ກອງກວດກາພາສີແຂວງສາລະວັນ ເພີ່ມທະວີຕ້ານການລັກລອບໜີພາສີທຸກຮູບແບບ

618

ຫົວໜ້າກອງກວດກາພາສີປະຈໍາແຂວງສາລະວັນ ເປີດເຜີຍວ່າ: ໄດ້ມີຫຼາຍມາດຕະການເພື່ອຕ້ານ ແລະ ສະກັດກັ້ນສິນຄ້າລັກລອບໜີພາສີທຸກຮູບແບບຢູ່ຕາມລຽບຊາຍແດນຂອງບັນດ່ານພາສີສາກົນ, ດ່ານພາສີທ້ອງຖິ່ນຢ່າງເປັນປະຈຳ ແລະ ປົກກະຕິ. ຂະນະທີ່, ຕົວເລກຈັດເກັບລາຍຮັບເຂົ້າງົບປະມານໃນປີ 2020 ສະເພາະກອງກວດກາພາສີປະຈຳແຂວງສາລະວັນໄດ້ຮັບຕົວເລກແຜນການ 8,5 ຕື້ກວ່າກີບ.

ທ່ານ ແສງເພັດ ສີສຸລາດ ຫົວໜ້າກອງກວດກາພາສີປະຈຳແຂວງສາລະວັນ ໃຫ້ຮູ້ວ່າ: ສຳລັບປີ 2020 ວຽກງານຂະແໜງພາສີທົ່ວແຂວງສາລະວັນໄດ້ຮັບຕົວເລກແຜນການທັງໝົດ 67 ຕື້ກວ່າກີບ.ໃນນັ້ນ, ສະເພາະກອງກວດກາພາສີປະຈຳແຂວງສາລະວັນໄດ້ຮັບຕົວເລກແຜນການ 8,5 ຕື້ກວ່າກີບ; ດ່ານພາສີສາກົນລະໄລ 57 ຕື້ກວ່າກັບ ແລະ ດ່ານພາສີທ້ອງຖິ່ນປາກຕາພານ 1,5 ຕື້ກວ່າກີບ.

ສະນັ້ນ, ເພື່ອເຮັດໃຫ້ບັນລຸຕາມແຜນການໄດ້ມີມາດຕະການຫຼາຍຢ່າງເປັນຕົ້ນ: ເລັງໃສ່ການສຶກສາອົບຮົມໃຫ້ສະມາຊິກພັກພະນັກງານເຊື່ອມຊືມບັນດາແນວທາງນະໂຍບາຍຂອງພັກ, ກຳແໜ້ນລະບຽບກົດໝາຍຂອງລັດ, ເອົາໃຈ ໃສ່ຄົ້ນຄວ້າບັນດາມະຕິຂອງພັກ, ລະບຽບກົດໝາຍຂອງລັດໃຫ້ເຂົ້າໃຈເລິກເຊິ່ງ, ເພື່ອເປັນບ່ອນອີງໃນການຈັດຕັ້ງປະຕິບັດໜ້າທີ່ໃຫ້ມີຄວາມເຂັ້ມແຂງຮອບດ້ານ, ຖືເອົາການສຳຫຼວດ-ກວດກາຕີລາຄາເປັນພື້ນຖານ, ແລກປ່ຽນບົດຮຽນເຊິ່ງກັນ ແລະ ກັນ, ຮັບປະກັນໜ້າທີ່ຮັບຜິດຊອບໃຫ້ສຳເລັດຕາມລະດັບຄາດໝາຍ.

ທ່ານກ່າວຕື່ມວ່າ: ນອກນັ້ນ, ຍັງໄດ້ເອົາໃຈໃສ່ການຈັດຕັ້ງປະຕິບັດວຽກງານວິຊາສະເພາະຂອງພະນັກງານ-ເຈົ້າໜ້າທີ່ພາສີໃນການເຄື່ອນໄຫວວິຊາສະເພາະຕາມພາລະບົດບາດສິດ ແລະ ໜ້າທີ່ຂອບເຂດກຳນົດໄວ້, ປະຕິບັດລະບຽບກົດໝາຍ ແລະ ນິຕິກຳທີ່ກ່ຽວຂ້ອງ; ຊັບຊ້ອນຈັດວາງແບ່ງຄວາມຮັບຜິດ ຊອບໃຫ້ພະນັກງານເຂົ້າໃສ່ແຕ່ລະໜ້າວຽກເພື່ອໃຫ້ແທດເໝາະກັບວຽກງານວິຊາສະເພາະຕົວຈິງຕອບສະ ໜອງຕາມຄວາມຮຽກຮ້ອງຕ້ອງການ; ສືບຕໍ່ຈັດຕັ້ງວຽກງານໂດຍຖືເອົາກົດໝາຍພາສີ ແລະ ລະບຽບການທີ່ກ່ຽວຂ້ອງເປັນບ່ອນອີງໃນການຈັດຕັ້ງປະຕິບັດວຽກງານຢ່າງເຂັ້ມງວດ.

ພ້ອມກັນນັ້ນ, ກໍ່ໄດ້ເອົາໃຈໃສ່ຕ້ານ ແລະ ສະກັດກັ້ນການລັກລອບໜີພາສີທຸກຮູບແບບຕາມເຂດຊາຍແດນ ແລະ ຈຸດອື່ນໆທີ່ເຫັນວ່າມີການລັກລອບ; ຕິດຕາມກວດກາການນຳເຂົ້າສິນຄ້າຈາກດ່ານ, ສິນຄ້າເຄື່ອນຍ້າຍທີ່ໄດ້ເສຍພາສີໃນການນຳເຂົ້າຕາມນະໂຍບາຍສົ່ງເສີມການລົງທຶນ; ປະສານສົມທົບກັບບັນດາຂະແໜງການທີ່ກ່ຽວຂ້ອງແຕ່ລະຂັ້ນເພື່ອຄວາມເປັນເອກະພາບໃນການຈັດຕັ້ງວຽກງານວິາສະເພາະໃຫ້ມີຄວາມຮັດກຸມຂຶ້ນຕື່ມ; ຕິດຕາມ-ກວດກາ ແລະ ປະເມີນຜົນບັນດາໜ້າວຽກທີ່ໄດ້ມອບໝາຍຂອງແຕ່ລະຈຸງານມີຄວາມຮັບຜິດຊອບ; ໄດ້ສະຫຼຸບລາຍງານສະພາບການຈັດຕັ້ງປະຕິບັດປະຈຳເດືອນ, ງວດ, ປີ ເພື່ອລາຍງານຂັ້ນເທິງຢ່າງເປັນປົກກະຕິ.