ສຕລ ລົງມືກໍ່ສ້າງ ແລະ ສ້ອມແປງໂຄງລ່າງພື້ນຖານສະໜາມກິລາຈາກທຶນຊ່ວຍເຫຼືອຂອງຟີຟາ

677

ອີງຕາມຂໍ້ມູນຈາກ ສຕລ ແຈ້ງໃຫ້ຊາບວ່າ: ສຕລ ໄດ້ເລີ່ມດຳເນີນການກໍ່ສ້າງ ແລະ ສ້ອມແປງພື້ນຖານໂຄງລ່າງ ພາຍໃຕ້ໂຄງການ FIFA Forward 1.0 ຊຶ່ງແບ່ງອອກເປັນ 2 ໂຄງການຍ່ອຍຄື

ໂຄງການກໍ່ສ້າງສະໜາມຝຶກຊ້ອມແຫ່ງໃໝ່ 2 ສະໜາມ (ສະໜາມຫຍ້າແທ້) ພາຍໃນເຂດສະໜາມກິລາແຫ່ງຊາດ (ຫຼັກ 16) ທີ່ຈະນໍາໃຊ້ເຂົ້າໃນການຝຶກຊ້ອມທີມຊາດແຕ່ລະຮຸ່ນ, ສະໂມສອນສະມາຊິກຂອງ ສຕລ ແລະ ການແຂ່ງຂັນລະດັບເຍົາວະຊົນຂອງ ສຕລ ໂດຍການຮັບເໝົາກໍ່ສ້າງຂອງບໍລິສັດ ທະວີໂຊກ ກໍ່ສ້າງ ແລະ ຊ້ອມແປງເຄຫາສະຖານ.

ສ່ວນອີກໂຄງການໜຶ່ງ ແມ່ນການສ້ອມແປງອາຄານພາຍໃນ ຫ້ອງການ ສະຫະພັນບານເຕະແຫ່ງຊາດລາວ ຈໍານວນ 4 ອາຄານ ຄື: ອາຄານເຕັກນິກວິທະຍາ, ຫໍພັກຊາຍ, ຫໍພັກຍິງ ແລະ ຫ້ອງອາຫານ ໃຫ້ທັນສະໄໝຂຶ້ນກວ່າເກົ່າ ໂດຍການຮັບເໝົາກໍ່ສ້າງແມ່ນບໍລິສັດ ສີລິໄຊ ກໍ່ສ້າງ ທັງສອງໂຄງການດັ່ງກ່າວ ຄາດວ່າ ຈະສາມາດກໍ່ສ້າງສຳເລັດສົມບູນໃນເດືອນກໍລະກົດນີ້.