ກໍາມະບານແຂວງບໍ່ແກ້ວ ສະຫຼຸບວຽກງານກວດກາ ປະຈໍາປີ 2019

530
ກອງປະຊຸມສະຫຼຸບວຽກງານກວດກາພັກ – ລັດ ຂອງສະຫະພັນກຳມະບານແຂວງບໍ່ແກ້ວມີຂື້ນໃນວັນທີ 18 ພຶດສະພານີ້ ໂດຍການເປັນປະທານ ຂອງສະຫາຍ ສຸທິດ ມິດສະພັນ ເລຂາໜ່ວຍພັກ ປະທານສະຫະພັນກຳມະບານແຂວງ, ເຂົ້າຮ່ວມມີ ສະຫາຍ ສິນໄຊ ສິລິປັນຍາ ຮອງປະທານກວດກາພັກ-ລັດແຂວງ, ມີສະມາຊິກພັກ ພະນັກງານລັດຖະກອນເຂົ້າຮ່ວມ.
ສະຫາຍ ສົມພອນ ໄຊວິທູນ ຮອງປະທານສະຫະພັນກຳມະບານແຂວງ ໄດ້ຂື້ນຜ່ານຮ່າງບົດສະຫຼຸບ ວຽກງານກວດກາ ພັກ – ລັດໃນການຈັດຕັ້ງປະຕິບັດຕະຫຼຸດໄລຍະ 1 ປີຜ່ານມາ ເຊິ່ງສາມາດຍາດໄດ້ຜົນງານອັນຜົນເດັ່ນຫຼາຍດ້ານ ເປັນຕົ້ນ ວຽງານການຄົ້ນຄ້ວາເຊື່ອມຊຶມ, ບັນດາມະຕິຄຳສັງຂອງພັກ ແລະ ນິຕິກຳຕ່າງໆຂອງວຽງານກວດກາພັກ – ລັດ ໂດຍສະເພາະແມ່ນການຕິດຕາມວຽກງານກວດກາ ການຄຸ້ມຄອງພະນັກງານ, ການຂະຫຍາຍສະມາຊິກກຳມະບານ, ການກວດກາວຽກງານເສດຖະກິດ, ການເງິນ, ການຄຸ້ມຄອງການນຳໃຊ້ວັດຖຸອຸປະກອນ ຊັບສິນຂອງກຳມະບານ, ການກວດກາການປົກປ້ອງສິດຜົນປະໂຫຍດຂອງສະມາຊິກກຳມະບານ, ການຄຸ້ມຄອງການນຳໃຊ້ແຮງງານ, ການຍົກຍ້າຍຂອງສະມະຊິກກຳມະບານ ແລະ ພະນັງານລັດຖະກອນ.
ພ້ອມທັງວ່າງຄາດໝາຍສູ້ຊົນ ເພື່ອສ້າງຄວາມຮັບຮູ້ເຂົ້າໃຈຢ່າເລິກເຊິ່ງຕໍ່ວຽກງານກວດກາ ຕາມທັກສະນະຂອງພັກ ຕາມທັດສະນະທີ່ວ່າວຽກງານຕິດຕາມ ກວດກາແມ່ນຄວາມຈຳຫຼັກການນຳພາຂອງພັກ ແລະ ການຄຸ້ມຄອງຂອງລັດ ແມ່ນຄວາມຮັບຜິດຊອບ ທັງເປັນວຽກງານປົກກະຕິຂອງວຽກງານຈັດຕັ້ງ ແລະ ພະນັງານນຳພາຄຸ້ມຄອງ ທຸກຂັ້ນ ພ້ອມກັນນັ້ນ ຈະຕ້ອງຮັບຮູ້ ແລະ ເຂົ້າໃຈຈະແຈ້ງ ແລະ ໄພອັນຕະລາຍຂອງພະຍາດ ອາດຍາສິດ ເອກະຊົນ ແລະ ການສໍລາດບັງຫຼວງເພື່ອເປັນການສືບຕໍ່ແຜນເຮັດວຽກວິທີການກວດກາໃຫ້ຖຶກຕ້ອງຕາມຫຼັກການ, ການກວດກາຕ້ອງຮັບປະກັນໃຫ້ຖຶກຕ້ອງ ແລະ ຊັດເຈນ, ພາວະວິໄສ, ຍຸຕິທຳທັນການ ກວດກາແລ້ວ ແລະ ຈະຕ້ອງສະຫຼຸບລາຍງານຕໍ່ຂັ້ນເທິງ ເພື່ອແກ້ໄຂໃຫ້ທັນການ ແລະ ເຂັ້ມງວດຖືກຕ້ອງຕາມກົດລະບຽບຂອງພັກ – ກົດໝາຍຂອງລັດທີໄດ້ກຳນົດໄວ້.
ກອງປະຊຸມ ຍັງໄດ້ເຊື່ອມຊຶມເອກະສານບົດໂອ້ລົມຂອງທ່ານເຈົ້າແຂວງ ແຂວງບໍ່ແກ້ວ ຕໍ່ກອງປະຊຸມວຽກງານກວດກາທົ່ວແຂວງ, ບົດແນະນຳການຈັດຕັ້ງປະຕິບັດກົດລະບຽບຂອງພັກ ສະໄໝທີ 10 ກ່ຽວກັບວຽກງານຕິດຕາມກວດກາຂອງຄະນະພັກ ແລະ ຄະນະກວດກາ ແຕ່ລະຂັ້ນ ຜ່ານຂໍ້ກຳນົດການຮ້ອງຟ້ອງ, ຮ້ອງທຸກ ແລະ ຂໍ້ສະເໜີຂອງປະຊາຊົນບັນດາເຜົ່າເພື່ອນຳໄປປັນປຸງ ແລະ ແກ້ໄຂໃຫ້ແທດເໝາະກັບສະພາບຂອງທ້ອງຖິ່ນໃນປະຈຸບັນ.
ຂ່າວ – ພາບ: ບຸນເພັດ ໄຊຍະວົງ