ກັກຕົວຜູ້ຄ້າຂາຍຢາເສບຕິດພ້ອມຢາບ້າ 9 ຮ້ອຍກວ່າເມັດ

527

ໃນວັນທີ 18 ເມສາ 2020 ທີ່ຜ່ານມາ ເຈົ້າໜ້າທີ່ ປກສ ບໍລິການປະຊາຊົນ ກຸ່ມບ້ານທີ 12 ປກສ ເມືອງຈໍາພອນ ແຂວງສະຫວັນນະເຂດ ກັກຕົວຜູ້ຄ້າຂາຍຢາເສບຕິດ ໄດ້ ໜື່ງ ຄົນ ຊື່ : ທ້າວ ກິ ອາຍຸ 25 ປີ ອາຊີບເຮັດນາ ບ້ານ ສີບຸນເຮືອງ ເມືອງຈຳພອນ ພ້ອມຢຶດຂອງກາງ ຢາເສບຕິດ ປະເພດ ຢາບ້າ 996 ເມັດ, ລົດຈັກເວັບສີດຳ ໜຶ່ງຄັນ ບໍ່ຕິດປ້າຍທະບຽນ.

ເຈົ້າໜ້າທີ່ ໃຫ້ຮູ້ວ່າ ໃນເວລາ ປະມານ 21 ໂມງ ຂອງວັນທີ 18 ເມສາ ເຈົ້າໜ້າທີ່ ປກສ ບໍລິການປະຊາຊົນ ກຸ່ມບ້ານທີ 12 ໄດ້ອອກເຄື່ອນໄຫວກວດກາສາລະເວ ຢູ່ຂອບເຂດ ບ້ານສີບຸນເຮືອງ ເມືອງຈຳພອນ ໄດ້ພົບເຫັນບຸກຄົນນຳໃຊ້ລົດຈັກເວບສີດຳບໍຕິດປ້າຍທະບຽນ ມີການເຄື່ອນໄຫວສັນຈອນໄປມາໃນໄລຍະ ປ້ອງກັນ COVID-19 ຕາມຄຳສັ່ງເລກທີ 06/ນຍ ຈຶ່ງໄດ້ກັກຕົວຜູ້ກ່ຽວເພື່ອກວດກາ ຈາກການຄົ້ນຕົວ ພົບເຫັນ ຢາບ້າ 996 ເມັດ ທີ່ຊຸກເຊື່ອງໄວ້ໃນກະເປົ໋າພາຍຕິດຕົວຜູ້ກ່ຽວ ຈຶ່ງໄດ້ນຳຕົວມາດຳເນີນການສືບສວນ-ສອບສວນ ຢູ່ ປກສ ເມືອງຈຳພອນ ຜ່ານການສືບສວນ-ສອບສວນໃນເບື້ອງຕົ້ນ ຊາບຊື່ ທ້າວກິ ອາຍຸ 25 ປີ ອາຊີບເຮັດນາ ຢູ່ບ້ານ ສີບຸນເຮືອງ ເມືອງຈຳພອນ ທ້າວ ກີ ໄດ້ໃຫ້ການສາລະພາບວ່າ ຢາບ້າຈຳນວນ 996 ເມັດ ແມ່ນເປັນຜູ້ກ່ຽວແທ້ ເຊິ່ງໄດ້ຊື້ມາຈາກ ທ້າວ ຫຼ້າ ອາຍຸ ປະມານ 26 ປີ ຢູ່ຂອບເຂດບ້ານ ສະພັງແກ້ວ ເມືອງອາດສະພັງທອງ ໃນລາຄາ3.000.000 ກີບ ເພື່ອມາຂາຍຕໍ່ໃນລາຄາ ເມັດລະ 15.000 ກີບ ແລະ ໄວ້ເສບເອງຈຳນວນໜື່ງ ສ່ວນສະຖານທີ່ຂາຍ ແມ່ນຢູ່ຖຽງນາຂອງຜູ້ກ່ຽວ.


ຕໍ່ກັບຄະດີດັ່ງກ່າວຍັງຢູ່ໃນຂັ້ນຕອນ ດຳເນີນການ ສືບສວນ-ສອບສວນ ຂອງເຈົ້າໜ້າທີ່ເພື່ອຊອກຫາຜູ້ຮ່ວມຂະບວນການມາດຳເນີນຄະດີຕາມລະບຽບກົດໝາຍຕໍ່ໄປ.
ຂ່າວ : ວິໄຊ ສຽງສະຫວັນ