ການຟື້ນຟູຊີວິດການເປັນຢູ່ຂອງປະຊາຊົນ ຢູ່ເມືອງສະໜາມໄຊ ຈະໃຫ້ສໍາເລັດປີ 2023

782
ທ່ານ ສຸລິວົງ ອະໄພວົງ ເລຂາຄະນະບໍລິຫານງານພັກເມືອງ ເຈົ້າເມືອງສະໜາມໄຊ ໄດ້ລາຍງານຕໍ່ກອງປະຊຸມຜູ້ແທນອົງຄະນະພັກເມືອງສະໜາມໄຊ ຄັ້ງທີ 12 ທີ່ຫາກໍ່ສໍາເລັດຫວ່າງບໍ່ດົນນີ້ວ່າ: ຄະນະບໍລິຫານງານພັກເມືອງສະໜາມໄຊ ໄດ້ກໍານົດເອົາວຽກງານການຟື້ນຟູຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຈາກເຫດການຄູກັນນໍ້າເຂື່ອນໄຟຟ້າເຊປຽນ-ເຊນໍ້ານ້ອຍແຕກໃນທ້າຍປີ 2018 ຜ່ານມາ ເປັນວຽກບຸລິມະສິດສໍາຄັນ,ເຊິ່ງໄດ້ກໍານົດແຕ່ນີ້ຮອດປີ 2023 ການຟື້ນຟູທຸກວຽກງານຕ້ອງໃຫ້ສໍາເລັດ 100%
ເຊິ່ງວຽກຕົ້ນຕໍແມ່ນການສືບຕໍ່ປຸກສ້າງເຮືອນຖາວອນໃຫ້ 5 ບ້ານ,ຈໍານວນ 700 ຫຼັງ,ສະເໜີຊົດເຊີຍ 100%ໃຫ້ 5 ບ້ານທີ່ຖືກຜົນກະທົບໜັກ ທີ່ມີຂໍ້ມູນຮັບຮອງນໍາກັນແລ້ວ,ຕັດຕາຜ່າ ແລະຈັດສັນທີ່ດິນປຸກສ້າງ,ໃຫ້ປະຊາຊົນບ້ານສະໝອງໃຕ້ ຢູ່ຈຸດປີນດົງ,ຟື້ນຟູຊົນລະປະທານ ຝາຍນໍ້າລົ້ນ, ເພື່ອສົ່ງເສີມການຜະລິດກະສິກໍາໃຫ້ປະຊາຊົນຢ່າງທົ່ວເຖິງ,ສືບຕໍ່ເກັບກໍາຂໍ້ມູນຮ່ວມກັບບໍລິສັດຜູ້ພັດທະນາໂຄງການ ແລະຟື້ນຟູຊີວິກການເປັນຢູ່ຂອງປະຊາຊົນໃຫ້ມີຄວາມຢູ່ດີກິນດີ ໃຫ້ສໍາເລັດໃນປີ 2023 ຕາມທິດການສ້າງບ້ານໃນຮູບແບບສັງຄົມນິຍົມແຕ່ຮາກຖານຂື້ນມາ.
ທ່ານ ສຸລິວົງ ອະໄພວົງ ເລຂາຄະນະບໍລິຫານງານພັກເມືອງ ເຈົ້າເມືອງສະໜາມໄຊ ໄດ້ກ່າວຕື່ມວ່າ: ປະຈຸບັນການຟື້ນຟູຊີວິດການເປັນຢູ່ຂອງປະຊາຊົນທີ່ປະສົບໄພພິບັດຢູ່ເມືອງສະໜາມໄຊ ນັບມື້ໄດ້ຮັບຮັບການແກ້ໄຂດີຂື້ນເທື່ອລະກ້າວ,ພ້ອມນີ້ໄດ້ສໍາເລັດການຈັດສັນທີ່ພັກຊົ່ວຄາວມີ 5 ສູນ,ສໍາເລັດການຈັດສັນທີ່ດິນປຸກສ້າງແລ້ວ 4 ບ້ານ,ສໍາເລັດການບຸກເບີກເນື້ອທີ່ທໍາການຜະລິດໃຫ້ປະຊາຊົນມີ 2.140 ເຮັກຕາ,ໄດ້ຟື້ນຟູດິນນາເກົ່າໃຫ້ປະຊາຊົນ 6 ບ້ານສໍາເລັດໄປແລ້ວ 80%.
ໄດ້ຟື້ນຟູດິນທັບຖົມຂອງບ້ານ,ຫ້ວຍ,ຮ່ອງ ໜອງບຶງຢູ່ເຂດໄພພິບັນມີ 6 ບ້ານ,ໄດ້ສ້ອມແປງຄອງເໝືອງຊົນລະປະທານຄືນໃໝ່,ໄດ້ສະໜອງເຂົ້າກິນ,ສະໜອງເງີນຢຽວຢາ,ໃນແຕ່ລະເດືອນເປັນປົກກະຕິ,ໄດ້ປຸກສ້າງເຮືອນຖາວອນ 111 ຫຼັງ ແລະກໍາລັງຈະເລີມປະຕິບັດການກໍ່ສ້າງເຮືອນຖາວອນຈໍານວນ 700 ຫຼັງ,ໄດ້ຊົນເຊີຍຜົນເສຍຫາຍ 5 ລາຍການໃຫ້ 13 ບ້ານ ແລະ 3 ຄຸ້ມ ແລ້ວ 100%,ລວມມູນຄ່າ 28 ຕື້ກວ່າກີບ,ມີ 1.270 ຄົວເຮືອນ.
ຂ່າວ: ພອນປະເສີດ