ບໍ່ພົບຜູ້ຕິດເຊື້ອໂຄວິດ-19 ເພີ່ມ ແຕ່ຕ້ອງປະຕິບັດແຈ້ງການຢ່າງເຂັ້ມງວດ

500

ໃນວັນທີ 17 ພຶດສາພາ 2020 ທີ່ສູນປະຕິບັດງານ ຄະນະສະເພາະກິດ ຄວບຄຸມ COVID-19ກະຊວງສາທາລະນະສຸກ ນະຄອນຫຼວງວຽງຈັນ ໄດ້ມີພິທີຖະແຫຼງຂ່າວລາຍງານສະພາບການລະບາດຂອງໂຄວິດ-19 ໂດຍທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ


ທ່ານ ດຣ. ຣັດຕະນະໄຊ ເພັດສຸວັນ ກ່າວວ່າ: ການເຝົ້າລະວັງ ແລະ ວິເຄາະ ໃນວັນທີ 16 ພຶດສະພາ 2020, ໄດ້ເກັບຕົວຢ່າງມາກວດທັງໝົດ 138 ຄົນ (ຕົວຢ່າງໃໝ່ 27 ຄົນ, ສ່ວນ 111 ຄົນທີ່ຈຳກັດບໍລິເວນຢູ່ ໂຮງແຮມດອນຈັນພາເລດ ແມ່ນໄດ້ເກັບຕົວຢ່າງໃນຕອນຄ່ຳ ຂອງວັນທີ 15/05/2020 ແລະ ມາກວດວິເຄາະ ໃນວັນທີ 16/05/2020), ໃນນັ້ນ: ມີກໍລະນີສົງໄສ 06 ຄົນ, ແຮງງານລາວທີ່ກັບມາແຕ່ໄທ 21 ຕົວຢ່າງ, ແຮງງານຈີນ 110 ຄົນ ແລະ ບຸກຄົນທົ່ວໄປ 01 ຄົນ; ກໍລະນີສົງໄສ 06 ຄົນ ແມ່ນມາຈາກ ໄຊສົມບູນ 4 ຄົນ, ນະຄອນຫຼວງວຽງຈັນ 01 ຄົນ ແລະ ຄຳມ່ວນ 01 ຄົນ. ຜົນກວດທັງໝົດຂອງມື້ວານນີ້ ບໍ່ພົບເຊື້ອ. ໝາຍຄວາມວ່າໃນວັນທີ 16 ພຶດສະພາ 2020 ບໍ່ມີຜູ້ຕິດເຊື້ອໃໝ່.


ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 16 ພຶດສະພາ 2020 ໄດ້ເກັບຕົວຢ່າງມາກວດທັງໝົດ ມີ 4.451 ຕົວຢ່າງ, ກວດພົບເຊື້ອສະສົມ 19 ຄົນ (35 ມື້ແລ້ວທີ່ບໍ່ພົບຜູ້ຕິດເຊື້ອໃໝ່).
ທ່ານ ດຣ. ຣັດຕະນະໄຊ ເພັດສຸວັນ ກ່າວຕື່ມວ່າ: ບັນດາທ່ານໄດ້ຮັບຟັງແຈ້ງການຂອງຫ້ອງວ່າການສຳນັກງານນາຍົກ ໃນມື້ກ່ອນນີ້ໄປແລ້ວ ເຊີ່ງມີ 9 ມາດຕະການຜ່ອນຜັນ ແລະ ຍັງ 4 ມາດຕະການທີ່ຈະສືບຕໍ່ປະຕິບັດ.

ສະນັ້ນ ຈຶ່ງຮຽກຮ້ອງໃຫ້ທຸກພາກສ່ວນໃນສັງຄົມ, ຊຸມຊົນ, ຄອບຄົວ ແລະ ສ່ວນບຸກຄົນ ຈົ່ງເອົາໃຈໃສ່ທຳຄວາມເຂົ້າໃຈ ເພື່ອຮ່ວມແຮງຮ່ວມໃຈກັນ ສືບຕໍ່ຈັດຕັ້ງປະຕິບັດ ແຈ້ງການສະບັບເລກທີ່ 580/ຫສນຍ ລົງວັນທີ່ 15 ພຶດສະພາ 2020 ນີ້ໃຫ້ຖືກຕ້ອງ ແລະ ເຂັ້ມງວດ.