ມອບ-ຮັບ ຫົວໜ້າລັດວິສາຫະກິດໄຟຟ້າລາວ ສາຂາແຂວງສາລະວັນ ຄົນໃໝ່

539

ວັນທີ 12 ພຶດສະພາ 2020 ນີ້ ທີ່ລັດວິສາຫະກິດໄຟຟ້າລາວ ສາຂາແຂວງສາລະວັນ ໄດ້ມີພິທີມອບ-ຮັບຕຳແໜ່ງຫົວໜ້າລັດວິສາຫະກິດໄຟຟ້າລາວ ສາຂາແຂວງສາລະວັນ ຄົນໃໝ່, ລະຫວ່າງ ທ່ານ ເດດສຸວັນ ມະໄລທອງ ຫົວໜ້າລັດວິສາຫະກິດໄຟຟ້າລາວ ສາຂາແຂວງສາລະວັນ( ຜູ່ເກົ່າ) ກັບ ທ່ານ ສັງວານ ພົມມະແສງ ເປັນຜູ້ວ່າການຫົວໜ້າລັດວິສາຫະກິດໄຟຟ້າລາວ ສາຂາແຂວງສາລະວັນ( ຜູ່ໃໝ່), ໂດຍເປັນກຽດເຂົ້າຮ່ວມຂອງ ທ່ານ ທອງຂັນ ພີມວິໄລ ຫົວໜ້າກົມຈັດຕັ້ງ ກະຊວງພະລັງງານ ແລະບໍ່ແຮ່, ທ່ານ ຄຳປະເສີດ ເທບປັນຍາ ຮອງຜູ້ອຳນວຍການໃຫຍ່ລັດວິສາຫະກິດໄຟຟ້າລາວ ແລະ ທ່ານ ແພງສີ ເມືອງຈັນ ຫົວໜ້າພະແນກພະລັງງານ ແລະບໍ່ແຮ່ແຂວງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ກຽງສັກ ປຣັກສາດທອງ ຮອງຫົວໜ້າຝ່າຍບຸກຄະລາກອນ ໄດ້ຜ່ານຂໍ້ຕົກລົງຂອງຜູ້ອຳນວຍການໃຫຍ່ ລັດສາຫະກິດໄຟຟ້າລາວ ສະບັບເລກທີ 1650/ຟຟລ, ນະຄອນຫຼວງວຽງຈັນ, ລົງວັນທີ 8 ພຶດສະພາ 2020 ວ່າດ້ວຍ ການປັບປຸງບຸກຄະລາກອນລະດັບຂັ້ນ ຝ່າຍ, ສາຂາແຂວງ ແລະຫ້ອງການ ໄລຍະທີ 2, ໂດຍໄດ້ຕົກລົງແຕ່ງຕັ້ງ ທ່ານ ເດດສຸວັນ ມະໄລທອງ ຫົວໜ້າລັດວິສາຫະກິດໄຟຟ້າລາວ ສາຂາແຂວງສາລະວັນ( ຜູ່ເກົ່າ) ໄປຮັບໜ້າທີ່ເປັນ ຜູ້ວ່າການຫົວໜ້າລັດວິສາຫະກິດໄຟຟ້າລາວ ສາຂາແຂວງອັດຕະປື ແລະ ແຕ່ງຕັ້ງ ທ່ານ ສັງວານ ພົມມະແສງ ເປັນຜູ້ວ່າການຫົວໜ້າລັດວິສາຫະກິດໄຟຟ້າລາວ ສາຂາແຂວງສາລະວັນ( ຜູ່ໃໝ່), ແຕ່ງຕັ້ງ ທ່ານ ເລີດສະໄໝ ວິໄລສຸກ ແລະ ທ່ານ ລຳເງິນ ສຸນາພັນ ເປັນຮອງຫົວໜ້າສາຂາ.

ໃນຕອນທ້າຍພິທີ ລັດວິສາຫະກິດໄຟຟ້າລາວ( ສຳນັກງານໃຫຍ່) ກໍ່ໄດ້ມີການມອບອຸປະກອນການແພດ ເພື່ອນຳໃຊ້ເຂົ້າໃສ່ວຽກງານຕ້ານພະຍາດ ໂຄວິດ-19 ເຊັ່ນ: ຜ້າອັດປາກ-ອັດດັງ, ເຈວລ້າງມື ແລະເຄື່ອງແທກອຸນຫະພູມ ໃຫ້ແກ່ພະແນກພະລັງງານ-ບໍ່ແຮ່ແຂວງ ແລະ ລັດວິສາຫະກິດໄຟຟ້າລາວ ສາຂາແຂວງສາລະວັນ.

ພາບ-ຂ່າວ: ທິດລານີ ໂຄດໂຍທາ.