ມອບອຸປະກອນໃນການຜະລິດກະສີກຳໃຫ້ແກ່ 10 ບ້ານຂອງເມືອງຕຸ້ມລານ

545

ວັນທີ 12 ພຶດສະພາ 2020 ອົງການສຸພັນນິມິດ ປະຈໍາແຂວງສາລະວັນ ປະສານສົບທົບກັບຫ້ອງການກະສີກຳ ແລະ ປ່າໄມ້ເມືອງຕຸ້ມລານ ໄດ້ລົງມອບອຸປະກອນໃນການຜະລິດກະສີກຳ ເພື່ອໂພສະນາການ ແລະ ສຸຂະພາບທີດີ ໃຫ້ແກ່ 10 ບ້ານຂອງເມືອງຕຸ້ມລານ, ເຊິ່ງຈັດຂຶ້ນຢູ່ຫ້ອງການບ້ານຕະເວີຍ ໃຫ້ກຽດເຂົ້າຮ່ວມຂອງທ່ານ ສົມຄິດ ກອງໄຊສະຫວັນ ຮອງເລຂາພັກເມືອງ ຜູ້ຊີ້ນຳວຽກງານພັກ-ພະນັກງານ, ທ່ານ ພັນມະລີ ສີລິພົງ ຫົວໜ້າຫ້ອງການປະສານງານອົງການສຸພັນນິມິດແຂວງສາລະວັນ, ພາຍໃຕ້ການເປັນປະທານຂອງທ່ານ ບຸນຕີ ຈັນດີ ເລຂາໜ່ວຍພັກ-ນາຍບ້ານຕະເວີຍ ຕະຫຼອດຮອດພໍ່ແມ່ປະຊາຊົນເຂົ້າຮ່ວມ.

ໃນພິທີ ທ່ານ ບຸນຕີ ຈັນດີ ເລຂາໜ່ວຍພັກ-ນາຍບ້ານຕະເວີຍ ເມືອງຕຸ້ມລານ ແຂວງສາລະວັນ ໄດ້ລາຍງານສະພາບລວມໃນການຈັດຕັ້ງປະຕິບັດວຽກງານໃນໄລຍະຜ່ານມາຈົນເຖິງປັດຈຸບັນ, ບ້ານຕະເວີຍເປັນບ້ານໜຶ່ງທີນອນຢູ່ໃນບ້ານເປົ້າໝາຍຂອງເມືອງຕຸ້ມລານ ປະຊາຊົນສ່ວນໃຫຍ່ແມ່ນເຮັດນາປູກເຂົ້າເປັນຕົ້ນຕໍ່, ຕໍາແຜ່ນເປັນອາຊີບສຳຮອງ, ການປູກເຂົ້າຂອງພໍ່ແມ່ປະຊາຊົນຊາວເມືອງຕຸ້ມລານສ່ວນຫຼາຍແມ່ນເຮັດແບບທຳມະຊາດຕາມຄວາມລືງເຄີຍທີປະຕິບັດມາແຕ່ດັງເດີ່ມ ເຮັດໃຫ້ສະມັດຕະພາບຂອງຜົນຜະລິດຕ່ຳ, ເຮັດຫຼາຍໄດ້ຜົນຜະລິດໜ້ອຍ. ດັ່ງນັ້ນອົງການສຸພັນນິມິດຈຶ່ງຖືເອົາບັນຫາດັ່ງກ້າວເປັນບັນຫາໜຶ່ງສຳຄັນໂດຍກຳນົດເອົາ 10 ບ້ານຂອງເມືອງເປັນບ້ານຕົວແບບໃນການຜະລິດກະສີກໍາເພື່ອໂພສະນາການ ແລະ ສຸຂະພາບທີດີ


ມີ: ບ້ານຕະເວີຍ, ບ້ານຫ້ວຍຫວ້າ, ບ້ານດິນດາກ, ບ້ານໂພນງາມ, ບ້ານນາຮ່ອງໃຫຍ່, ບ້ານຕຸກລຸກ, ບ້ານນາລະຈ້າງ, ບ້ານດອນຊາດ, ບ້ານນາກະຕາວ ແລະ ບ້ານຫ້ວຍໄລ. ໂດຍກຳນົດ 3 ກຸ່ມການຜະລິດຄື: ກຸ່ມລ້ຽງໄກ່ ຈໍານວນ 24 ຄອບຄົວ, ກຸ່ມປູກເຂົ້າ ຈໍານວນ 168 ຄອບຄົວ ແລະ ກຸ່ມປູກພຶດສວນ ຈຳນວນ 87 ຄອບຄົວ. ພ້ອມທັງມີການສະໜອງວັດຖຸອຸປະກອນຮັບໃຊ້ເຂົ້າໃນການປູກ-ການລ້ຽງໃນຄັ້ງນີ້ທັງໝົດ 16 ລາຍການຄື: ສັງກະສີ, ເຫຼັກຕາປູ, ເຫຼັກໜາມໝາກຈັບ, ຮາງອາຫານໄກ່ນ້ອຍ, ຕຸກນໍ້ານ້ອຍສຳລັບໄກ່, ຕາໜ່າງເຫຼັກ, ອາຫານໄກ່ນ້ອຍ, ແນວພັນເຂົ້້າດອກຄຳ 8 ລຸ້ນ II, ໄນຜັກ, ຊ້ວານ, ຄາດ, ບົວຫົດນໍ້າ, ກາກນໍ້າຕານ, ລວດ, ຖັງນໍ້າ 200 ລິດ ແລະ ຜ້າຢາງ ລວມມູນຄ່າທັງໝົດ 199.037.000 ກີບ.

ກ່າວມອບໂດຍແມ່ນ ທ່ານ ພັນມະລີ ສີລິພົງ ຫົວໜ້າຫ້ອງການປະສານງານອົງການສຸພັນນິມິດແຂວງສາລະວັນ ຮັບ ໂດຍ ທ່ານ ບຸນຕີ ຈັນດີ ເລຂາໜ່ວຍພັກ-ນາຍບ້ານຕະເວີຍ ພ້ອມດ້ວຍການນຳຂັ້ນເມືອງ ແລະ ພໍ່ແມ່ປະຊາຊົນເປັນສັກຄີພິຍານ.

ພ້ອມດຽວກັນນີ້ທ່ານ ພັນມະລີ ສີລິພົງ ຫົວໜ້າຫ້ອງການປະສານງານອົງການສຸພັນນິມິດແຂວງສາລະວັນ ກໍ່ໄດ້ມີຄຳເຫັນບາງບັນຫາທີສຳຄັນເປັນຕົ້ນແມ່ນ: ແໜັ້ນໃຫ້ບັນດາກຸ່ມການຜະລິດໃນແຕ່ລະກຸ່ມຈົງເອົາໃຈໃສ່ໃນການຈັດຕັ້ງປະຕິບັດຕາມແນວທາງທີທາງໂຄງການກຳນົດໄວ້, ນຳໃຊ້ອຸປະກອນຕ່າງໆໃຫ້ເກີດປະໂຫຍດ ແລະ ສອດຄ່ອງໃນແຕ່ລະໜ້າວຽກ ທັງນີ້ກໍເພື່ອຮັບປະກັນໃຫ້ປະຊາຊົນມີຢູ່ມີກິນ ແລະ ຫຼຸດຜົນອອກຈາກຄວາມທຸກຍາກເທື່ອລະກ້າວ ຕາມແນວທາງພັກ ແລະ ລັດຖະບານຂອງພວກເຮົາ.

ໂດຍ: ວຽງສະຫວັນ ແສນຄຳ(ນັກຂ່າວຕຸ້ມລານ)