ແຕ່ງຕັ້ງ ທ່ານ ສັງວານ ພົມມະແສງ ເປັນຜູ້ວ່າການຫົວໜ້າລັດວິສາຫະກິດໄຟຟ້າລາວ ສາຂາແຂວງສາລະວັນ.

724

ລັດວິສາຫະກິດໄຟຟ້າລາວ ສາຂາແຂວງສາລະວັນ ໄດ້ຈັດພິທີມອບ-ຮັບຕຳແໜ່ງຫົວໜ້າລັດວິສາ ຫະກິດໄຟຟ້າລາວສາຂາແຂວງສາລະວັນຄົນໃໝ່ ລະຫວ່າງ ທ່ານ ເດດສຸວັນ ມະໄລທອງ ຫົວໜ້າລັດວິສາຫະກິດໄຟຟ້າລາວສາຂາແຂວງສາລະວັນ (ຜູ້ເກົ່າ) ກັບ ທ່ານ ສັງວານ ພົມມະແສງ ເປັນຜູ້ວ່າການຫົວໜ້າລັດວິສາຫະກິດໄຟຟ້າລາວສາຂາແຂວງສາລະວັນ (ຜູ້ໃໝ່), ໂດຍເປັນກຽດເຂົ້າຮ່ວມຂອງ ທ່ານ ທອງຂັນ ພິມວິໄລ ຫົວໜ້າກົມຈັດຕັ້ງ-ພະນັກງານ ກະຊວງພະລັງງານ ແລະ ບໍ່ແຮ່; ທ່ານ ຄຳປະເສີດ ເທບປັນຍາ ຮອງຜູ້ອຳນວຍການໃຫຍ່ລັດວິສາຫະກິດໄຟຟ້າລາວ; ທ່ານ ແພງສີ ເມືອງຈັນ ຫົວໜ້າພະແນກພະລັງງານ ແລະ ບໍ່ແຮ່ແຂວງພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີ, ທ່ານ ກຽງສັກ ປຣັກສາດທອງ ຮອງຫົວໜ້າຝ່າຍບຸກຄະລາກອນ ລັດວິສາຫະກິດໄຟຟ້າລາວ ກໍ່ໄດ້ຜ່ານຂໍ້ຕົກລົງຂອງຜູ້ອຳນວຍການໃຫຍ່ລັດສາຫະກິດໄຟຟ້າລາວ ສະບັບເລກທີ 1650/ຟຟລ, ນະຄອນຫຼວງວຽງຈັນ, ລົງວັນທີ 8 ພຶດສະພາ 2020 ວ່າດ້ວຍການປັບປຸງບຸກຄະລາກອນລະດັບຂັ້ນ ຝ່າຍ, ສາຂາແຂວງ ແລະ ຫ້ອງການໄລຍະທີ 2; ໂດຍໄດ້ຕົກລົງແຕ່ງຕັ້ງ ທ່ານ ເດດສຸວັນ ມະໄລທອງ ຫົວໜ້າລັດວິສາຫະກິດໄຟຟ້າລາວສາຂາແຂວງສາລະວັນຜູ້ເກົ່າໄປຮັບໜ້າທີ່ເປັນຜູ້ວ່າການຫົວໜ້າລັດວິສາຫະກິດໄຟຟ້າລາວສາຂາແຂວງອັດຕະປື ແລະ ແຕ່ງຕັ້ງ ທ່ານ ສັງວານ ພົມມະແສງ ເປັນຜູ້ວ່າການຫົວໜ້າລັດວິສາຫະກິດໄຟຟ້າລາວສາຂາແຂວງສາລະວັນຜູ້ໃໝ່; ແຕ່ງຕັ້ງ ທ່ານ ເລີດສະໄໝ ວິໄລສຸກ ແລະ ທ່ານ ລຳເງິນ ສຸນາພັນ ເປັນຮອງຫົວໜ້າສາຂາ.

ໂອກາດນີ້,  ສຳນັກງານໃຫຍ່ລັດວິສາຫະກິດໄຟຟ້າລາວ ກໍ່ໄດ້ມີການມອບອຸປະກອນການແພດ ເພື່ອນຳໃຊ້ເຂົ້າໃສ່ວຽກງານຕ້ານພະຍາດໂຄວິດ-19 ເຊັ່ນ: ຜ້າອັດປາກ-ອັດດັງ, ເຈວລ້າງມື ແລະ ເຄື່ອງແທກອຸນຫະພູມໃຫ້ແກ່ພະແນກພະລັງງານ-ບໍ່ແຮ່ແຂວງ ແລະ ລັດວິສາຫະກິດໄຟຟ້າລາວສາຂາແຂວງສາລະວັນຕື່ມອີກ. ພິທີດັ່ງກ່າວຈັດຂຶ້ນໃນວັນທີ 12 ພຶດສະພາ 2020 ຜ່ານມາທີ່ລັດວິສາຫະກິດໄຟຟ້າລາວສາຂາແຂວງສາລະວັນ.

(ເນື້ອໃນ: ທິດລານີ)