ສະຖານນີຂົນສົ່ງໂດຍສານຢູ່ແຂວງບໍ່ແກ້ວ ກັບມາເປີດໃຫ້ບໍລິການແລ້ວ

537

ບັນຍາກາດຂອງການເປີດໃຫ້ບໍລິການລົດຂົນສົ່ງໂດຍສານພາຍໃນແຂວງ ແລະ ບັນດາແຂວງຢູ່ຄິວລົດແຂວງບໍ່ແກ້ວມີຄວາມຄຶກຄື້ນ ພາຍຫຼັງທີ່ເກີດມີການລະບາດຂອງພະຍາດໂຄວິດ-19. ລັດຖະບານລາວເຮົາກໍ່ຄືແຂວງບໍ່ແກ້ວໄດ້ເພີ່ມບັນດາມາດຕະການຕ່າງໆໃນການຕິດຕາມ, ເຝົ້າລະວັງເພື່ອປ້ອງກັນ ແລະ ຄວບຄຸມການລະບາດຂອງພະຍາດດັ່ງກ່າວ. ທາງກະຊວງໂຍທາທິການ ແລະ ຂົນສົ່ງ ໄດ້ສັ່ງປິດການບໍໃຫ້ລິການຂົນສົ່ງໂດຍສານທາງບົກ, ທາງນໍ້າ, ທາງອາກາດພາຍໃນປະເທດ ແລະ ຕ່າງປະເທດ, ຄົນໃນບໍ່ໃຫ້ອອກຄົນນອກບໍ່ໃຫ້ເຂົ້າຢ່າງເດັດຂາດມາເປັນເວລາເກືອບ 2 ເດືອນ.

ສະນັ້ນ, ວັນທີ 18 ພືດສະພານີ້ ຈຶ່ງໄດ້ເປີດບໍລິການຂົນສົ່ງພາຍໃນລະຫວ່າງແຂວງ ຫາ ແຂວງ, ທາງທີມງານສື່ມວນຊົນແຂວງບໍ່ແກ້ວໄດ້ລົງຕິດຕາມເບີ່ງສະພາບຜູ້ໂດຍສານທີ່ຈະເດີນທາງໄປມາ ແລະ ການໃຫ້ບໍລິການບັນດາສະຖານີຄິວລົດຂົນສົ່ງໂດຍສານ ເຫັນວ່າຜູ້ປະກອບການແມ່ນໄດ້ເອົາໃຈໃສ່ໃນການຈັດຕັ້ງປະຕິບັດບັນດາມາດຕະການຕ່າງໆຢ່າງເຂັ້ມງວດ ເປັນຕົ້ນຈຸດບໍລິການ ເຊັ່ນວ່າ:

 

ບ່ອນນັ່ງ ຫຼື ຈຸດຢືນລໍຸຖ້າລົດ, ຕ້ອງນັ່ງບ່ອນທີ່ກຳນົດໄວ້ຮັກສາໄລຍະຫ່າງ 1 ແມັດຂຶ້ນໄປ, ຕ້ອງມີເຈວລ້າງມື ຫຼື ເຫຼົ້າຂ້າເຊື້ອ, ມີສະບູລ້າງມື, ຜູ້ໂດຍສານທຸກຄົນຕ້ອງໄດ້ຜ່ານການວັດແທກອຸນຫະພູມກ່ອນຂຶ້ນລົດ, ໃສ່ຜ້າອັດປາກ – ອັດດັງຕະຫຼອດເວລາໃນໄລຍະເດີນທາງ ແລະ ຕ້ອງອະນາໄມຂ້າເຊື້ອກ່ອນໃຫ້ບໍລິການປະຈໍາວັນ ແລະ ມາດຕະການອື່ນໆ.

ນີ້ກໍ່ເພື່ອຮັບປະກັນໃນການປ້ອງກັນ ແລະ ສະກັດກັ້ນການຕິດເຊື້ອພະຍາດໂຄວິດ 19, ທຸກຄົນໃນສັງຄົມຕ້ອງໄດ້ເປັນເຈົ້າການ ແລະ ມີຄວາມຮັບຜິດຊອບສູງໃນການປະຕິບັດມາດຕະການດັ່ງກ່າວຢ່າງເຂັ້ມງວດ.

ຂ່າວ – ພາບ: ເງິນຫຼົງ ຈິດພູວົງ