33 ມື້ ສປປ ລາວ ບໍ່ພົບຜູ້ຕິດເຊື້ອໂຄວິດ-19 ເພີ່ມ

546

ເປັນເວວາ 33 ມື້ຕິດຕໍ່ກັນທີ່ ສປປ ລາວ ບໍ່ພົບຜູ້ຕິດເຊື້ອໂຄວິດ-19 ເພີ່ມ, ເຮັດໃຫ້ຍອດຜູ້ຕິດເຊື້ອສະສົມລວມຍັງຄົງທີ່ 19 ຄົນ ແລະ ປິ່ນປົວດີອອກໂຮງໝໍທັງໝົດ 14 ຄົນ.
ໃນວັນທີ 15 ພຶດສະພາ 2020 ທີ່ກະຊວງສາທາລະນະສຸກ, ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໄດ້ຖະແຫຼງຂ່າວລາຍງານສະພາບການລະບາດຂອງພະຍາດໂຄວິດ-19 ໃນ ສປປ ລາວ ໂດຍການຖະແຫຼງຂອງ ທ່ານ ຮສ.ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈໍາການຄະນະສະເພາະກິດຄວບຄຸມພະຍາດໂຄວິດ-19 ແລະ ມີສື່ມວນຊົນເຂົ້າຮ່ວມ.

ທ່ານ ຮສ.ດຣ ພູທອນ ເມືອງປາກ ໃຫ້ຮູ້ວ່າ: ຜົນການກວດເກັບຕົວຢ່າງກວດຫາເຊື້ອໂຄວິດ-19 ທັງໝົດ 112 ຄົນ ໃນວັນທີ 14 ພຶດສະພາ 2020 ເຊິ່ງຜົນກວດທັງໝົດ 112 ຄົນ ແມ່ນບໍ່ພົບຜູ້ຕິດເຊື້ອ ແລະ ນັບເປັນ 33 ມື້ຕິດຕໍ່ກັນແລ້ວທີ່ລາວເຮົາ ບໍ່ມີຜູ້ຕິດເຊື້ອໃໝ່. ສັງລວມການວິເຄາະແຕ່ເດືອນມັງກອນ ຮອດ ວັນທີ 14 ພຶດສະພາ 2020 ໄດ້ເກັບຕົວຢ່າງມາກວດທັງໝົດ 4.204 ຄົນ ແລະ ກວດພົບຜູ້ຕິດເຊື້ອສະສົມ 19 ຄົນ. ມາຮອດປັດຈຸບັນ ຜູ້ຕິດເຊື້ອພະຍາດໂຄວິດ-19 ໃນ ສປປ ປິ່ນປົວຫາຍດີອອກໂຮງໝໍແລ້ວ 14 ຄົນ ແລະ ກຳລັງປິ່ນປົວ 5 ຄົນ.

ຮູບ​ປະ​ກອບ ການ​ລະ​ບາດ​ໂຄວິດ​ຢູ່​ຕ່າງ​ປະ​ເທດ

ທັງນີ້, ການຕິດຕາມສະພາບການລະບາດຂອງປະເທດໃກ້ຄຽງ ແລະ ການລະບາດຢູ່ໃນໂລກ ເຫັນວ່າ: ມາຮອດເວລາ 6:00 ໂມງຂອງວັນທີ 15 ພຶດສະພາ 2020 ທົ່ວໂລກມີການລາຍງານການລະບາດ ທັງໝົດ 213 ປະເທດ/ເຂດ ມີການຢັ້ງຢືນ ຜູ້ຕິດເຊື້ອພະຍາດໂຄວິດ-19 ແມ່ນ 4.518.574 (92.918 ໃໝ່) , ເສຍຊິວິດ 302.949 (5.184ໃໝ່) ກວມເອົາ 6,70 % ຂອງຜູ້ຕິດເຊື້ອທັງໝົດ; ປີ່ນປົວຫາຍດີ 1.699.354 (44.535 ໃໝ່) ກວມເອົາ 37,60 % ຂອງຜູ້ຕິດເຊື້ອທັງໝົດ ແລະ ບັນຫາສຳຄັນ ແມ່ນມີບາງປະເທດ ຈຳນວນຜູ້ຕິດເຊື້ອມື້ດຽວ ມີເຖິງ 24.100ຄົນ ແລະ ເສຍຊີວິດ 1.607ຄົນຕໍ່ມື້; ອັດຕາຄວາມຮ້າຍແຮງຂອງມື້ນີ້ແມ່ນ 6.70 % (ມື້ວານນີ້ 6.72 %). ໃນນັ້ນ, ສະເພາະກຸ່ມປະເທດອາຊຽນກໍ່ເຫັນວ່າ ຍັງມີບາງປະເທດທີ່ມີອັດຕາການຕິດເຊື້ອໃໝ່ປະ ຈຳວັນທີ 14 ພຶດສະພາ 2020 ສູງເຖິງ 752 ຄົນ, ໃນມື້ດຽວນີ້ຢູ່ກຸ່ມປະເທດອາຊຽນມີຜູ້ເສຍຊີວິດ 34 ຄົນ