34 ມື້ ຕິດຕໍ່ກັນ ລາວບໍ່ພົບຜູ້ຕິດເຊື້ອໂຄວິດ-19

402

ຂປລ. ກະຊວງສາທາລະນະສຸກ ກໍຄື ຄະນະສະເພາະກິດຄວບຄຸມ ແລະ ປ້ອງກັນ ການລະບາດຂອງພະບາດໂຄວິດ-19 ຢືນຢັນວ່າ: ມາຮອດວັນທີ 16 ພຶດສະພາ 2020 ສປປ ລາວ ບໍ່ພົບຜູ້ຕິດເຊື້ອໄວຣັດໂຄວິດ-19 ເປັນເວລາ 34 ມື້ ຕິດຕໍ່ກັນ.


ທ່ານ ດຣ. ລັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ລາຍງານໃນພິທີຖະແຫລງຂ່າວໃນວັນທີ 16 ພຶດສະພາ 2020 ນີ້ວ່າ: ຕົວເລກຜູ້ຕິດເຊື້ອໄວຣັດໂຄວິດ-19 ຢູ່ ສປປ ລາວ ຍັງຢູ່ 19 ກໍລະນີ, ມີຜູ້ປິ່ນປົວດີທັງໝົດ 14 ກໍລະນີ, ຍັງສືບຕໍ່ນອນປິ່ນປົວຢູ່ໂຮງໝໍ 5 ຄົນ, ເຊິ່ງໃນວັນທີ 15 ພຶດສະພາ 2020, ໄດ້ເກັບຕົວຢ່າງມາກວດທັງໝົດ 109 ຄົນ, ໃນນັ້ນ ມີກໍລະນີສົງໄສມາກວດຄືນ 02 ຄົນ, ບຸກຄົນທົ່ວໄປທີ່ບໍ່ມີອາການ 31 ຄົນ, ຜູ້ອອກໂຮງໝໍ 03 ຄົນ ຄືເບີ 02, 06 ແລະ 13 ກັກໂຕຄົບ 14 ວັນໄດ້ມາກວດຄືນ, ແຮງງານລາວ ທີ່ກັບມາແຕ່ໄທ 73 ຄົນ.


ທ່ານ ດຣ. ລັດຕະນະໄຊ ເພັດສຸວັນ ກ່າວຕື່ມວ່າ: ຜ່ານການໄດ້ຮັບຟັງແຈ້ງການຂອງຫ້ອງວ່າ ການສຳນັກງານນາຍົກໃນມື້ວານນີ້, ເຊີ່ງມີ 9 ມາດຕະການຜ່ອນຜັນ ແລະ ຍັງ 4 ມາດຕະການທີ່ຈະສືບ ຕໍ່ປະຕິບັດ. ສະນັ້ນ, ຈຶ່ງຮຽກຮ້ອງໃຫ້ທຸກພາກສ່ວນໃນສັງຄົມ, ຊຸມຊົນ, ຄອບຄົວ ແລະ ສ່ວນບຸກຄົນ ຈົ່ງ ເອົາໃຈໃສ່ທຳຄວາມເຂົ້າໃຈ ເພື່ອຮ່ວມແຮງຮ່ວມໃຈກັນສືບຕໍ່ຈັດຕັ້ງປະຕິບັດ ແຈ້ງການສະບັບເລກທີ່ 580/ຫສນຍ ລົງວັນທີ່ 15 ພຶດສະພາ 2020 ນີ້ ໃຫ້ຖືກຕ້ອງ ແລະ ເຂັ້ມງວດ.

ປັດຈຸບັນທົ່ວປະເທດ ມີສູນຈໍາກັດບໍລິເວນທັງໝົດ 66 ສູນ, ມີຜູ້ຈຳກັດບໍລິເວນຢູ່ສູນ 2.371 ຄົນ, ໄດ້ເກັບຕົວຢ່າງມາກວດວິເຄາະທັງໝົດ ແລະ ບໍ່ມີຜູ້ຕິດເຊື້ອ.