ບໍລິສັດ ໄຟຟ້ານ້ຳກົງ 1 ຈໍາກັດ ມອບເຄື່ອງຊ່ວຍ ແຂວງອັດຕະປື ລວມມູນຄ່າ 80 ລ້ານກີບ

615

ບໍລິສັດ ໄຟຟ້ານ້ຳກົງ 1 ຈໍາກັດ ມອບເຄື່ອງຊ່ວຍ ແຂວງອັດຕະປື ລວມມູນຄ່າ 80 ລ້ານກີບ ໃຫ້ຄະນະສະເພາະກິດ ເພື່ອການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19.

ບໍລິສັດ ໄຟຟ້ານ້ຳກົງ 1 ຈໍາກັດ ໄດ້ນໍາເອົາ ອຸປະກອນທາງການແພດ ແລະ ນ້ຳດື່ມ ມາມອບ ໃຫ້ຄະນະສະເພາະກິດ ເພື່ອການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ແຂວງ ອັດຕະປື ເຊິ່ງປະກອບມີ 2 ລາຍການດັ່ງນີ້: ຜ້າອັດປາກ ຈໍານວນ 20.000 ອັນ ແລະ ນ້ຳດື່ມ ຈຳນວນ 25 ແກັດ, ລວມມູນຄ່າທັງໝົດ 80 ລ້ານກີບ. ເພື່ອເປັນການປະກອບສ່ວນເຂົ້າໃນວຽກງານການປ້ອງກັນ, ຄວບຄຸມ ແລະ ເເກ້ໄຂການລະບາດຂອງພະຍາດ ໂຄວິດ-19. ພິທີມອບ-ຮັບ ດັ່ງກ່າວແມ່ນໄດ້ຈັດຂຶ້ນ ໃນວັນທີ 12 ພຶດສະພາ 2020 ນີ້, ທີ່ພະແນກສາທາລະນະສຸກ ແຂວງ ອັດຕະປື, ໃຫ້ກຽດມອບໂດຍທ່ານ ເສີນ ຢູ້ ສວຽນ ຜູ້ອຳນວຍການບໍລິສັດ ໄຟຟ້ານ້ຳກົງ 1 ຈໍາກັດ ແລະ ກ່າວຮັບໂດຍ ທ່ານ ນາງ ດຣ ອ່ອນຜິວ ໂພທິລາດ ຫົວໜ້າພະເເນກສາທາລະນະສຸກແຂວງ, ທັງເປັນຮອງປະທານຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແຂວງ ອັດຕະປື, ໂດຍຊ້ອງໜ້າພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນພິຍານ.

ໃນໂອກາດດັ່ງກ່າວ, ທ່ານ ນາງ ດຣ ອ່ອນຜິວ ໂພທິລາດ ຫົວໜ້າພະເເນກສາທາລະນະສຸກແຂວງ, ຕາງໜ້າໃຫ້ອໍານາດການປົກຄອງແຂວງ ໄດ້ຂຶ້ນມອບໃບຍ້ອງຍໍໃຫ້ ແລະ ກ່າວສະແດງຄວາມຂອບໃຈມາຍັງ ບໍລິສັດ ໄຟຟ້ານ້ຳກົງ 1 ຈໍາກັດ ທີ່ໄດ້ເປັນສ່ວນໜຶ່ງໃນການປະກອບສ່ວນຊ່ວຍເຫຼືອ ແຂວງອັດຕະປື ໃນການຕອບໂຕ້, ປ້ອງກັນ ແລະ ຄວບຄຸມພະຍາດ ດັ່ງກ່າວ, ບໍ່ໃຫ້ເກີດຂຶ້ນຢູ່ພາຍໃນແຂວງ ແລະ ຈະນໍາໃຊ້ເຄື່ອງດັ່ງກ່າວເຂົ້າໃນວຽກງານ ໃຫ້ຖືກເປົ້າໝາຍ ແລະ ເກີດປະໂຫຍດສູງສຸດ.
#ຂ່າວ: ສຸກສະໄໝ