ໜ່ວຍພັກພະແນກ ອຄ ສາລະວັນ ຮັບໃບຢັ້ງຢືນເປັນໜ່ວຍພັກເຂັ້ມແຂງ-ໜັກແໜ້ນ.

525
ພະແນກອຸດສາຫະກຳ ແລະ ການຄ້າແຂວງສາລະວັນ ໄດ້ຈັດພິທີຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2019 ໂດຍການເຂົ້າຮ່ວມຂອງ ສະຫາຍ ວິຊຽນ ນະວິກຸນ ຄະນະປະຈຳພັກແຂວງ ຮອງເຈົ້າແຂວງສາລະວັນ ຜູ້ຊີ້ນຳວຽກງານເສດຖະກິດ, ມີ ສະຫາຍ ຄຳຜ່ານ ສີລາວີ ເລຂາໜ່ວຍພັກ ຫົວໜ້າພະແນກອຸດສາຫະກຳ ແລະ ການຄ້າແຂວງ, ມີບັນດາພາກສ່ວນທີ່ກ່ຽວຂ້ອງ ແລະ ສະມາຊິກພັກພາຍໃນເຂົ້າຮ່ວມ.
ສະຫາຍ ຄຳຜ່ານ ສີລາວີ ເລຂາໜ່ວຍພັກ ຫົວໜ້າພະແນກອຸດສາຫະກຳ ແລະ ການຄ້າແຂວງ ໄດ້ຜ່ານບົດສະຫຼຸບຕີລາຄາປະເມີນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໂດຍຫຍໍ້ໃນການຈັດຕັ້ງປະຕິບັດໃນດ້ານຕັ້ງໜ້າ, ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ ເປັນຕົ້ນແມ່ນ:
ດ້ານການເມືອງ-ແນວຄິດ, ດ້ານການຈັດຕັ້ງ-ແບບແຜນການນຳພາ ເຊີ່ງໄດ້ເອົາໃຈໃສ່ສຶກສາອົບຮົມສະມາຊິກພັກ, ພະນັກງານລັດຖະກອນ ເຊື່ອມຊຶມແນວທາງ, ນະໂຍບາຍຂອງພັກ-ລັດ ວາງອອກ 22 ຄັ້ງ ແລະ ໄດ້ດຳເນີນຊີວິດພັກຢ່າງເປັນປົກກະຕິ ແລະ ຕໍ່ເນື່ອງ, ຍົກສູງແນວຄິດແຕ່ລະສະຫາຍໃຫ້ມີຄວາມທຸ່ນທ່ຽງ, ມີຫຼັກໝັ້ນການເມືອງຢ່າງໜັກແໜ້ນ ແລະ ເຊື່ອໝັ້ນຕໍ່ການຊີ້ນຳໆພາຂອງພັກ.
ຄະນະພັກ ໄດ້ຢຶດໝັ້ນຫຼັກການລວມສູນປະຊາທິປະໄຕ ນຳພາເປັນໝູ່ຄະນະ, ຈັດຕັ້ງແບບມີແບບແຜນ, ມີຈຸດປະສົງ ແລະ ຄາດໝາຍ. ນອກຈາກນັ້ນ, ໄດ້ນຳພາໃນການປະຕິບັດໜ້າທີ່ການເມືອງ ເປັນຕົ້ນ: ວຽກງານ ປກຊ-ປກສ, ດ້ານວັດທະນະທຳ-ສັງຄົມ ແລະ ການຊີ້ນຳວຽກງານອົງການຈັດຕັ້ງມະຫາຊົນ.
ຄຽງຄູ່ກັນນັ້ນກໍ່ໄດ້ຖືສຳຄັນຕໍ່ການກໍ່ສ້າງພັກ ໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ໃຫ້ຕໍ່ເນື່ອງ, ຜ່ານມາໄດ້ຮັບການຢັ້ງຢືນເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ 4 ປີ ບໍ່ຕໍ່ເນື່ອງ, ເອົາໃຈໃສ່ຕິດຕາມມະຫາຊົນກ້າວໜ້າເຂົ້າເປັນສະມາຊິກພັກ, ໄດ້ເລື່ອນສະມາຊິກພັກສຳຮອງ ເຂົ້າເປັນສົມບູນ 1 ສະຫາຍ, ເລື່ອນມະຫາຊົນກ້າວໜ້າເຂົ້າພັກສຳຮອງໄດ້ 4 ສະຫາຍ, ຍິງ 1 ສະຫາຍ ແລະ ສືບຕໍ່ຕິດຕາມກໍ່ສ້າງມະຫາຊົນກ້າວໜ້າທີ່ໄດ້ຮຽນລະບຽບພັກແລ້ວ 8 ສະຫາຍ, ຍິງ 2 ສະຫາຍ. ໜ່ວຍພັກ ມີສະມາຊິກພັກທັງໝົດ 31 ສະຫາຍ, ຍິງ 4 ສະຫາຍ, ໃນນັ້ນສຳຮອງ 4 ສະຫາຍ, ຍິງ 1 ສະຫາຍ.
ຈາກນັ້ນ, ກໍໄດ້ມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ກັບໜ່ວຍພັກ ພະແນກອຸດສາຫະກຳ ແລະ ການຄ້າແຂວງ ປະຈຳປີ 2019, ເປັນກຽດມອບໂດຍ: ສະຫາຍ ວິຊຽນ ນະວິກຸນ ຮອງເຈົ້າແຂວງໆສາລະວັນ, ຮັບໂດຍ: ສະຫາຍ ຄຳຜ່ານ ສີລາວີ ເລຂາໜ່ວຍພັກພະແນກ ແລະ ກໍ່ໄດ້ມອບບັດໃຫ້ສະມາຊິກພັກ ຕື່ມອີກ.