ສະຖານີໂດຍສານຂົນສົ່ງທາງບົກ ສະຫວັນນະເຂດ ເປີດໃຫ້ບໍລິການແລ້ວ

705

ພາຍຫຼັງທີ່ໄດ້ມີຄຳສັ່ງຂອງນາຍົກລັດຖະມົນຕີສະບັບເລກທີ 06/ນຍ ວ່າດ້ວຍການເພີ່ມທະວີມາດຕະການສະກັດກັ້ນ,ກັນການລະບາດ,ຄວບຄຸມກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ 19. ໂດຍປະຕິບັດຕາມຄຳສັ່ງດັ່ງກ່າວຢ່າງເຄັ່ງຄັດທາງບໍລິສັດສ້ອມແປງຂົນສົ່ງໂດຍສານທາງບົກແຂວງສະຫວັນນະເຂດ ກໍ່ຄືສະຖານີໂດຍສານຂົນສົ່ງທາງບົກແຂວງ ຈຶ່ງໄດ້ປິດການໃຫ້ບໍລິການຂົນສົ່ງນັບແຕ່ວັນທີ 1 ເມສາ 2020 ເປັນຕົ້ນມາ.

ແຕ່ພາຍຫຼັງທີ່ໄດ້ມີແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີສະບັບເລກທີ 580 ເລື່ອງການສືບຕໍ່ປະຕິບັດບັນດາມາດຕະການຜ່ອນຜັນ ແລະ ມາດຕະການປ້ອງກັນ,ຄວບຄຸມ,ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ 19 ໃນໄລຍະແຕ່ວັນທີ 18 ພຶດສະພາ ຫາ ວັນທີ 1 ມີຖຸນາ 2020 ທາງບໍລິສັດຂົນສົ່ງກໍ່ໄດ້ເລີ່ມທົດລອງເປີດໃຫ້ບໍລິການຂົນສົ່ງສະເພາະໂດຍສານພາຍໃນປະເທດນັບແຕ່ວັນທີ 18 ພຶດສະພາ ເປັນຕົ້ນມາ

ແຕ່ທາງສະຖານີຂົນສົ່ງກໍ່ໄດ້ປະຕິບັດຕາມມາດຕະການປ້ອງກັນພະຍາດໂຄວິດ 19 ຢ່າງເຂັ້ມງວດໂດຍສະເພາະແມ່ນຜູ້ໂດຍສານທຸກຄົນທີ່ມາໃຊ້ບໍລິການ ທາງພະນັກງານຂອງສະຖານີຈະໄດ້ມີການຈົດບັນທຶກຊື່,ທີ່ຢູ່ ແລະ ຈຸດທີ່ຜູ້ໂດຍສານຈະເດີນທາງໄປຢ່າງລະອຽດ,ແນະນຳວິທີການປ້ອງກັນ,ການຮັກສາໄລຍະຫ່າງ 1 ແມັດຂຶ້ນໄປ,ໃສ່ຜ້າອັດປາກ,ໃຊ້ເຈວລ້າງມື,ມີການກວດວັດແທກອຸນຫະພູມຜູ້ໂດຍສານລວມທັງໂຊເຟີລົດ ແລະ ແອັດລົດທຸກຄົນກ່ອນອອກເດີທາງແຕ່ລະຄັ້ງ ພ້ອມນີ້ຍັງໄດ້ມີການຮັກສາໄລຍະຫ່າງພາຍໃນລົດໂດຍສານ ສຳລັບໂດຍສານຂະໜາດ 45 ບ່ອນນັ່ງແມ່ນໃຫ້ເຫຼືອພຽງ 22 ບ່ອນນັ່ງເທົ່ານັ້ນ ເພື່ອຮັບປະກັນຄວາມປອດໄພບໍ່ໃຫ້ມີການລະບາດຂອງພະຍາດໂຄວິດ 19. ສຳລັບລົດໂດຍສານແຕ່ລະສາຍແມ່ນຍັງແລ່ນໃນເວລາປົກກະຕິ ແລະ ໃນລາຄາກໍ່ປົກກະຕິຄືເກົ່າ.

ທັງໝົດນີ້ແມ່ນການໃຫ້ສຳພາດຂອງທ່ານ ສາຍຄຳ ຫຼວງຊະລາດ ຫົວໜ້າສະຖານີລົດໂດຍສານແຂວງສະຫວັນນະເຂດ
ພາບ – ຂ່າວ: ອັກສອນສິນ ພົມມະຈັນ