ກອງປະຊຸມໃຫຍ່ຄັ້ງທີ II ຂອງໜ່ວຍພັກຫ້ອງການຄະນະກຳມະການ ປກຊ-ປກສ ແຂວງຈຳປາສັກ

692

ວັນທີ 14 ພຶດສະພາ 2020 ນີ້, ໜ່ວຍພັກຫ້ອງການຄະນະກຳມະການ ປກຊ-ປກສ ແຂວງ ທີ່ຂື້ນກັບຄະນະພັກຮາກຖານຫ້ອງວ່າການແຂວງຈຳປາສັກ ຈັດກອງປະຊຸມໃຫຍ່ ຄັ້ງທີ II ຂອງຕົນຂື້ນ, ຢູ່ທີ່ຫ້ອງວ່າການແຂວງຈໍາປາສັກ ພາຍໃຕ້ການເຂົ້າຮ່ວມຂອງ ສະຫາຍ ສະນັ່ນ ສີພາພົມມະຈັນ ກຳມະການພັກແຂວງ, ເຂລາຄະນະພັກຮາກຖານ, ຫົວໜ້າຫ້ອງວ່າການແຂວງຈຳປາສັກ; ສະຫາຍ ພັທ ບົວໄຂ ພົມພັນ ເລຂາໜ່ວຍພັກຫ້ອງການຄະນະກຳມະການ ປກຊ-ປກສ, ຫົວໜ້າຫ້ອງການຄະນະກຳມະການ ປກຊ-ປກສ ແຂວງຈຳປາສັກ, ສະຫາຍ ສອນນາລິນ ຄຳພູມີ ຫົວໜ້າຂະແໜງກວດກາ ຕາງໜ້າຄະນະກຳມະການບຸກຄະລາກອນຂັ້ນແຂວງ, ມີ 3 ເອົາການຈັດຕັ້ງມະຫາຊົນ, ສະມາຊິກພັກສົມບູນ ແລະ ສຳຮອງພາຍໃນໜ່ວຍພັກເຂົ້າຮ່ວມ.

ກອງປະຊຸມ ໄດ້ຮັບຟັງການຜ່ານບົດສຳຫຼວດການນຳພາຂອງໜ່ວຍພັກ, ຜ່ານບົດລາຍງານການເມືອງທັງສອງພາກ ຕະຫຼອດໄລຍະການນຳພາ-ຊີ້ນຳ 5 ປີ ຜ່ານມາ ຂອງໜ່ວຍພັກຫ້ອງການຄະນະກຳມະການ ປກຊ-ປກສ, ດ້ານການຈັດຕັ້ງ ແບບແຜນການນຳພາ ໄດ້ເອົາໃຈໃສ່ຍົກສູງບົດບາດການນຳພາ ແລະຄວາມເປັນແບບຢ່າງນຳໜ້າ ຂອງພະນັກງານສະມາຊິກພັກ ບົນພື້ນຖານ ເສີມຂະຫຍາຍທາດແທ້ມູນເຊື້ອຄວາມສາມັກຄີ ເປັນອັນໜຶ່ງອັນດຽວກັນ ພາຍໃນພັກ ແລະພາກທິດທາງແຜນການ 5 ປີໃນຕໍ່ໜ້າ ຄະນະພັກ-ໜ່ວຍພັກຫ້ອງການຄະນະກຳມະການ ປກຊ-ປກສ ແຂວງ ພ້ອມກັນສຸມໃສ່ວຽກງານສຶກສາອົມຮົມ-ນຳພາແນວຄິດໃຫ້ພະນັກງານສະມາຊິດພັກ ແລະອົງການຈັດຕັ້ງມະຫາຊົນ ເສີມຂະຫຍາຍຈິດໃຈຮັກຊາດ, ຮັກລະບອບປະຊາທິປະໄຕ, ສ້າງໜ່ວຍພັກໃຫ້ມີຄວາມໜັກແໜ້ນເຂັ້ມແຂງໃນທຸກດ້ານ.

ໜ່ວຍພັກຫ້ອງການຄະນະກຳມະການ ປກຊ-ປກສ ແຂວງ ມີໜ້າທີ່ການເມືອງ ເປັນເສນາທິການ ຊ່ວຍວຽກປິ່ນອ້ອມໃຫ້ຄະນະພັກຮາຖານ ຫ້ອງວ່າການແຂວງ, ພາຍໃຕ້ການຊີ້ນຳຂອງສະຫາຍເລຂາພັກແຂວງ ປະທານຄະນະກຳມະການ ປກຊ-ປກສ ແຂວງຈຳປາສັກ, ໜ່ວຍພັກຫ້ອງການຄະນະກຳມະການ ປກຊ-ປກສ ມີສະມາຊິກພັກທັງໝົດ 12 ສະຫາຍ, ຍິງ 2 ສະຫາຍ ໃນນັ້ນ ສຳຮອງ 2 ສະຫາຍ

ໃນກອງປະຊຸມຍັງໄດ້ໃຊ້ສິດປະຊາທິປະໄຕ ປ່ອນບັດເລືອກເອົາຄະນະພັກຊຸດໃໝ່, ມີໜ້າປ່ອນບັດຕົວຈິງ 9 ສະຫາຍ, ຜ່ານການປ່ອນບັດ ເລືອກໄດ້ 1.ສະຫາຍ ພັທ ບົວໄຂ ພົມພັນ ເປັນເລຂາໜ່ວຍພັກ, 2.ສະຫາຍ ພັທ ສົມພອນ ສີກຸມພອນ ເປັນຮອງເລຂາໜ່ວຍພັກ, 3.ສະຫາຍ ພັຕ ບຸນຖັນ ພົມອາສາ ເປັນປະທານກວດກາ ແລະ ໃນຕ້ອນທ້າຍຍັງໄດ້ຮັບຟັງຄຳເຫັນໂອ້ລົມຂອງສະຫາຍ ສະນັ່ນ ສີພາພົມມະຈັນ ເພື່ອເປັນການຊີ້ທິດ ເຍືອງທາງ ໃນການນຳພາ-ຊີ້ນຳຂອງ ຄະນະພັກຫ້ອງການຄະນະກຳມະການ ປກຊ-ປກສ ແຂວງຈຳປາສັກ ຊຸດໃໝ່ ໃນຕໍ່ໜ້າ.

ຂ່າວ: ທັດຊະນະ ນັກຂ່າວຫ້ອງວ່າການແຂວງ.