ມອບລະບົບນໍ້າລິນ ໃຫ້ປະຊາຊົນຢູ່ທີ່ບ້ານກະຫຼ້າຍ

486

ໃນຕອນເຊົ້າຂອງວັນທີ 21 ພຶດສະພາ 2020 ນີ້ ທ່ານ ຄໍາຜຸຍ ສີບຸນເຮືອງ ເຈົ້າເມືອງ ວິລະບູລີ, ທ່ານ ວິຣະພອນ ວິລະຈິດ ຫົວໜ້າສາຍງານ ພັດທະນາຊຸມຊົນ ພະແນກພົວພັນທ້ອງຖິ່ນ ແລະ ຜູ້ມີສ່ວນຮ່ວມ ບໍລິສັດລ້ານຊ້າງ ມີເນໂຣນສ໌ ລິມິເຕັດ ພ້ອມດ້ວຍຄະນະປະກອບມີ : ຕາງໜ້າຈາກຫ້ອງການ ສາທາລະນະສຸກເມືອງ, ຫ້ອງວ່າການເມືອງ, ຫ້ອງການສຶກສາທິການ ແລະ ກິລາ, ຫ້ອງການແຜນການ ແລະ ການລົງທຶນ, ຫ້ອງການໂຍທາທິການ ແລະ ຂົນສົ່ງເມືອງ ແລະ ກຸ່ມບ້ານທີ 10 ເຂດຈຸດສຸມອ່າງຄໍາ, ໄດ້ພ້ອມກັນໄປມອບລະບົບນໍ້າລິນ ໃຫ້ອໍານາດການປົກຄອງ ແລະ ປະຊາຊົນຢູ່ທີ່ບ້ານກະຫຼ້າຍ ເມືອງ ວິລະບູລີ ພາຍຫຼັງທີ່ໄດ້ກໍ່ສ້າງ ແລະ ສ້ອມແປງສໍາເລັດແລ້ວ.


ທ່ານ ດຣ ຈັນທະວົງ ພວງວິຈິດ ຮອງຫົວໜ້າຫ້ອງການສາທາລະນະສຸກເມືອງ ວິລະບູລີ ໃນນາມເຈົ້າຂອງໂຄງການກໍ່ໄດ້ລາຍງານໃຫ້ຮູ້ວ່າ : ການກໍ່ສ້າງ ແລະ ສ້ອມແປງລະບົບນໍ້າລິນຂອງບ້ານກະຫຼ້າຍ ແມ່ນໄດ້ລົງມືຈັດຕັ້ງປະຕິບັດມາແຕ່ກາງເດືອນເມສາ ເປັນຕົ້ນມາ ແລະ ສໍາເລັດໃນວັນທີ 15 ພຶດສະພາ 2020 ນີ້ ໂດຍແມ່ນບໍລິສັດ ຊະນະສິດທິກໍ່ສ້າງ ເປັນຜູ້ຮັບເໝົາກໍ່ສ້າງ ແລະ ສ້ອມແປງ ໃນມູນຄ່າທັງໝົດ 19.272 ໂດລາສະຫະລັດ ເຊິ່ງແມ່ນທຶນສະໜັບໜູນ ຂອງບໍລິສັດລ້ານຊ້າງ ມີເນໂຣນສ໌ ລິມິເຕັດ. ເຊິ່ງລະບົບນໍ້າລິນດັ່ງກ່າວ ມີອ່າງເກັບນໍ້າຢູ່ຫົວງານ ເຮັດດ້ວຍເບຕົງເສີມເຫຼັກ, ມີຄວາມສູງ 1 ແມັດ, ກວ້າງ 2 ແມັດ 30, ນໍາໃຊ້ທໍ່ຢາງດໍາ ແລະ ທໍ່ພີວີຊີວາງຝັງດິນແຕ່ຫົວງານຮອດບ້ານ ມີຄວາມຍາວທັງໝົດ 1.500 ແມັດ, ປະກອບມີ 5 ອ່າງ, ໃນນັ້ນມີ 1 ອ່າງໃຫຍ່ເພື່ອພັກນໍ້າ ແຕ່ລະອ່າງມີວາວປິດເປີດໄດ້ ເພື່ອເກັບຮັກສາບໍ່ໃຫ້ນໍ້າລົ້ນອອກຈາກອ່າງໃນເວລານໍ້າເຕັມ.

ຈາກນັ້ນກໍ່ໄດ້ມີການເຊັນບົດບັນທຶກມອບ-ຮັບກັນລະຫວ່າງບໍລິສັດຜູ້ຮັບເໝົາ ມອບໃຫ້ເຈົ້າຂອງໂຄງການ ແລະ ທາງເຈົ້າຂອງໂຄງການກໍ່ຄືຫ້ອງການສາທາລະນະສຸກເມືອງ ກໍ່ໄດ້ມອບຕໍ່ໃຫ້ອໍານາດການປົກຄອງບ້ານກະຫຼ້າຍ ໄດ້ປົກປັກຮັກສາ ແລະ ນໍາໃຊ້ຕໍ່ໄປ.

ໃນຕອນທ້າຍ ທ່ານເຈົ້າເມືອງ ວິລະບູລີ ກໍ່ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນໍາຕໍ່ພິທີ ໂດຍທ່ານກໍ່ໄດ້ເນັ້ນໜັກໃຫ້ອໍານາດການປົກຄອງ ແລະ ປະຊາຊົນບ້ານກະຫຼ້າຍ ຈົ່ງໄດ້ພ້ອມກັນເອົາໃຈໃສ່ປົກປັກຮັກສາ ແລະ ນໍາໃຊ້ລະບົບນໍ້າລິນດັ່ງກ່າວໃຫ້ເກີດປະໂຫຍດສູງສຸດ, ພາຍຫຼັງມີນໍ້າລິນແລ້ວ ກໍ່ຢາກໃຫ້ແຕ່ລະຄົວເຮືອນຈົ່ງໄດ້ປູກພືດຜັກສວນຄົວຕື່ມ ເພື່ອໄວ້ກິນໃນຄອບຄົວຂອງໃຜລາວ ຖ້າເຫຼືອກິນກໍ່ຂາຍ ຫຼື ແລກປ່ຽນກັບຄອບຄົວອື່ນ ແລະ ທີ່ສໍາຄັນກໍ່ຄືການຮັກສາປ່າໄມ້ຢູ່ໃນເຂດຕົ້ນນໍ້າ ຂອງລະບົບຫົວງານຂອງນໍ້າລິນ ເພື່ອໃຫ້ມີນໍ້າຢ່າງພຽງພໍ ສະໜອງໃຫ້ກັບການນໍາໃຊ້ຂອງປະຊາຊົນ ໄດ້ຍາວນານ.

ໃນໂອກາດທີ່ໄປເຮັດວຽກໃນຄັ້ງນີ້ ທ່ານ ຄໍາຜຸຍ ສີບຸນເຮືອງ ເຈົ້າວິລະບູລີ ພ້ອມຄະນະ ກໍ່ຍັງໄດ້ນໍາເອົາລົດຈັກ ຈໍານວນ 2 ຄັນມອບໃຫ້ອໍານາດການປົກຄອງບ້ານດັ່ງກ່າວຕື່ມອີກ ເພື່ອນໍາໃຊ້ເຂົ້າໃນການ ເຄື່ອນໄຫວວຽກງານລວມຂອງຄະນະບ້ານ ໃຫ້ສະດວກຂຶ້ນຕື່ມ ໂດຍສະພາະແມ່ນການໄປຮ່ວມປະຊຸມ, ໄປພົວພັນວຽກງານຢູ່ເມືອງ ແລະ ອື່ນໆຕາມຄວາມເໝາະສົມ.