ເຈົ້າເມືອງໄຊພູທອງ ລົງຕິດຕາມຄວາມຄືບໜ້າ ໂຄງການກໍ່ສ້າງແລະ ສ້ອມແປງຊົນລະປະທານ ບ້ານ ຄັນທ່າຈານ

734

ຫວ່າງບໍດົນຜ່ານມານີ້, ທ່ານ ຄໍາວິໃສ ຜຸຍຍະວົງ ກໍາມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງໄຊພູທອງ ພ້ອມດ້ວຍຄະນະນໍາຂອງເມືອງ ແລະ ຫ້ອງການກະສິກໍາ-ປ່າໄມ້ເມືອງໄຊພູທອງ ແຂວງສະຫວັນນະເຂດ ໄດ້ລົງຕິດຕາມຄວາມຄືບໜ້າໂຄງການກໍ່ສ້າງ ແລະ ສ້ອມແປງຊົນລະປະທານ ບ້ານ ຄັນທ່າຈານ ເຊິ່ງເປັນໜຶ່ງໃນໂຄງການຍ່ອຍຂອງການພັດທະນາພື້ນຖານໂຄງລ່າງກະສິກໍາຕາມແລວເສດຖະກິດຕາເວັນອອກ-ຕາເວັນຕົກ.

ໂຄງການດັ່ງກ່າວແມ່ນໄດ້ເລີ່ມລົງມືຈັດຕັ້ງປະຕິບັດມາແຕ່ວັນທີ 18 ທັນວາ 2019 ຕາມສັນຍາແມ່ນຈະໃຫ້ສໍາເລັດໂຄງການໃນ 2021 ໃນກຳນົດເວລາ 18 ເດືອນ.ແຕ່ຜ່ານການຈັດ ຕັ້ງະຕິບັດຕົວຈິງມາຮອດປັດຈຸບັນເຫັນວ່າໂຄງການດັ່ງກ່າວສາມາດກໍ່ສ້າງໃນມູນຄ່າ 1.828.800 ໂດລາ.

ສໍາລັບໜ້າວຽກທີ່ເຮັດແມ່ນໄດ້ກໍ່ສ້າງຄອງຊອຍເບຕົງຈຳນວນ 20 ຄອງ ຢູ່ຫົວງານທີ 1 ບ້ານ ຄັນທ່າຈານ ມີ 16 ຄອງ ແລະ ຢູ່ຫົວງານທີ 2 ແມ່ນຕັ້ງຢູ່ບ້ານດອນຖໍ້າເງິນມີ 4 ຄອງ,ລວມທັງໝົດ ມີ 20 ຄອງມີລວງຍາວຂອງຄອງທັງໝົດໃນ13.488 ແມັດ,ກໍ່ສ້າງເຮືອນປ້ຳຫຼືຈັກສູບນ້ຳທີ່ມີຂະໜາດໃຫຍ່ນວນ 2 ຫົວງານ ຫົວປໍ້ານໍ້າສາມາດດູດນໍ້າຈາກແມ່ນໍ້າຂອງຂື້ນຫົດເນື້ອທີ່ທໍາການຜະລິດຊຸດໜຶ່ງສາມາດດູດໄດ້ 710 ລົດ ຕໍ່ວິນາທີ ເຊິ່ງເຄື່ອງດູດນໍ້າທັງ 2 ຫົວງານ ສາມາດດູດນໍ້າໄດ້ສູງສຸດເຖິງ 2.130 ລິດຕໍ່ວິນາທີ,ສາມາດຫົດເນື້ອທີ່ໄດ້ທັງໝົດ 877 ເຮັກຕາ

ພາຍຫຼັງທີ່ສຳເລັດການກໍ່ສ້າງຊົນລະປະທານ ບ້ານ ຄັນທ່າຈານ ແຫ່ງນີ້ຈະມີປະຊາຊົນຈຳນວນ 2 ບ້ານ ທີ່ໃຊ້ນໍ້າເຂົ້າໃນການຜະລິດກະສິກໍາຄື: ບ້ານ ຄັນທ່າຈານ ສາມາດນຳໃຊ້ເຂົ້າໃນການຜະລິດເຂົ້ານາປີໃນເນື້ອທີ່ 686,5 ເຮັກຕາ ແລະ ບ້ານ ດອນຖໍ້າເງິນ ມີເນື້ອທີ່ຫົດໄດ້ 76,1 ເຮັກຕາ.

ພາບ-ຂ່າວ: ພັນທະມິດ ວົງສຸທິ