ກອງປະຊຸມໃຫ່ຍຄັ້ງທີ V ຄະນະພັກຮາກຖານພະແນກ ຍທຂ ແຂວງຫຼວງນໍ້າທາ.

721
ຕອນເຊົ້າວັນທີ 22 ພຶດສະພາ 2020 ຢູ່ທີ່ສະໂມສອນແຂວງຫຼວງນໍ້າທາ ໄດ້ຈັດກອງປະຊຸມໃຫ່ຍຄັ້ງທີ່ V ຂອງຄະນະພັກຮາກຖານພະແນກໂຍທາທິການ ແລະ ຂົນສົ່ງແຂວງຫຼວງນໍ້າທາ ໂດຍການເປັນປະທານຂອງ ສະຫາຍ ຄໍາລາ ຂານສະຫງ່າ ຮອງເລຂາຄະນະພັກຮາກຖານ, ຫົວໜ້າພະແນກ ໂຍທາທິການ ແລະ ຂົນສົ່ງແຂວງ, ໃຫ້ກຽດເຂົ້າຮ່ວມໂດຍສະຫາຍ ຄໍາໄຫຼ ສີປະເສີດ ກຳມະການປະຈໍາພັກແຂວງ, ຮອງເຈົ້າແຂວງໆຫຼວງນໍ້າທາ, ມີ 3 ອົງການຈັດຕັ້ງພັກ, ແຂກຖຶກເຊີນ, ຕະຫຼອດຮອດສະມາຊີກພັກພາຍໃນຮາກຖານເຂົ້າຮ່ວມ.
 
ສະຫາຍ ຄໍາລາ ຂານສະຫງ່າ ຮອງເລຂາຄະນະພັກຮາກຖານ ໄດ້ຜ່ານຮ່າງບົດລາຍງານການເມືອງ ຕໍ່ກອງປະຊຸມໃຫ່ຍຄັ້ງທີ່ V ຂອງຄະນະພັກຮາກຖານພະແນກໂຍທາທິການ ແລະ ຂົນສົ່ງແຂວງ (2014 – 2019) ແລະ ທິດທາງແຜນການແຕ່ປີ 2020 – 2025. ຄະນະພັກຮາກຖານພະແນກໂຍທາທິການ ແລະ ຂົນສົ່ງແຂວງ, ປະກອບມີ ຄະນະພັກຮາກຖານ 5 ສະຫາຍ, ຊີ້ນໍານໍາພາ 4 ໜ່ວຍພັກທີ່ຂື້ນກັບຄື: ໜ່ວຍພັກບໍລິຫານ, ໜ່ວຍພັກວິຊາການ, ໜ່ວຍພັກລັດວິສາຫະກິດນໍ້າປະປາ ແລະ ຄຸ້ມຄອງສະໜາມບີນ ມີສະມາຊີກພັກທັງໜົດ 120 ສະຫາຍ, ຍິງ 24 ສະຫາຍ.
ຕະຫລອດໄລຍະ 5 ປີຜ່ານມາ ຄະນະພັກຮາກຖານໄດ້ຊີ້ນຳໆພາບັນດາຫນ່ວຍພັກຢ່າງເອົາໃຈໃສ່ ເພື່ອກໍ່ສ້າງຫນ່ວຍພັກປອດໃສເຂັ້ມແຂງ ຫນັກແຫນ້ນ, ໄດ້ເຄື່ອນໄຫວຢ່າງຕໍ່ເນື່ອງສາມາດຈັດປະເພດສະ ມາຊິກ ແລະ ໄດ້ຮັບໃບຢັ້ງຢືນຫນ່ວຍພັກປອດໃສ ເຂັ້ມແຂງ ຫນັກແຫນ້ນ ໄດ້ 4 ຫນ່ວຍ. ໄດ້ເອົາໃຈໃສ່ປະຕິບັດນະໂຍບາຍຕໍ່ພະນັກງານ, ໄດ້ຈັດຕັ້ງຕັ້ງກອງທຶນຊ່ວຍເຫລືອເຊິ່ງກັນ ແລະ ກັນ ເພື່ອແກ້ໄຂໃນເວລາຈຳເປັນມີກອງທຶນທັງຫມົດ 19 ລ້ານກວ່າກີບ. ໄດ້ສູມໃສ່ວຽກງານກໍ່ສ້າງ-ບູລະນະຮັກສາ ແລະ ສ້ອມແປງເສັ້ນທາງທີ່ມີຢ່າງຕໍ່ເນື່ອງ, ສໍາເລັດໂຄງການສ້ອມແປງທາງຫລວງແຫ່ງຊາດ, ໂຄງການຟື້ນຟູຂົວເບຕົງເສີມເຫລັກຂ້າມນໍ້າທຸງບ້ານຕີນຕົກ, ໂຄງການສ້າງພື້ນຖານໂຄງລ່າງຊົນນະບົດໄລຍະ 6, ໂຄງການສ້ອມແປງທາງແບບເປັນເປັນກຳນົດທາງຫລວງຂອງແຂວງ, ທາງຊົນນະບົດ ແລະ ທາງເທດສະບານເມືອງ, ໄດ້ແກ້ໄຂວຽກສຸກເສີນ ໄພພິບັດທີ່ເກີດຂື້ນໃນຊ່ວງລະດູຝົນຕາມເສັ້ນທາງຫລວງແຫ່ງຊາດ, ເສັ້ນທາງຫລວງຂອງແຂວງຈຳນວນຫນຶ່ງ ເຮັດໃຫ້ການສັນຈອນຕາມເສັ້ນທາງຫລວງສາມາດທຽວໄດ້ຕະຫລອດປີ. ວຽກງານຂົນສົ່ງທາງອາກາດ ໄດ້ເອົາໃຈໃສ່ຕິດຕາມກວດກາລານແລ່ນ, ລານຂັບເຄື່ອນ ແລະ ລານຈອດ ໃຫ້ບັນດາສາຍການບິນທີ່ມານຳໃຊ້ສະຫນາມບິນໃຫ້ມີຄວາມປອດໄພ.
ວຽກງານນໍ້າປະປາ ໄດ້ສຸມໃສ່ລະດົມທຶນມາກໍ່ສ້າງເພື່ອຂະຫຍາຍຕາຫນ່າງນໍ້າປະປາເພື່ອຮອງຮັບ ແລະ ຕອບສະຫນອງນໍ້າດື່ມນໍ້າໃຊ້ໃຫ້ແກ່ສັງຄົມຢ່າງພຽງພໍ ເຊິ່ງໄດ້ສະແດງອອກ ສຳເລັດໂຄງການກໍ່ສ້າງນໍ້າປະປາ ແລະ ສຸຂະບານ ຢູ່ເມືອງລອງ ແລະ ເມືອງຫລວງນໍ້າທາ. ສຳລັບທິດທາງແຜນການໃນຕໍ່ຫນ້າ ສືບຕໍ່ເພີ່ມທະວີວຽກງານຕິດຕາມກວດກາ, ສູ້ຊົນສ້າງຫນ່ວຍພັກ ປອດໃສ ເຂັ້ມແຂງ ຫນັກແຫນ້ນ ແລະ ຂະຫຍາຍມະຫາຊົນກ້າວຫນ້າເຂົ້າພັກສຳຮອງໃຫ້ໄດ້ 10 ສະຫາຍ. ວຽກງານວິຊາສະເພາະແມ່ນຈະສືບຕໍ່ເອົາໃຈໃສ່ຕິດຕາມບັນດາໂຄງການກໍ່ສ້າງເສັ້ນທາງ, ການຂົນສົ່ງທາງບົກ-ທາງອາກາດ ແລະ ນໍ້າປະປາ, ເພື່ອຕອບສະຫນອງກັບຄວາມຮຽກຮ້ອງຕ້ອງການຂອງສັງຄົມໄດ້ຢ່າງພຽງພໍ ແລະ ປອດໄພ.
ກອງປະຊຸມກໍ່ໄດ້ປ່ອນບັດຄັດເລືອກເອົາຄະນະພັກຮາກຖານຊຸດໃຫມ່ ເຊິ່ງມີຜູ້ສະຫມັກ 8 ສະຫາຍ ປ່ອນເອົາ 5 ສະຫາຍ ກອງປະຊຸມໄດ້ເອກະພາບປ່ອນບັດເລື່ອກເອົາ ສະຫາຍ ຄໍາລາ ຂານສະຫງ່າ ເປັນເລຂາພັກຮາກຖານພະແນກໂຍທາທິການ ແລະ ຂົນສົ່ງ ຊຸດໃໜ່, ສະຫາຍ ບຸນທັນ ຈໍາປາ ເປັນຮອງ ເລຂາຄະນະພັກຮາກຖານ ທັງເປັນປະທານກວດກາ, ພ້ອມດ້ວຍຄະນະ 3 ສະຫາຍ, ເພື່ອຊີ້ນຳໆພາວຽກງານໃນຕໍ່ຫນ້າ. ຈາກນັ້ນກໍ່ໄດ້ປ່ອນເອົາຜູ້ແທນສົມບຸນ-ສຳຮອງ ເພື່ອເຂົ້າຮ່ວມກອງປະຊຸມອົງຄະນະພັກແຂວງຕື່ມອີກ.