ເປີດຂະບວນການໃຫ້ວັກຊີນກັນມະເຮັງປາກມົດລູກພາຍໃນເມືອງພີນ

541

ເພື່ອເປັນການປ້ອງກັນພະຍາດມະເຮັງປາກມົດລູກບໍ່ໃຫ້ເກີດກັບເດັກນ້ອຍແມ່ຍິງທົ່ວປະເທດເວົ້າລວມເວົ້າສະເພາະກໍ່ຄືເດັກນ້ອຍພາຍໃນເມືອງພີນ ດັ່ງນັ້ນ ມາໃນຕອນເຊົ້າຂອງວັນທີ 20 ພຶດສະພາ 2020 ຢູ່ທີ່ໂຮງຮຽນມັດທະຍົມສົມບູນພີນໄດ້ມີການຈັດພິທີເປີດຂະບວນການໃຫ້ວັກຊີນກັນມະເຮັງປາກມົດລູກຂື້ນ ໂດຍການໃຫ້ກຽດເປັນປະທານຂອງ ທ່ານ ສາລີ ວິນລາວັນ ເລຂາພັກເມືອງ ເຈົ້າເມືອງພີນ, ທ່ານ ຄຳກອງ ທູນສົມບັດ ກໍາມະການພັກເມືອງ ຫົວໜ້າຫ້ອງການສຶກສາທິການ ແລະກິລາເມືອງພີນ, ທ່ານ ສົມພັນ ໄຊຍະສານ ຜູ້ອໍານວຍການ ມສ ພີນ, ມີຫົວໜ້າ – ຮອງຫົວໜ້າຫ້ອງການ ແລະ ພະນັກງານວິຊາສະເພາະທີ່ກ່ຽວຂ້ອງເຂົ້າຮ່ວມ.


ມະເຮັງປາກມົດລູກເປັນສາເຫດຫຼັກຂອງການເປັນມະເຮັງໃນແມ່ຍິງຢູ່ ສປປລາວ ແມ່ຍິງລາວປະມານ 320 ຄົນເປັນມະເຮັງປາກມົດລູກໃນແຕ່ລະປີ ແລະ ຫຼາຍກວ່າເຄີ່ງໜຶ່ງແມ່ນເສຍຊີວິດ

ເຊື້ອໄວຣັສທີ່ເອີ້ນ human papillomavirus (HPV) ເຊີ່ງມັນແຜ່ເຊື້ອຜ່ານກິດຈະກໍາທາງເພດສາມາດເຮັດໃຫ້ເປັນມະເຮັງປາກມົດລູກ, HPV ແມ່ນພົບເຫັນເລື້ອຍ ແລະແມ່ຍິງສ່ວນຫຼາຍຕິດເຊື້ອ HPV ການຕິດເຊື້ອ HPV ບາງຊະນິດ ຈະຢູ່ຄ້າງດົນຫຼາຍປີ ແລະພັດທະນາໄປເປັນມະເຮັງປາກມົດລູກ.

ສປປ ລາວ ໄດ້ດໍາເນີນໂຄງການສາທິດການໃຫ້ວັກຊີນ HPV ທີ່ປະສົບຜົນສໍາເລັດເປັນຢ່າງດີແຕ່ປີ 2013-2015 ໂດຍໄດ້ໃຫ້ວັກຊີນ HPVແກ່ເດັກນ້ອຍຜູ້ຍິງເກືອບ 15.000 ຄົນ ຢູ່ນະຄອນຫຼວງວຽງຈັນ ແລະ ແຂວງວຽງຈັນ ສາມາດປົກຄຸມໄດ້ເຖິງ 94% ແລະ 97% ຕາມລໍາດັບໂດຍບໍ່ມີການລາຍງານເຫດການປະຕິປັກພາຍຫຼັງການໃຫ້ວັກຊີນ(ຫປພຊ)ທີ່ຮຸ່ນແຮງ. ວັກຊີນ HPV ແມ່ນຈະໃຫ້ບໍລິການທົ່ວປະເທດລາວໃນປີ 2020,ເດັກນ້ອຍຜູ້ຍິງທີ່ມີອາຍຸ 10-14 ປີ ໃນປີ 2020 ຈະໄດ້ຮັບວັກຊີນ HPV ເຂັມທີ1, ໃນປີ 2021 ເດັກນ້ອຍຜູ້ຍິງທີ່ມີອາຍຸ 10-14 ປີ ໃນປີ 2020 ຈະໄດ້ຮັບວັກຊີນ HPV ເຂັມທີ2 ແລະເດັກນ້ອຍຜູ້ຍິງທີ່ມີອາຍຸ 10 ປີ ໃນປີ 2021 ຈະໄດ້ຮັບວັກຊີນ HPV ໃນເຂັມທີ1. ຕັ້ງແຕ່ 2022 ໄປໜ້າຈະມີແຕ່ເດັກນ້ອຍຜູ້ຍິງທີ່ມີອາຍຸ 10 ປີ ທີ່ຈະໄດ້ຮັບວັກຊີນ HPV