ເຜີຍແຜ່ແຜນຍຸດທະສາດ ແລະ ວິໄສທັດຂະແໜງການເງິນໃຫ້ຊາວໜຸ່ມກະຊວງ

568

ກະຊວງການເງິນ ໄດ້ຈັດກອງປະຊຸມເຜີຍແຜ່ແຜນຍຸດທະສາດການເງິນປີ 2021-2025 ແລະ ວິໄສທັດຮອດປີ 2030 ແລະ ຮ່າງຍຸດທະສາດຂະແໜງສ່ວຍສາອາກອນປີ 2021-2025 ໃຫ້ຄະນະບໍລິຫານງານຊາວໜຸ່ມກະຊວງ, ຄະນະໜ່ວຍຊາວໜຸ່ມບັນດາກົມ ແລະ ສະມາຊິກຊາວໜຸ່ມທົ່ວກະຊວງການເງິນ.

ຈຸດປະສົງກໍ່ເພື່ອເປັນການສ້າງຂະບວນການຂໍ່ານັບຮັບຕ້ອນກອງປະຊຸມຄະນະພັກຮາກຖານກົມສ່ວຍສາອາກອນທີ່ຈະຈັດຂຶ້ນໃນມໍ່ໆນີ້, ທັງເປັນການເຮັດໃຫ້ສະມາຊິກຊາວໜຸ່ມທົ່ວກະຊວງການເງິນເຂົ້າໃຈກ່ຽວວິໄສທັດແຜນຍຸດທະສາດການເງິນປີ 2021-2025 ແລະ ວິໄສທັດຮອດປີ 2030 ແລະ ຮ່າງຍຸດທະສາດຂະແໜງສ່ວຍສາອາກອນປີ 2021-2025 ເພື່ອນຳໄປຈັດຕັ້ງປະຕິບັດຢ່າງມີປະສິດທິຜົນ.

ໃນກອງປະຊຸມດັ່ງກ່າວ, ທ່ານ ນາງ ສີຟົງ ອຸມາວົງ ຮອງຫົວໜ້າກົມນະໂຍບາຍການເງິນ ແລະ ນິຕິກຳ, ໄດ້ເຜີຍແຜ່ແຜນຍຸດທະສາດການພັດທະນາການເງິນແຫ່ງລັດໃນໄລຍະ 15 ປີຜ່ານມາ (ແຕ່ປີ 2000 ຫາ 2015 ), ວິໄສທັດຮອດປີ 2030 ແລະ ຍຸດທະສາດພັດທະນາການເງິນແຫ່ງລັດຮອດປີ 2025 ແລະ ມາດຕະການຈັດຕັ້ງປະຕິບັດ, ຕິດຕາມ, ປະເມີນຜົນ ແລະ ລາຍງານຜົນຈັດຕັ້ງປະຕິບັດ.

ນອກນັ້ນ, ຍັງໄດ້ຮັບຟັງການເຜີຍແຜ່ຮ່າງຍຸດທະສາດຂະແໜງສ່ວຍສາອາກອນປີ 2021 2025 ຈາກທ່ານ ວິເດດ ກິນນາວົງ ຫົວໜ້າພະແນກແຜນການ  ແລະ  ຮ່ວມມືອາກອນສາກົນ, ກົມສ່ວຍສາອາກອນ ກະຊວງການເງິນ ນໍາອີກດ້ວຍ.

ປັດຈຸບັນກະຊວງການເງິນ, ໄດ້ເອົາໃຈໃສ່ຕໍ່ຄະນະບໍລິຫານງານຊາວໜຸ່ມກະຊວງ ແລະ ໄດ້ສ້າງເງື່ອນໄຂອໍານວຍຄວາມສະດວກທຸກຢ່າງເຮັດໃຫ້ຊາວໜຸ່ມ, ໄວໜຸ່ມທົ່ວຂະແໜງການເງິນໃຫ້ມີຄວາມເຕີບໃຫຍ່ເຂັ້ມແຂງກ້າວຂຶ້ນຢ່າງບໍ່ຢຸດຢັ້ງ, ອັນເປັນການປະກອບສ່ວນສໍາຄັນເຂົ້າໃນການຈັດຕັ້ງປະຕິບັດໜ້າທີ່ຍຸດທະສາດຂອງຂະແໜງການເງິນນັບທັງວຽກງານພາຍໃນ, ຮ່ວມມືສາກົນ ແລະ ອື່ນໆ.

ກອງປະຊຸມດັ່ງກ່າວ ຈັດຂຶ້ນໃນວັນທີ 20 ພຶດສະພາ 2020 ທີ່ກົມສ່ວຍສາອາກອນ ໂດຍການເປັນປະທານຂອງທ່ານ ພູທະນູເພັດ ໄຊສົມບັດ ຫົວໜ້າກົມສ່ວຍສາອາກອນ, ມີທ່ານ ນາງ ສີຟົງ ອຸມາວົງ ຮອງຫົວໜ້າກົມນະໂຍບາຍການເງິນ ແລະ ນິຕິກຳ, ມີຕາງໜ້າເລຂາໜ່ວຍຊາວໜຸ່ມບັນດາກົມອ້ອມຂ້າງກະຊວງເຂົ້າຮ່ວມ.