ລ້ານຊ້າງ ມີເນໂຣນສ໌ ສ​ືບ​ຕໍ່ສະໜັບສະໜູນ ອຸປະກອນການແພດ ຕ້ານພະຍາດ ໂຄວິດ-19

483

ເມື່ອບໍ່ດົນມານີ້, ບໍລິສັດ ລ້ານຊ້າງ ມີເນໂຣນສ໌ ລິມິເຕັດ (ລຊມລ) ບໍ່ຄຳ-ທອງເຊໂປນ ໄດ້ສືບຕໍ່ສະໜັບສະໜູນ ອຸປະກອນການແພດ ໃຫ້ແກ່ໂຮງໝໍແຂວງສະຫວັນນະເຂດ ມູນຄ່າ 180.000.000 ແລະ ເມືອງວິລະບູລີ ແຂວງ ສະຫວັນນະເຂດ ມູນຄ່າ 101.500.000 ກີບ ເພື່ອນຳໃຊ້ເຂົ້າໃນການປ້ອງກັນການລະບາດຂອງພະຍາດ ໂຄວິດ-19 ຢູ່ ສປປ ລາວ. ກ່ອນໜ້ານີ້ ບໍລິສັດດັ່ງກ່າວ, ໄດ້ໃຫ້ການສະໜັບສະໜູນ ອຸປະກອນແພດ ປະກອບມີ: ໜ້າກາກອະນາໄມ, ເຄື່ອງກວດອຸນຫະພູມຮ່າງກາຍ, ນ້ຳຢາລ້າງມື, ເຄື່ອງພົ່ນຢາຂ້າເຊື້ອດ້ວຍໄຟຟ້າ ພ້ອມດ້ວຍນ້ຳຢາຂ້າເຊື້ອ ໃຫ້ເມືອງວິລະບູລີ ແລະ ແຂວງສະຫວັນນະເຂດ ມູນຄ່າ 142.000.000 ກີບ.

ທ່ານ ສະໝານ ອະເນກາ ຜູ້ອຳນວຍການໃຫຍ່ຂອງ ລຊມລ ໃຫ້ຮູ້ວ່າ: ໃນໄລຍະການຜ່ອນຜັນບາງ ມາດຕະການ ທີ່ທາງຄະນະສະເພາະກິດປ້ອງກັນ ຄວບຄຸມ ແລະ ແກ້ໄຂ ການລະບາດຂອງພະຍາດ ໂຄວິດ-19 ວາງອອກ, ພະນັກງານຕ່າງໆລວມໄປເຖິງແພດໝໍ ແລະ ປະຊາຊົນໃນຂອບເຂດ ເມືອງວິລະບູລີ ແລະ ແຂວງສະຫວັນນະເຂດ ຍັງໄດ້ເຝົ້າລະວັງ ແລະ ກະກຽມພ້ອມທຸກດ້ານ ໂດຍສະເພາະ ອຸປະກອນການແພດຕ່າງ ເພື່ອກຽມຮັບມື ຕໍ່ກັບການລະບາດ ຂອງພະຍາດໂຄວິດ-19 ໃນຕໍ່ໜ້າ.

ນອກຈາກຈະໃຫ້ການຊ່ວຍເຫລືອແກ່ ເມືອງວິລະບູລີ ແລະ ສະຫວັນນະເຂດແລ້ວ, ບໍລິສັດ ຍັງມອບເງິນສົດ ຈຳນວນ 15.000 ໂດລາສະຫະລັດ ໃຫ້ແກ່ກະຊວງພະລັງງານ ແລະ ບໍ່ແຮ່ ເພື່ອປະກອບສ່ວນເຂົ້າໃສ່ທຶນ ທີ່ທາງສະມາຄົມມິດຕະພາບລາວ-ຈີນ ຮ່ວມກັບນະຄອນຫລວງວຽງຈັນ ໄດ້ຈັດງານລະດົມທຶນ ເພື່ອໄປຊ່ວຍເຫລືອປະຊາຊົນຜູ້ປະສົບເຄາະຮ້າຍຈາກພະຍາດໂຄວິດ-19 ຢູ່ ສປ ຈີນ ອີກດ້ວຍ.