ແຕ່ງຕັ້ງ ທ່ານ ໜານມອນ ແກ້ວສິງໄຊ ເປັນຮອງເຈົ້າເມືອງໆສິງ ແຂວງຫຼວງນໍ້າທາ.

666

ວັນທີ 18 ພຶດສະພາ 2020 ຢູ່ທີ່ສະໂມສອນເມືອງສິງ ແຂວງຫຼວງນໍ້າທາ ໄດ້ຈັດພິທີມອບ-ຮັບໜ້າທີ່ຮອງເລຂາພັກເມືອງ-ຮອງເຈົ້າເມືອງໆສິງ ລະຫວ່າງຜູ້ເກົ່າ ແລະ ຜູ້ໃໝ່ ໂດຍການເຂົ້າຮ່ວມຂອງທ່ານ ຄຳຟອງ ອິນມະນີ ຫົວໜ້າອົງການກວດກາລັດຂັ້ນແຂວງ, ທ່ານ ປອ. ຈັນພິພັກ ກອງຈຳປາ ເຈົ້າເມືອງໆສິງ, ມີຄະນະປະຈໍາພັກເມືອງ, ຫົວໜ້າຫ້ອງການ, ສອງກອງບັນຊາການ, ດ່ານພາສີປາງໄຮ ແລະ ວິສາຫະກິດພາຍໃນເມືອງສິງເຂົ້າຮ່ວມ.

ໂອກາດນີ້, ທ່ານ ຈັນຖະໜອມ ຂັນທະລາດ ຮອງຫົວໜ້າຄະນະຈັດຕັ້ງແຂວງໄດ້ຂຶ້ນຜ່ານຂໍ້ຕົກລົງ ສະບັບ ເລກທີ 253/ຈຂ, ລົງວັນທີ 07 ພຶດສະພາ 2020 ວ່າດ້ວຍການຍົກຍ້າຍພະນັກງານໄປຮັບໜ້າທີ່ໃໝ່ ເຊິ່ງຕົກລົງແຕ່ງຕັ້ງ ທ່ານ ໜານມອນ ແກ້ວສິງໄຊ ຫົວໜ້າຄະນະຈັດຕັ້ງເມືອງສິງ, ຮັບໜ້າທີ່ເປັນຮອງເຈົ້າເມືອງ ແລະ ຍົກຍ້າຍ ທ່ານ ບຸນພວມ ສໍສຸພາບ ອະດີດຮອງເຈົ້າເມືອງໆສິງ ໄປປະຈໍາການຢູ່ຄະນະກວດກາພັກລັດແຂວງ.

ຈາກນັ້ນ ທ່ານ ຄຳຟອງ ອິນມະນີ ຫົວໜ້າອົງການກວດກາລັດຂັ້ນແຂວງ ໄດ້ມີຄຳເຫັນໂອ້ລົມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານຂອງທ່ານ ບຸນພວມ ສໍສຸພາບ ອະດີດຮອງເລຂາພັກເມືອງ, ຮອງເຈົ້າເມືອງໆສິງທີ່ປະຕິບັດສຳເລັດໃນໄລຍະຜ່ານມາ ແລະ ທ່ານຍັງໄດ້ເນັ້ນໜັກໃຫ້ທ່ານທີ່ຖືຍົກຍ້າຍໄປ ແລະ ທ່ານທີ່ຮັບໜ້າທີ່ໃໝ່ ໃຫ້ເອົາໃຈໃສ່ໜ້າທີ່ວຽກງານຂອງຕົນທີ່ຈະໄປຮັບໜ້າທີ່ວຽກງານ ໃໝ່ຕາມການຈັດຕັ້ງຂັ້ນເທິງມອບໝາຍໃຫ້ປະສົບຜົນສຳເລັດ.

[ຂ່າວ: ສົມສະຫວິນ, ພາບ: ທິບພະສອນ]