ອອກ​ໂຮງ​ໝໍ​ເພີ່ມ​ອີກ 1 ຄົນ​ວັນນີ້ ແລະ ເດືອນກວ່າແລ້ວທີ່ ສປປ ລາວ ບໍ່ພົບຜູ້ຕິດເຊື້ອໂຄວິດ-19 ເພີ່ມ

465

ເປັນເວວາ 31 ມື້ຕິດຕໍ່ກັນທີ່ ສປປ ລາວ ບໍ່ພົບຜູ້ຕິດເຊື້ອໂຄວິດ-19 ເພີ່ມ, ຍອດຜູ້ຕິດເຊື້ອສະສົມລວມຍັງຄົງທີ່ 19 ຄົນ ແລະ ປິ່ນປົວດີອອກໂຮງໝໍເພີ່ມ 1 ຄົນໃນວັນນີ້

ໃນວັນທີ 13 ພຶດສະພາ 2020 ທີ່ກະຊວງສາທາລະນະສຸກ, ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໄດ້ຖະແຫຼງຂ່າວລາຍງານສະພາບການລະບາດຂອງພະຍາດໂຄວິດ-19 ໃນ ສປປ ລາວ ໂດຍການຖະແຫຼງຂອງ ທ່ານ ຮສ.ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈໍາການຄະນະສະເພາະກິດຄວບຄຸມພະຍາດໂຄວິດ-19 ແລະ ມີສື່ມວນຊົນເຂົ້າຮ່ວມ.

ທ່ານ ຮສ.ດຣ ພູທອນ ເມືອງປາກ ໃຫ້ຮູ້ວ່າ: ຜົນການກວດເກັບຕົວຢ່າງກວດຫາເຊື້ອໂຄວິດ-19 ທັງໝົດ 101 ຄົນ ໃນວັນທີ 12 ພຶດສະພາ 2020 ເຊິ່ງຜົນກວດທັງໝົດ 101 ຄົນ ແມ່ນບໍ່ພົບຜູ້ຕິດເຊື້ອ ແລະ ນັບເປັນ 31 ມື້ແລ້ວທີ່ລາວເຮົາ ບໍ່ມີຜູ້ຕິດເຊື້ອໃໝ່.

ໃນຂະນະທີ່ວັນນີ້ໄດ້ມີຄົນເຈັບກໍລະທີ 14 ທີ່ກັບມາປິນປົວອີກ​ຄັ້ງ ແລ້ວຜ່ານການກວດວິເຄາະຫາເຊື້ອ 2 ຄັ້ງແລ້ວ ແມ່ນບໍ່ພົບເຊື້ອ​ໂຄວິດ-19 ແລະ ໄດ້ໃຫ້ອອກໂຮງໝໍແລ້ວໃນວັນນີ້. ຜູ້ນອນຕິດຕາມອາການຢູ່ໂຮງໝໍຍັງ​ເຫຼືອ​ພຽງ​ແຕ່ 5 ຄົນ ແລະ ປິ່ນປົວຫາຍດີອອກໂຮງໝໍແລ້ວ 14 ຄົນ