ຮອງລັດຖະມົນຕີ ກະຊວງການເງິນ ຕ້ອນຮັບເອກອັກຄະລັດຖະທູດເກົາຫຼີ ປະຈໍາລາວ

518

ທ່ານ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນໄດ້ຕ້ອນຮັບການຢ້ຽມຂໍ່ານັບຂອງທ່ານ ຊິນ ຊອງ ຊຸນ (Shin Sung-soon) ເອກອັກຄະລັດຖະທູດ ສ. ເກົາຫຼີ ປະຈໍາ ສປປ ລາວ. ໃນການຢ້ຽມຢາມຄັ້ງນີ້ ໄດ້ປຶກສາຫາລືກ່ຽວກັບການສະເໜີໃຫ້ການຊ່ວຍເຫຼືອຂອງ ສ. ເກົາຫຼີ ໃຫ້ແກ່ ສປປ ລາວ ໂດຍຜ່ານກອງທຶນຮ່ວມມືເພື່ອການພັດທະນາເສດຖະກິດ (EDCF) ໃນວຽກງານການຕອບໂຕ້ປ້ອງກັນ ແລະ ຄວບຄຸມການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (COVID-19).

ພ້ອມນີ້ທ່ານ ຮອງລັດຖະມົນຕີກະຊວງການເງິນໄດ້ແຈ້ງໃຫ້ຝ່າຍ ສ. ເກົາຫຼີ ຊາບວ່າສປປ ລາວ ໄດ້ເຫັນເຖິງຄວາມສໍາຄັນໃນການວາງແຜນຮັບມືກັບການແຜ່ລະບາດຂອງພະຍາດ COVID-19 ທັງໃນໄລຍະສັ້ນ ແລະ ຍາວຊຶ່ງກະຊວງການເງິນກໍ່ໄດ້ປຶກສາຫາລືແລກປ່ຽນກັບທະນາຄານໂລກກອງທຶນການເງິນສາກົນ,ອາຊຽນອາຊຽນ+3 ແລະ ບັນດາປະເທດຄູ່ຮ່ວມພັດທະນາກ່ຽວກັບມາດຕະການ ແລະ ຄວາມອາດສາມາດໃນການຊ່ວຍເຫຼືອ.

ສໍາລັບທຶນຂອງ EDCF ທີ່ຈະສະໜອງໃຫ້ສປປ ລາວ ໃນວຽກງານຕ້ານ COVID-19 ກະຊວງການເງິນ ຈະປະສານສົມທົບກັບກະຊວງສາທາລະນະສຸກເພື່ອແຈ້ງຕອບ EDCF, ສ່ວນບັນດາໂຄງການທີ່ຈະນໍາໃຊ້ທຶນກູ້ຢືມເງື່ອນໄຂຜ່ອນຜັນຈາກ EDCF ໄລຍະປີ 2020-2023 ມູນຄ່າ 500 ລ້ານໂດລາສະຫະລັດ ອາດຈະມີການຄົ້ນຄວ້າຄືນໃໝ່ໃຫ້ແທດເໝາະກັບຄວາມຕ້ອງການຂອງເສດຖະກິດຫຼັງຜົນກະທົບ COVID-19.