ເມືອງຫົງສາ ສ້າງຂະບວນການ-ໃຫ້ຄວາມຮູ້ ວຽກງານປ້ອງກັນພະຍາດໄຂ້ຍຸງລາຍ

510

ຂປລ. ເພື່ອເຮັດໃຫ້ການສ້າງຂະບວນການອະນາໄມ ທຳລາຍແຫຼ່ງເພາະພັນຂອງໜອນຍຸງໃຫ້ເປັນຂະບວນທີ່ຟົດຟື້ນ, ເຮັດໃຫ້ຕົວເມືອງມີຄວາມສະອາດງາມຕາ ແລະ ເພື່ອກຽມຄວາມພ້ອມໃຫ້ແກ່ການລົງຕິດຕາມຊຸກຍູ້ຂອງທ່ານປະທານຄະນະກຳມະທິການປ້ອງກັນ ແລະ ຄວບຄຸມການລະບາດພະຍາດໄຂ້ຍຸງລາຍຂັ້ນແຂວງ, ເວົ້າລວມ ເວົ້າສະເພາະ ກໍ່ຄືເມືອງຫົງສາ ຈຶ່ງໄດ້ສ້າງຂະບວນການອອກແຮງງານອະນາໄມລວມຂຶ້ນໃນຕອນເຊົ້າຂອງວັນທີ 15 ພຶດສະພາ 2020 ຢູ່ທີ່ສະໜາມກິລາຂອງເມືອງ ໂດຍມີທ່ານ ນາງ ດາວວິນ ລາດຊະກິດ ຮອງເລຂາພັກເມືອງ ຫົງສາ, ຜູ້ຊີ້ນຳວຽກງານການເມືອງແນວຄິດ ພັກ-ພະນັກງານ, ມີຫົວໜ້າຫ້ອງການ, ທະຫານ, ຕຳຫລວດ, ພະນັກງານແຕ່ລະຫ້ອງການ, ນາຍບ້ານສອງບ້ານຄື: ບ້ານໂພນສະອາດ ແລະ ບ້ານໂພນໄຊ ຕະຫລອດຮອດພໍ່ແມ່ປະຊາຊົນພາຍໃນບ້ານ ເຂົ້າຮ່ວມຢ່າງພ້ອມພຽງ.

ໃນໂອກາດນີ້, ທ່ານ ນາງ ດາວວິນ ລາດຊະກິດ ກໍໄດ້ໃຫ້ຮູ້ກ່ຽວກັບວົງຈອນມີຊີວິດຂອງຍຸງ ແລະ ພະຍາດໄຂ້ຍຸງ ເພື່ອໃຫ້ຄວາມຮູ້, ຄວາມເຂົ້າໃຈກ່ຽວກັບຜົນຮ້າຍ ແລະ ວິທີປ້ອງກັນໄຂ້ຍຸງລາຍ ໃຫ້ພະນັກງານ ຕະຫຼອດຮອດພໍ່ແມ່ປະຊາຊົນໄດ້ມີສະຕິລະວັງຕົວ, ຮ່ວມແຮງຮ່ວມໃຈກັນຕ້ານ ແລະ ສະກັດກັ້ນພະຍາດໄຂ້ຍຸງລາຍ ບໍ່ໃຫ້ມີການແພ່ລະບາດ.

ຫຼັງຈາກນັ້ນ, ແຕ່ລະພາກສ່ວນໄດ້ສາມັກຄີກັນສ້າງຂະບວນການອອກແຮງງານລວມຢ່າງຕັ້ງໜ້າ ໂດຍແບ່ງກັນອອກແຮງງານຕາມເສັ້ນທາງຕ່າງໆ ໃນຕົວເມືອງ ໂດຍການຖາງຫຍ້າ-ອະນາໄມ ແລະ ເກັບຂີ້ເຫຍື້ອຕາມສອງຝາກທາງໃຫ້ມີຄວາມສະອາດຈົບງາມ.

ທ່ານ ດຣ ສົມບູນ ທຳມະລັດ ຫົວໜ້າຫ້ອງການ ສາທາລະນະສຸກເມືອງຫົງສາ ໄດ້ຮຽກຮ້ອງມາຍັງພໍ່ແມ່ປະຊາຊົນພາຍໃນສອງບ້ານ ກໍ່ຄືທົ່ວ ເມືອງຫົງສາ ຈົ່ງເປັນເຈົ້າການຮ່ວມກັນໃນການປ້ອງກັນພະຍາດໄຂ້ຍຸງລາຍ ດ້ວຍການຮັກສາອະນາໄມສາມສະອາດ, ອະນາໄມສະຖານທີ່ອ້ອມຮອບບ້ານເຮືອນ ເອົາໃຈໃສ່ປະຕິບັດ 5 ປ ເປັນປະຈໍາທຸກໆ ອາທິດ, ຄຽງຄູ່ກັນນັ້ນ, ກໍ່ໃຫ້ມີສະຕິເຝົ້າລະວັງ ແລະ ປ້ອງກັນພະຍາດໂຄວິດ 19 ນໍາອີກດ້ວຍ.

ຂ່າວ: ກິດຕິສັກ ບົວໄລ