ຜູ້ຕິດເຊື້ອໂຄວິດ-19 ກໍລະນີທີ 14 ທີ່ມາຕິດຕາມຄືນ ໄດ້ອອກໂຮງໝໍໃນມື້ນີ້

506

ຄະນະສະເພາະກິດ ແຈ້ງຂ່າວດີໃຫ້ຊາບໃນມື້ນີ້ວ່າ ຜູ້ຕິດເຊື້ອໂຄວິດ-19 ກໍລະນີທີ 14 ທີ່ເອົາກັບຄືນມານອນຕິດຕາມອາການຢູ່ໂຮງໝໍ ໄດ້ໃຫ້ອອກໂຮງໝໍໃນມື້ນີ້ ພາຍຫຼັງກວດຫາເຊື້ອສອງຄັ້ງຕິດຕໍ່ກັນບໍ່ພົບເຊື້ອ.

ກໍລະນີທີ 14 ນີ້ ແມ່ນເພດຍິງ ອາຍຸ 20 ປີ ນັກສຶກສາລາວ ມາແຕ່ປະເທດອັງກິດ ປະຈຸບັນຢູ່ບ້ານ ຊ້າງຄູ້, ເມືອງໄຊທານີ, ນະຄອນຫຼວງວຽງຈັນ, ເຊິ່ງຜູ້ກ່ຽວໄດ້ມານອນຕິດຕາມອາການຄືນຢູ່ໂຮງໝໍ ໃນຕົ້ນເດືອນພຶດສະພາ ທັງນີ້ກໍ່ເນື່ອງຈາກວ່າ ອອກໂຮງໝໍໄປຈໍາກັດບໍລິເວນຕິດຕາມອາການຕົນເອງຢູ່ເຮືອນ ຄົບ 14 ວັນ ແລ້ວກັບມາກວດຄືນ ເຫັນວ່າພົບເຊື້ອ. ມື້ນີ້ ຜູ້ກ່ຽວແມ່ນໄດ້ອອກໂຮງໝໍ ຫຼັງຈາກນອນຕິດຕາມຢູ່ໂຮງໝໍ ໄລຍະໜຶ່ງ ແລະ ກວດຫາເຊື້ອສອງຄັ້ງຕິດຕໍ່ກັນພາຍໃນ 24 ຊົ່ວໂມງ ບໍ່ພົບເຊື້ອ.

ຄະນະສະເພາະກິດ ແຈ້ງໃຫ້ຊາບຕື່ມອີກວ່າ ປະຈຸບັນ ຍັງມີຜູ້ນອນຕິດຕາມອາການຢູ່ໂຮງໝໍມິດຕະພາບ ພຽງແຕ່ 5 ຄົນ, ເຊິ່ງທັງໝົດ ເຫັນວ່າມີອາການປົກກະຕິ ແລະ ຈະໄດ້ກວດວິເຄາະຫາເຊື້ອຄືນພາຍໃນອາທິດນີ້ ຖ້າຫາກວ່າຜົນກວດສອງຄັ້ງຕິດຕໍ່ກັນ ບໍ່ພົບເຊື້ອ ແມ່ນຈະໄດ້ອອກໂຮງໝໍ ເພື່ອເມືອຈໍາກັດບໍລິເວນ ແລະ ຕິດຕາມອາການຢູ່ເຮືອນຕື່ມອີກ 14 ວັນ.

ນັບແຕ່ເດືອນມັງກອນ ຮອດ ວັນທີ 12 ພຶດສະພາ 2020 ໄດ້ເກັບຕົວຢ່າງມາກວດ ທັງໝົດ ມີ 3,975 ຕົວຢ່າງ, ກວດພົບເຊື້ອທັງໝົດແມ່ນ 19 ຄົນເທົ່າເດີມ ແລະ ກໍ່ເປັນ 31 ມື້ຕິດຕໍ່ກັນແລ້ວທີ່ບໍ່ພົບຜູ້ຕິດເຊື້ອໃໝ່ ຢູ່ ສປປ ລາວ.