ນາງ ກຽງຄຳ ພົມມະຈັກ ຖຶກຄັດເລືອກເປັນປະທານກໍາມະບານຊາວໜຸ່ມແຂວງບໍ່ແກ້ວ

962

ກອງປະຊຸມໃຫ່ຍກຳມະບານຮາກຖານຊາວໜຸ່ມແຂວງ ຄັ້ງທີ່ II ໄດ້ໄຂຂຶ້ນຢາງເປັນທາງການໃນວັນທີ 14 ພຶດສະພາ 2020 ນີ້ ໂດຍການເປັນປະທານຂອງ ສະຫາຍ ອຸໄທ ສິລິປັນຍາ ປະທານກຳມະບານຮາກຖານຊາວໜຸ່ມແຂວງ, ເຂົ້າຮ່ວມໂດຍ ສະຫາຍ ສົມພອນ ໄຊວິທູນ ຮອງປະທານສະຫະພັນກຳມະບານແຂວງ, ສະຫາຍ ອຸ່ນແສງ ທູນອິນໃຈ ເລຂາຄະນະບໍລິຫານງານຊາວໜຸ່ມແຂວງ,  ມີແຂກຮັບເຊີນຕະຫຼອດຮອດສະມາຊິກກຳມະບານພາຍໃນຮາກຖານເຂົ້າຮ່ວມ.

ໃນພິທີ, ສະຫາຍ ອຸໄທ ສິລິປັນຍາ ປະທານກຳມະບານຮາກຖານຊາວໜຸ່ມແຂວງກໍ່ໄດ້ສະຫຼຸບການເຄື່ອນໄຫວຈັດຕັ້ງປະຕິບັດວຽກງານກຳມະບານອັນໄດ້ຍົກໃຫ້ເຫັນດ້ານດີຜົນງານ ແລະ ດ້ານອ່ອນຂໍ້ຄົງຄ້າງ ແລະ ບາງບົດຮຽນທີ່ຖອດຖອນໄດ້ຕະຫຼອດໄລຍະ 3 ປີຜ່ານມາ ແລະ ທິດທາງແຜນການໃນຕໍ່ໜ້າ; ເຊິ່ງກຳມະບານຮາກຖານຊາວໜຸ່ມແຂວງໄດ້ເຄື່ອນໄຫວຕາມພາລະບົດບາດຂອງຮາກຖານຢ່າງຕັ້ງໜ້າໃນການເຕົ້າໂຮມຄວາມສາມັກຄີພາຍໃນ ແລະ ພາຍນອກຢ່າງແໜ້ນແຟ້ນ ແລະ ໄດ້ຖືເອົາວຽກງານການສຶກສາອົບຮົມການເມືອງ – ແນວຄິດເປັນຫຼັກໃນການຊີ້ນຳໆພາສະມາຊິກກຳມະບານ, ໄດ້ເຊື່ອມຊືມແນວທາງນະໂຍບາຍຂອງພັກ-ລັດຢ່າງເລິກເຊິ່ງຕິດພັນກັບຂະບວນການຂໍ້ແຂ່ງຂັນ 5 ເປັນເຈົ້າ.

ຈາກນັ້ນ, ກອງປະຊຸມຍັງໄດ້ປ່ອນບັດຄັດເລືອກເອົາຄະນະກຳມະບານຮາກຖານຊຸດໃໝ່ ໂດຍຜ່ານການປອນບັດ ແລະ ດຳເນີນກອງປະຊຸມປະຖົມມະລຶກໄດ້ເອກະສັນເລືອກເອົາ ສະຫາຍ ນາງ ກຽງຄຳ ພົມມະຈັກ ເປັນປະທານ, ສະຫາຍ ສົມຫວັງ ພອນວິໄລ ແລະ ສະຫາຍ ສົມສັກ ໄຊໄລຄຳ ເປັນຮອງປະທານ ໂດຍທັງສາມສະຫາຍຈະເປັນຜູ້ສືບຕໍ່ນຳພາຄະນະປະຕິບັດວຽກງານສືບຕໍ່ໄປ.

ໂອກາດນີ້ ສະຫາຍ ສົມພອນ ໄຊວິທູນ ຮອງປະທານສະຫະພັນກຳມະບານແຂວງ ຍັງໃຫ້ກຽດໂອ້ລົມຕໍ່ກອງປະຊຸມໃຫຍ່ເພື່ອເປັນຊີ້ທິດເຍືອງທາງໃນການຈັດຕັ້ງປະຕິບັດວຽກງານກຳມະບານກໍ່ຄືພາລະບົດບາດ, ໜ້າທີ່ຂອງອົງການຈັດຕັ້ງກຳມະບານລາວໂດຍສະເພາະແມ່ນປະຕິບັດຄຳຂວັນ 5 ເປັນເຈົ້າຂອງສູນກາງສະຫະພັນກຳມະບານລາວ ວາງອອກໃຫ້ເຂັ້ມງວດ.

(ເນື້ອໃນ: ສຸວັນ)