15 ຮ້ານກິນດື່ມຖືກກ່າວເຕືອນ ແລະ ປັບໃໝຍ້ອນຜິດ ຄຳສັ່ງ ປ້ອງກັນພະຍາດ ໂຄວິດ-19

628

ປັດຈຸບັນ ລັດຖະບານຮຽກຮ້ອງມາຍັງສັງຄົມທຸກພາກສ່ວນບໍ່ໃຫ້ນິ້ງນອນໃຈ ຕໍ່ການສືບຕໍ່ຈັດຕັ້ງປະຕິບັດວຽກງານການສະກັດກັ້ນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ເນື່ອງຈາກວ່າ ມາດຕະການໃນຄໍາສັ່ງ 06/ນຍ, ຄໍາສັ່ງແນະນໍາ ເລກທີ 08/ຈຂ ອປ ຂອງທ່ານເຈົ້າແຂວງ ແລະ ບັນດາແຈ້ງການ ນິຕິກໍາທີ່ກ່ຽວຂ້ອງກັບການປ້ອງກັນ ການແຜ່ລະບາດຂອງພະຍາດ ໂຄວິດ-19 ຢູ່ຂັ້ນເມືອງ ຜ່ານມາ ຍັງໜ້າເປັນຫວ່ງທີ່ຈະຕ້ອງສືບຕໍ່ປະຕິບັດຢ່າງເຂັ້ມງວດຂຶ້ນຕື່ມໂດຍສະເພາະ ໃນເດືອນ ພຶດສະພາ 2020 ເປັນຕົ້ນໄປ.

ທ່ານ ຂັ້ນຕີ ສີສະແຫວງສຸກ ຄະນະສະເພາະກິດ ຫ້ອງການ ຖວທ ເມືອງ ໄຊເຊດຖາ ແຂວງ ອັດຕະປື ໄດ້ລາຍງານກ່ຽວກັບສະພາບການຈັດຕັ້ງປະຕິບັດບັນດາຂໍ້ຫ້າມ ແລະ ຄຳສັ່ງ ຂອງຄະນະສະເພາະກິດຂັ້ນແຂວງ, ຂັ້ນເມືອງວາງອອກໃນໄລຍະທີ 1-2 ນັ້ນຕໍ່ທິມງານຄະນະສະເພາະກິດຂອງພະແນກ ຖວທ ແຂວງ ອັດຕະປື ໃຫ້ຮູ້ວ່

ຄະນະສະເພາະກິດກ່ຽວຂ້ອງຂັ້ນເມືອງ ໄດ້ຈັດແບ່ງຈຸດຄຸ້ມຄອງອອກເປັນ 4 ເຂດ ເຊິ່ງສຳລັບຄະນະສະເພາະກິດຂົງເຂດ ຖວທ ແມ່ນໄດ້ພ້ອມກັນຈັດຕັ້ງປະຕິບັດເປັນປົກກະຕິ ກ່ຽວກັບການສັ່ງໂຈະຊົ່ວຄາວ ບໍ່ໃຫ້ເປີດບໍລິການຮ້ານກິນດື່ມໃນທົ່ວເມືອງຂອງຕົນຢ່າງເຂັ້ມງວດ ແຕ່ໃນກໍລະນີຈັດຕັ້ງປະຕິບັດປະກົດວ່າ ຍັງມີ 15 ຮ້ານ ກິນດື່ມ ເຊິ່ງເຈົ້າໜ້າທີ່ກ່ຽວຂ້ອງໄດ້ລົງກ່າວເຕື່ອນ, ສຶກສາອົບຮົມ ແລະ ສ້າງບົດບັນທຶກ ຕາມຂັ້ນຕອນ ຕໍ່ບັນດາຫົວໜ່ວຍທຸລະກິດທີ່ຍັງບໍ່ທັນໄດ້ເຂົ້າສູ່ລະບຽບດັ່ງກ່າວ ປະ ກົດວ່າ ບໍ່ໄດ້ຮັບຜົນ ຈິ່ງໄດ້ໃຊ້ມາດຕາການເຂັ່ງຄັດ ເຊິ່ງບາງຮ້ານໄດ້ຢຶດວັດຖຸອຸປະກອນ ຈຳນວນໜຶ່ງໄວ້ ແລະ ໃຊ້ມາດຕາການປັບໃໝຕາມລະບຽບການ ລວມມີ 15 ຮ້ານ

ເລີ່ມແຕ່ວັນທີ 4 ພຶດສະພາ ເປັນຕົ້ນມາບາງຮ້ານຍັງສືບຕໍ່ປະຕິບັດຕາມລະບຽບ ມີບາງຮ້ານໄດ້ຫັນການບໍລິການ ມາເປັນຮ້ານອາຫານ ເພື່ອຜ່ອນຜັນແກ້ໄຂຊີວິດຄອບຄົວປະຈຳວັນ ໂດຍຫລີກລຽງຈາກການເປີດສຽງດັງ, ປະຕິບັດໂມງເວລາໃຫ້ເຂັ່ງຂັດ, ຮັກສາມາດຕາການທີ່ທາງຄະນະສະເພາະກິດພະແນກສາທາແຈ້ງບອກ ສິ່ງສຳຄັນແມ່ນຮັກສາໄລຍະຫ່າງແກ່ລູກຄ້າ ຫລິກລຽງການແອອັດ ໃນຮ້ານຕ້ອງໃຫ້ມີເຈວລ້າງມື ຈົນກວ່າໄດ້ຮັບຄຳສັ່ງຈາກຂັ້ນເທິງໃນໄລຍະຕໍ່ໄປ.