັບຈາກຈີນ 1 ຄົນ ເຫຼືອນັ້ນແມ່ນຄົນຂັບລົດແກ່ສິນຄ້າ; ຜ່ານດ່ານລາວ-ຫວຽດ ມີ 777 ຄົນທັງໝົດແມ່ນຄົນຂັບລົດຂົນສົ່ງສິນຄ້າ; ຈຳນວນຜູ້ເດີນທາງຜ່ານສະໜາມບິນວັດໄຕ ມີ 60 ຄົນ ໃນນັ້ນມີນັກສຶກສາລາວ 3 ຄົນ ແລະ ແຮງງານຄົນຈີນ ທີ່ມາສ້າງໂຄງການທາງລົດໄຟລາວ-ຈີນ ທັງໝົດ 57 ຄົນໃນທຸກດ່ານແມ່ນພວກເຮົາມີການວັດແທກອຸນຫະພູມຮ່າງກາຍ ແລະ ບໍ່ພົບກໍລະນີທີ່ມີອາການ ແຕ່ທັງໝົດໄດ້ໄດ້ກັກຕົວ 14 ວັນຕາມຈຸດທີ່ໄດ້ກຳນົດໄວ້


ທ່ານກ່າວຕື່ມວ່າ: ວຽກງານວິເຄາະ ແລະ ຄົ້ນຫາຜູ້ຕິດເຊື້ອ ເຊິ່ງໃນວັນທີ 25 ພຶດສະພາ 2020 ໄດ້້ເກັບຕົວຢ່າງມາກວດທັງໝົດ 60 ຄົນ ໃນນັ້ນມີແຮງງານທີ່ກັບມາຈາກໄທ ແລະ ແຮງງານທີ່ກັບມາຈາກຈີນ ແລະ ຕົວຢ່າງຜູ້ປ່ວຍຕິດເຊື້ອທີ່ນອນຕິດຕາມອາການຢູ່ໂຮງໝໍມິດຕະພາບ ຜ່ານການກວດຕົວຢ່າງທັງໝົດແມ່ນບໍ່ພົບເຊື້ອຈັກກໍລະນີ, ສຳລັບຜົນກວດຂອງຜູ້ຕິດເຊື້ອທີ່ນອນປິ່ນປົວ 3 ຄົນທີ່ນຳມາກວດປະກົດວ່າມີ 2 ຄົນແມ່ນຜົນກວດອອກມາເປັນຄ່າລົບ ແລະ ມື້ອື່ນຈະກວດເປັນຄັ້ງທີ 2 ຖ້າວ່າຜົນກວດຍັງອອກມາເປັນລົບ ກໍ່ຈະໄດ້ອອກໂຮງໝໍກັບຄືນເມືອສືບຕໍ່ກັກຕົວຢູ່ເຮືອນຂອງເຂົາເຈົ້າເອງ. ນັ້ນກໍ່ສະແດງວ່າ ມາຮອດວັນທີ 25 ພຶດສະພາ 2020 ເປັນມື້ທີ 44 ແລ້ວທີ່ລາວເຮົາບໍ່ພົບຜູ້ຕິດເຊື້ອລາຍໃໝ່ ສ່ວນຕົວເລກສະສົມຜູ້ຕິດເຊື້ອຍັງຢູ່ທີ 19 ຄົນເທົ່າເດີມ

ທ່ານໃຫ້ຮູ້ຕື່ມວ່າ: ມາຮອດວັນທີ 26 ພຶດສະພາ 2020 ນີ້ ໃນທົ່ວປະເທດຍັງມີຜູ້ຕິດເຊື້ອທີ່ຍັງນອນຮັບການຕິດຕາມປິ່ນປົວທັງໝົດ 5 ຄົນ ຍິງ 4 ຄົນ ແລະ ທັງໝົດແມ່ນມີອາການເບົາບາງ.