ມອບ – ຮັບຫນ້າທີ່ຫົວຫນ້າ ສາຂາ ລັດວິສາຫະກິດໄຟຟ້າລາວແຂວງບໍ່ແກ້ວ

739

ພິທີເຊັນບົດບັນທຶກມອບ – ຮັບຫນ້າທີ່ ລະຫວ່າງ ທ່ານ ວົງດາລາ ສີສະແຫວງສຸກ ຫົວຫນ້າສາຂາລັດວິສາຫະກິດໄຟຟ້າລາວແຂວງບໍ່ແກ້ວ (ຜູ້ເກົ່າ) ກັບ ທ່ານ ສົມພັນ ສຸວັນນະລັດ ຫົວຫນ້າສາຂາລັດວິສາຫະກິດໄຟຟ້າລາວແຂວງໄຊສົມບູນ ມາເປັນຜູ້ວ່າການຫົວຫນ້າສາຂາລັດວິສາຫະກິດໄຟຟ້າລາວແຂວງບໍ່ແກ້ວ ແມ່ນໄດ້ຈັດຂື້ນໃນວັນທີ 18 ພຶດ ສະພານີ້ ທີ່ສາຂາລັດວິສາຫະກິດໄຟຟ້າລາວແຂວງບໍ່ແກ້ວ, ໂດຍການເຂົ້າຮ່ວມຂອງທ່ານ ທອງຂັນ ພົມວິໄລ ຫົວຫນ້າກົມຈັດຕັ້ງ-ພະນັກງານ ກະຊວງພະລັງງານ ແລະ ບໍ່ແຮ່, ທ່ານ ຄໍາປະເສີດ ເທບປັນຍາ ຮອງອໍານວຍການໃຫຍ່ ລັດວິສາຫະກິດໄຟຟ້າລາວ, ມີບັນດາກົມ, ພະແນກການທີ່ກ່ຽວຂ້ອງເຂົ້າຮ່ວມ.

ທ່ານ ກຽງສັກ ປຣັກສາດທອງ ຄະນະຝ່າຍບຸກ ຄະລາກອນ ລັດວິສາຫະກິດໄຟຟ້າລາວ ໄດ້ຜ່ານມະຕິ ຂອງລັດວິສາຫະກິດໄຟຟ້າລາວ ວ່າດ້ວຍການປັບປຸງບຸກຄະລາກອນລະດັບຂັ້ນຝ່າຍ, ສາຂາແຂວງ ແລະ ຫ້ອງການໄລຍະ 2, ເຫັນດີປັບປຸງ, ຍົກຍ້າຍ ທ່ານ ວົງດາລາ ສີສະແຫວງສຸກ ຫົວຫນ້າ ສາຂາລັດວິສາຫະກິດໄຟຟ້າລາວແຂວງບໍ່ແກ້ວ ໄປຮັບຫນ້າທີ່ເປັນຮອງ ຫົວຫນ້າຄະນະຝ່າຍປະຕິບັດການໄຟຟ້າ ພາກເຫນືອ – ພາກໃຕ້. ທ່ານ ສົມພັນ ສຸວັນນະລັດ ຫົວຫນ້າ ສາຂາ ລັດວິສາຫະກິດໄຟຟ້າລາວ ແຂວງໄຊສົມບູນ ມາເປັນຜູ້ວ່າການຫົວຫນ້າ ສາຂາ ລັດວິສາຫະກິດໄຟຟ້າລາວ ແຂວງບໍ່ແກ້ວ.

ໂອກາດນີ້ ທ່ານ ທອງຂັນ ພົມວິໄລ ຫົວຫນ້າກົມຈັດຕັ້ງ-ພະນັກງານ ກະຊວງພະລັງງານ ແລະ ບໍ່ແຮ່ໄດ້ມີຄໍາເຫັນເນັ້ນຫນັກວ່າ: ການປະກາດການປັບປຸງບຸກຄະລາກອນລະດັບຂັ້ນຝ່າຍ, ສາຂາແຂວງ ແລະ ຫ້ອງການໃນຄັ້ງນີ້ແມ່ນການປັບປຸງໄລຍະທີ 2 ເພື່ອຊັບຊ້ອນພະນັກງານນໍາພາໃຫ້ສາມາດຕອບສະຫນອງຕາມຄວາມຮຽກຮ້ອງຕ້ອງການຂອງຫນ້າທີ່ວຽກງານໃນການບໍລິການຮັບໃຊ້ສັງຄົມໃນໄລຍະໃຫມ່.

ຂ່າວ: ຄໍາໄຊ ລີໄຊມົວຕູ້ – ພາບ: ນ. ແໜ່ງ