37 ມື້ປະເທດລາວບໍ່ມີຄົນຕິດໂຄວິດ19

582

ວັນທີ 19 ພຶດສະພາ 2020 ທ່ານ ຮສ. ດຣ. ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ໄດ້ກ່າວວ່າ ຈໍານວນຜູ້ເດີນທາງເຂົ້າມາ ມີທັງໝົດ 1.761 ຄົນ ໃນນັ້ນ ມີແຮງງານລາວກັບມາຈາກປະເທດໄທທັງໝົດ 6 ຄົນ ເຊິ່ງຜ່ານດ່ານວັງເຕົ່າ-ຊ່ອງເມັກ ແຂວງຈໍາປາສັກ, ເຫຼືອນັ້ນ ແມ່ນຜູ້ຂັບລົດຂົນສົ່ງສິນຄ້າ

ຈຸດຜ່ານດ່ານລາວ-ຈີນ ທັງໝົດ 8 ຄົນ, ທັງໝົດແມ່ນຜູ້ຂັບລົດຂົນສົ່ງສິນຄ້າ; ຈຸດຜ່ານດ່ານລາວ-ຫວຽດ ທັງໝົດ 584 ຄົນ, ໃນນັ້ນ ຄົນລາວ 25 ຄົນ ແມ່ນກັບມາແຕ່ວຽກລັດຖະການ ຜ່ານດ່ານນ້ຳພ້າວ, ແຂວງບໍລິຄຳໄຊ, ເຫຼືອນັ້ນ ແມ່ນຄົນຂັບລົດສົ່ງສິນຄ້າ; ຈຳນວນຜູ້ເດີນທາງຜ່ານສະໜາມບິນສາກົນວັດໄຕ 90 ຄົນ ເຊິ່ງເຂົ້າມາໃນວັນທີ 17 ພຶດສະພາ (ໃນນີ້້ ມີນັກສຶກສາລາວກັບມາຈາກອູຫັ້ນ 08 ຄົນ, ກັບຈາກ ຊູໂຈ 05 ຄົນ, ຄົນຈີນມາສ້າງທາງລົດໄຟ 77 ຄົນ, ທັງຫມົດ ແມ່ນຖືກອະນຸຍາດຈາກຄະນະສະເພາະກິດ)

ການເຝົ້າລະວັງ ແລະ ວິເຄາະໃນວັນທີ 18 ພຶດສະພາ 2020, ໄດ້ເກັບຕົວຢ່າງມາກວດທັງໝົດ 88 ຄົນ, ໃນນັ້ນ ມີກໍລະນີສົງໄສ 2 ຄົນ, ແຮງງານລາວທີ່ກັບມາແຕ່ໄທ 68 ຄົນ, ແຮງງານຫວຽດທີ່ເຂົ້າມາລາວ 18 ຄົນ. ຜົນກວດທັງໝົດຂອງມື້ວານນີ້ ບໍ່ພົບເຊື້ອ.

ໝາຍຄວາມວ່າໃນວັນທີ 18 ພຶດສະພາ 2020 ບໍ່ມີຜູ້ຕິດເຊື້ອໃໝ່. ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 18 ພຶດສະພາ 2020 ໄດ້ເກັບຕົວຢ່າງມາກວດທັງໝົດ ມີ 4.653 ຕົວຢ່າງ, ກວດພົບເຊື້ອສະສົມ 19 ຄົນ (37 ມື້ແລ້ວທີ່ບໍ່ພົບຜູ້ຕິດເຊື້ອໃໝ່) ແລະ ສະເພາະການຕິດຕາມປີ່ນປົວຄົນເຈັບຢູ່ໂຮງໝໍ ປັດຈຸບັນ, ມີຜູ້ນອນຕິດຕາມຢູ່ໂຮງໝໍມິດຕະພາບ 5 ຄົນ ຍີງ 4 ຄົນ ທັງໝົດເຫັນວ່າມີອາການປົກກະຕິ.