ຮອງເຈົ້າແຂວງອັດຕະປື ຕິດຕາມການສອບ​ເສັງ​ເອົາລັດຖະກອນໃໝ່ ປະຈຳສົກປີ 2020

545
ປະຕິບັດ​ຕາມ​ນະ​ໂຍບາຍ​ປ່ຽນ​ແປງ​ໃໝ່ ຍົກ​ສູງ​ປະສິດທິພາບ​ການ​ບໍລິຫານ​ລັດ ກ່ຽວກັບ​ນະ​ໂຍບາຍ​ດ້ານ​ຕ່າງໆຂອງ​ພັກ ​ແລະ ລັດຖະບານ ຮັບປະກັນ​ໃຫ້​ພະນັກງານ-ລັດຖະກອນ​ ມີ​ຄຸນ​ນະພາ​ບໃນ​ສະ​ເພາະໜ້າ ​ແລະ ຍາວ​ນານ. ​
ໃນວັນທີ 15 ພຶດສະພາ 2020 ຄະນະກຳມະການສອບເສັງຄັດເລືອກໂກຕາລັດຖະກອນຂັ້ນແຂວງອັດຕະປື ຈັດ​ການ​ສອບ​ເສັງ​ນັກສຶກສາຄັດ​ເລືອກ​ເຂົ້າ​ເປັນພະນັກງານ-ລັດຖະກອນໃໝ່ສັງກັດໃນ 8 ອົງການຈັດຕັ້ງ ສົກ​ປີ 2020, ​​ໂດຍ​ໃຫ້​ກຽດ​ເຂົ້າ​ຮ່ວມ ​ແລະ ຕິດ​ຕາມ​ການ​ສອບ​ເສັງ​ຂອງ ​ທ່ານ ພອນສະໄໝ ມຽງລາວັນ ຮອງເຈົ້າແຂວງ ພ້ອມ​ດ້ວຍ​ຄະນະ​ກຳມະການສອບເສັງ ແລະ ນັກ​ສອບ​ເສັງ​ເຂົ້າຮ່ວມ.
 
ການ​ສອບ​ເສັງ​ຄັດ​ເລືອກ​ເອົາ​ລັດຖະກອນເຂົ້າໃນ 8 ອົງການຈັດຕັ້ງຂອງສົກ​ປີ 2020 ໃນ​ຄັ້ງ​ນີ້ ລວມມີນັກສຶກສາມີໜ້າສອບເສັງທັງໝົດ 33 ຄົນ, ຍິງ 14 ຄົນ ຄັດເລືອກເອົາຕົວຈິງ 6 ຄົນ ໂດຍ​ການ​ສອບ​ເສັງປາລາໄນມີ​ລາຍ​ວີ​ຊາ​ຫລັກ 3 ພາກໃຫຍ່ ຄື: ພາກວິຊາການເມືອງ-ການປົກຄອງ; ພາກວິຊາວັດທິນະທຳ-ສັງຄົມ ແລະ ພາກວິຊາ ພົວພັນຕ່າງປະເທດ, ນັກສອບເສັງທີ່ຜ່ານເຂົ້າໃນຮອບຕັດສິນ ແມ່ນຈະໄດ້ສັງກັດເຂົ້າຢູ່ໃນ 6 ອົງການຈັດຕັ້ງ ເຊັ່ນ ໂຮງຮຽນການເມືອງ-ການປົກຄອງແຂວງ, ສະຫາພັນແມ່ຍິງແຂວງ, ຫ້ອງການຊາວໜຸ່ມແຂວງ, ອພບຕ ແຂວງ, ຄະນະໂຄສະນາອົບຮົມແຂວງ ແລະ ຄະນະຈັດຕັ້ງແຂວງ.
ໂອກາດດຽວກັນ ທ່ານ ພອນສະໄໝ ມຽງລາວັນ ຮອງເຈົ້າແຂວງ ໄດ້ຍົກໃຫ້ເຫັນວ່າ: ການສອບເສັງເທື່ອນີ້ແມ່ນໃຫ້ມີ​ຄວາມ​ເປັນ​ລະບຽບ, ບໍລິສຸດ, ຍຸຕິ​ທໍາ, ດໍາ​ເນີນ​ໄປ​ດ້ວຍ​ດີ ​ແລະ ມີ​ປະສິດທິ​ຜົນ, ສະກັດ​ກັ້ນ​ການ​ກະທໍາ​ຜິດ​ຂອງ​ນັກ​ສອບ​ເສັງ ແລະ ຄະນະ​ກໍາມະການ​ກໍາກັບ​ການ​ສອບ​ເສັງ. ບັນດານ້ອງນັກ​ສອບ​ເສັງຈົ່ງກຽມພ້ອມ​ທາງ​ດ້ານ​ຄວາມ​ຮູ້ ​ປະຕິບັດ​ໂມງ​ເວລາ​​ຕາມ​ຄໍາ​ແນ​ນນໍາ​ຂອງ​ຄະນະ​ກໍາມະການກໍາກັບ​ການສອບ​ເສັງ​ໃຫ້​ຖືກຕ້ອງ, ຫລັກການ​ສອບ​ເສັງ​ຕ້ອງ​ປະຕິ​ບັດ​ຕາມຫຼັກການສະ​ເໝີພາບ, ​ເປີດ​ເຜີຍ, ພາວະ​ວິ​ໄສ ​ແລະ ​ເປັນ​ທຳ.
ໂດຍ: ຈັນສະໄໝ