ເສັ້ນທາງໄກສອນ ພົມວິຫານ 6,2 ກິໂລແມັດ ເກືອບສຳເລັດ 100% ແລ້ວ ສວຍງາມສົມການລໍຄອຍ

772

ເສັ້ນທາງໃຫຍ່ທີ່ຖືກປະດັບ ປະດາດ້ວຍເສົາໄຟເຍືອງທາງ ທີ່ສວຍງາມໄດ້ກາຍເປັນເອກະລັກທີ່ໂດດເດັ່ນຂອງການ ກໍ່ສ້າງອີກຢ່າງໜຶ່ງໃນນະຄອນ ໄກສອນ ພົມວິຫານ ເຊິ່ງເສັ້ນ ທາງນີ້ມີຊື່ວ່າເສັ້ນ ທາງໄກ ສອນ ພົມວິຫານ ຫຼືຮູ້ຈັກໃນ ນາມ (ເສັ້ນທາງ A1) ມາ ຮອດ ປະຈຸບັນນີ້ຖືໄດ້ວ່າສຳເລັດ ເກືອບ 100% ຕາມແຜນການ.

ທ່ານ ພົມມາ ວົງພະຈິດ ຫົວໜ້າ ໂຄງການພັດທະນາຕົວເມືອງຕາມແລວເສດຖະກິດຕາເວັນ ອອກ-ຕາເວັນຕົກອະນຸພາກພື້ນແມ່ນ້ຳຂອງໄດ້ລາຍງານໃຫ້ຮູ້ວ່າ: ໂຄງການກໍ່ສ້າງເສັ້ນທາງ ນະຄອນໄກສອນ ພົມວິຫານ ນອນໃນ 7 ໂຄງການຍ່ອຍ ຂອງການກໍ່ສ້າງພື້ນຖານໂຄງລ່າງ 3 ຕົວເມືອງຄື: ນະຄອນໄກສອນ ພົມວິຫານ, ເມືອງພີນ ແລະ ເມືອງເຊໂປນ ເຊິ່ງມີໄລຍະຈັດຕັ້ງປະຕິບັດ ໂຄງການ ແມ່ນເລີ່ມແຕ່ປີ 2013-2020, ມີມູນຄ່າໂຄງ ການທັງໝົດ 47.740.000 ໂດລາສະຫະລັດ, ໃນນັ້ນມີເງິນ ກູ້ຢືມຈາກ ADB 26.600.000 ໂດລາສະຫະລັດ (ໄລຍະກູ້ຢືມ 32 ປີ, ລວມໄລຍະການປອດໜີ້ 8 ປີ, ອັດຕາດອກເບ້ຍ 1% ໄລຍະປອດໜີ້ ແລະ1,50% ໄລຍະຊຳລະຕົ້ນທຶນ)

ພ້ອມນັ້ນຍັງມີເງິນຊ່ວຍເຫຼືອລ້າຈາກກອງທຶນ ADF ຂອງ ADB ມູນຄ່າ 14.230.000 ໂດລາ ສະຫະລັດ, ກອງທຶນ ເພື່ອສະໜັບສະໜູນການພັດ ທະນາຕົວເມືອງ (UFPF) ມູນຄ່າ 640.000 ໂດລາສະ ຫະລັດ. ສະເພາະເສັ້ນທາງ ໄກສອນ ພົມວິຫານ ມີມູນຄ່າ 7.895.413,55 ໂດລາສະ ຫະລັດ, ບໍລິສັດຮັບເໝົາກໍ່ສ້າງ ແມ່ນບໍລິສັດລັດວິສາຫະກິດ ກໍ່ສ້າງທາງເລກ 8 ເຊິ່ງ ໂຄງການນີ້ແມ່ນໄດ້ເຊັນສັນຍາໃນວັນທີ 14 ພະຈິກ 2017 ໄລຍະເວລາການກໍ່ສ້າງແມ່ນ 24 ເດືອນ (28 ພະຈິກ 2017-27 ພະຈິກ 2019) ແລະ ມີການຕໍ່ເວລາເພີ່ມຂຶ້ນອີກ 4 ເດືອນ ເຊິ່ງມາຮອດປະຈຸບັນນີ້ ແມ່ນຖືວ່າເກືອບສຳເລັດ 100%.

ເສັ້ນທາງດັ່ງກ່າວນີ້ ຖືວ່າເປັນເສັ້ນທາງທີ່ໄດ້ຖືກອອກແບບຕາມມາດຕະຖານ ທາງຂອງລະບົບສາກົນ, ມີເສົາ ໄຟເຍືອງທາງທີ່ສວຍງາມ, ມີດອນກາງສຳລັບປູກຫຍ້າ ແລະດອກໄມ້, ມີບ່ອນກັບລົດ ທີ່ສະດວກສະບາຍ, ຄວາມ ຍາວຂອງເສັ້ນທາງແມ່ນ 6,2 ກິໂລແມັດ ເຊິ່ງເລີ່ມຈາກວົງ ວຽນໄດໂນເສົາຮອດສາມແຍກຕະຫຼາດສາມັກຄີໄຊ, ໃນນັ້ນມີວົງວຽນຂະໜາດໃຫຍ່ 2 ແຫ່ງ ທີ່ຖືກອອກແບບໃຫ້ເຂົ້າ ກັບວັດທະນະທຳ ແລະຮີດຄອງ ປະເພນີຂອງຊາວແຂວງສະ ຫວັນນະເຂດ ແລະອາຊຽນ, ວົງວຽນທັງສອງມີຊື່ເອີ້ນວ່າ “ວົງວຽນອາຊຽນ ກັບວົງວຽນ ກະບອງ.