ຊົມ​ເຊີ​ຍ! ສະຫະພັນແມ່ຍິງແຂວງ ມອບຜ້າອັດປາກ 6 ພັນ​ກ​ວ່າ​ອັນໃຫ້ 8 ໂຮງຮຽນຂອງແຂວງສາລະວັນ

467

ເພື່ອເປັນການປະກອບສ່ວນໃນການຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ 19. ໃນວັນທີ 22 ພຶດສະພາ 2020ນີ້, ສະຫະພັນແມ່ຍິງແຂວງສາລະວັນ ໄດ້ນ້ຳເອົາຜ້າອັດປາກຈຳນວນ 8 ພັນກວ່າອັນໄປມອບໃຫ້ 6 ໂຮງຮຽນຂອງແຂວງສາລະວັນຄື: ໂຮງຮຽນ ມສ ສາລະວັນ ຈຳນວນ 2000 ອັນ, ມສ ເລົ່າງາມ ຈຳນວນ 1000 ອັນ, ໂຮງຮຽນ ມສ ຕຸ້ມລານ ຈຳນວນ 1000 ອັນ

ແລະ ຈະສືບຕໍ່ມອບໃຫ້ໂຮງຮຽນ ມສ ຄົງເຊໂດນ 1500 ອັນ, ມສ ລະຄອນເພັງ 1500 ອັນ ແລະ ໂຮງຮຽນ ມສ ສະໜ້ວຍ 1000 ອັນ, ຜ້າອັດປາກທີ່ນຳໄປມອບໃນຄັ້ງນີ້ມີ, ມູນຄ່າ 24 ລ້ານກວ່າກີບ, ໂດຍເປັນກຽດມອບຂອງທ່ານ ນາງ ບຸນທະວີ ດວງລາສີ ຄະນະປະຈຳພັກແຂວງ ປະທານສະຫະພັນແມ່ຍິງແຂວງສາລະວັນ ແລະໃຫ້ກຽດຮັບໂດຍແມ່ນ ຫົວໜ້າອຳນວຍການຂອງແຕ່ລະໂຮງຮຽນໃນ 6 ໂຮງຮຽນ ໂດຍຊອງໜ້າພາກສ່ວນຕ່າງໆທີ່ກ່ຽວຂ້ອງ ແລະຄູອາຈານ, ເຊິ່ງໃນໄລຍະຜ່ານມາສະຫະພັນແມ່ຍິງແຂວງຍັງໄດ້ປະກອບສ່ວນມອບຜ້າອັດປາກໃຫ້ຄະນະສະເພາະກິດຂອງແຂວງ ຈຳນວນ 500 ກວ່າອັນ ແລະມອບໃຫ້ພາກສ່ວນທີ່ກ່ຽວຂ້ອງອີກຈຳນວນໜຶ່ງ.

ທ່ານ ນາງ ບຸນທະວີ ດວງລາສີ ຍັງໄດ້ກ່າວໃຫ້ຮູ້ຕື່ມອີກວ່າ: ສໍາລັບການເຄື່ອນໃຫວມອບຜ້າອັດປາກໃນຄັ້ງນີ້ ແມ່ນສະຫະພັນແມ່ຍິງແຂວງ ໄດ້ຮ່ວມກັບອົງການຈັດຕັ້ງມະຫາຊົນ ແລະພະແນກສາທາລະນະສຸກແຂວງສາລະວັນ ລົງເຄື່ອນໄຫວມອບຜ້າອັດປາກໃຫ້ນ້ອງນັກຮຽນ ໂດຍສະເພາະແມ່ນນັກຮຽນຂັ້ນປີສຸດທ້າຍ ຂັ້ນ ປ 5. ມ 4. ມ 7
ທ່ານຍັງໄດ້ກ່າວໃຫ້ຮູ້ອີກວ່າ ສຳລັບເມືອງວາປີ ແລະເມືອງຕະໂອ້ຍ ແມ່ນມອບໃຫ້ສະຫະພັນແມ່ຍິງເມືອງເປັນຜູ້ຜະລິດ ແລະແຈກຢາຍສະເພາະໃນເມືອງຂອງຕົນ ເນື່ອງຈາກທາງສະຫະພັນແມ່ຍິງແຂວງໄດ້ມີການຝຶກອົບຮົມວິຊາຕັດຫຍິບ, ພ້ອມອຸປະກອນ ແລະ ງົບປະມານຈຳນວນໜຶ່ງ

ການຜະລິດຜ້າອັດປາກນີ້ແມ່ນໄດ້ຈາກສີໄມ້ລາຍມື ຂອງອົງການຈັດຕັ້ງມະຫາຊົນ ແລະອົງການແນວລາວສ້າງຊາດແຂວງ ໂດຍຜ່ານການຂ້າເຊື້ອ ແລະ ຢັ້ງຢືນກວດກາຈາກພາກສ່ວນທີ່ກ່ຽວຂ້ອງ ກໍ່ຄືພະແນກສາທາລະນະສຸກແຂວງ, ໂຮງໜໍແຂວງ ເພື່ອຄວາມຖືກຕ້ອງ ແລະປອດໄພ, ການຜະລິດຜ້າອັດປາກດັ່ງກ່າວນີ້ແມ່ນໄດ້ຮັບການສະໜັບສະໜູນຈາກພາກສວ່ນຕ່າງໆເປັນຕົ້ນ : ອົງການປົກຄອງແຂວງ, ສູນກາງສະຫະພັນແມ່ຍິງລາວ, ພະແນກກະສິກຳແລະປ່າໄມ້ແຂວງ, ພະແນກອຸດສາພະກຳການຄ້າ ແລະສະມາຊິກສະພາແມ່ຍິງແຂວງສາລະວັນ.

ໂດຍ: ທິດລານີ ໂຄດໂຍທາ