ໜຶ່ງເດືອນ ທີ່ລາວເຮົາບໍ່ມີຜູ້ຕິດເຊື້ອເພີ່ມ

415

ຂ່າວດີທີຫຼາຍຄົນໃນປະເທດລາວປາຖະໜານັ້ນກໍ່ຄືບໍ່ຢາກໃຫ້ມີຜູ້ຕິດເຊື້ອໃໝ່ເພີ່ມ ແລະ ມື້ນີ້ກໍ່ຖືສວ່າເປັນຂ່າວດີອີກ ເພາະເປັນມື້ທີ 30 (1 ເດືອນເຕັມ) ທີ່ລາວເຮົາບໍ່ມີຜູ້ຕິດເຊື້ອໃໝ່ ສະນັ້ນຕົວເລກສະສົມຜູ້ຕິດເຊື້ອ ຍັງຢູ່ທີ່ 19 ຄົນເທົ່າເດີມ, ແຕ່ຂໍໃຫ້ທຸກຄົນໃນປະເທດຈົ່ງປັບປ່ຽນວິຖີການດຳລົງຊີວິດຂອງຕົນເອງ.


ໃນວັນທີ 12 ພຶດສະພາ 2020 ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ໃຫ້ຖະແຫຼງຂ່າວ, ທີ່ກະຊວງສາທາລະນະສຸກ ໂດຍມີບັນດາສື່ມວນຊົນເຂົ້າຮ່ວມ.

ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ໄດ້ກ່າວວ່າ: ສະພາບການເຝົ້າລະວັງ ໂຄວິດ-19 ຢູ່ ສປປ ລາວ ຮອດ 5 ໂມງແລງ ຂອງວັນທີ 11 ພຶດສະພາ 2020 ວຽກງານຈຸດຜ່ານດ່ານ ຈໍານວນຜູ້ເດີນທາງເຂົ້າມາ ມີທັງໝົດ 1,789 ຄົນ, ຈຸດຜ່ານດ່ານລາວ-ໄທ ທັງໝົດ 1.009 ຄົນ, ໃນນັ້ນ ມີແຮງງານລາວກັບມາຈາກປະເທດໄທ ຜ່ານດ່ານຊ່ອງເມັກ ແຂວງຈຳປາສັກ 31 ຄົນ, ເຫຼືອນັ້ນ ແມ່ນຜູ້ຂັບລົດຂົນສົ່ງສິນຄ້າ.ຈຸດຜ່ານດ່ານລາວ-ຈີນ ທັງໝົດ 10 ຄົນ, ທັງໝົດ ແມ່ນຜູ້ຂັບລົດຂົນສົ່ງສິນຄ້າ. ຈຸດຜ່ານດ່ານລາວ-ຫວຽດ ທັງໝົດ 765 ຄົນ, ທັງໝົດແມ່ນຜູ້ຂັບລົດຂົນສົ່ງສິນຄ້າ. ຈຳນວນຜູ້ເດີນທາງຜ່ານສະໜາມບິນສາກົນວັດໄຕ 5 ຄົນ (ລາວ 4 ຄົນ, ຈີນ 1 ຄົນ, ທັງໝົດເຂົ້າມາໃນວັນທີ 10 ພຶດສະພາ 2020).ໃນທຸກດ່ານ ແມ່ນໄດ້ກວດວັດອຸນຫະພູມຮ່າງກາຍ ແລະ ບໍ່ມີຄົນເປັນໄຂ້,ສຳລັບແຮງງານລາວ ຈຳນວນ 31 ຄົນ ທີ່ເຂົ້າມາໃໝ່ ຜ່ານດ່ານຊ່ອງເມັກ ແຂວງຈຳປາສັກນັ້ນ ແມ່ນມີຖິ່ນຖານມາຈາກ ແຂວງຈຳປາສັກ 27 ຄົນ, ສະຫວັນນະເຂດ 03 ຄົນ ແລະ ໄຊຍະບູລີ 01 ຄົນ. ແຮງງານທັງໝົດໄດ້ເກັບຕົວຢ່າງມາກວດ ແລະ ນຳສົ່ງໄປຈຳກັດບໍລິເວນຢູ່ສູນຂອງແຂວງ ຈົນກ່ວາຈະຄົບກຳນົດ 14 ວັນ.

ທ່ານກ່າວຕື່ມວ່າ: ສຳລັບການເຝົ້າລະວັງ ແລະ ວິເຄາະ ໃນວັນທີ 11 ພຶດສະພາ 2020, ໄດ້ເກັບຕົວຢ່າງມາກວດທັງໝົດ 327 ຄົນ, ໃນນັ້ນ ມີກໍລະນີສົງໄສ 41 ຄົນ, ຜູ້ຕິດເຊື້ອທີ່ເອົາກັບຄືນມານອນຕິດຕາມຢູ່ໂຮງໝໍ 01 ຄົນ (ຜູ້ນ້ຳເບີ 14), ແຮງງານລາວທີ່ກັບມາຈາກປະເທດໄທ 99 ຄົນ, ແຮງງານໄທທີ່ເຂົ້າມາລາວ 169 ຄົນ ແລະ ແຮງງານຫວຽດທີ່ເຂົ້າມາລາວ 17 ຄົນ. ຈາກຜົນກວດທັງໝົດຂອງແຮງງານລາວ, ແຮງງານໄທ, ແຮງງານຫວຽດ ທີ່ເຂົ້າມາ ແລະ ກໍລະນີສົງໄສຂອງມື້ວານນີ້ ບໍ່ພົບເຊື້ອ. ໝາຍຄວາມວ່າໃນວັນທີ 11 ພຶດສະພາ 2020 ບໍ່ມີຜູ້ຕິດເຊື້ອໃໝ່. ນັບແຕ່ເດືອນມັງກອນ ຮອດ ວັນທີ 11 ພຶດສະພາ 2020 ໄດ້ເກັບຕົວຢ່າງມາກວດທັງໝົດ ມີ 3,874 ຕົວຢ່າງ, ກວດພົບເຊື້ອສະສົມ 19 ຄົນ (30 ມື້ແລ້ວທີ່ບໍ່ພົບຜູ້ຕິດເຊື້ອໃໝ່). ການຕິດຕາມຜູ້ເດີນທາງມາຈາກຕ່າງປະເທດໂດຍສະເພາະແຮງງານລາວ ຢູ່ສະຖານທີ່ຈຳກັດບໍລິເວນຕ່າງໆຂອງແຂວງ ປະຈຸບັນນີ້ທົ່ວປະເທດ ມີສູນຈໍາກັດບໍລິເວນ ທັງໝົດ 60 ສູນ, ມີຜູ້ຈຳກັດບໍລິເວນຢູ່ສູນ 1,847 ຄົນ, ໄດ້ເກັບຕົວຢ່າງມາກວດວິເຄາະ ທັງໝົດນີ້ບໍ່ມີຜູ້ຕິດເຊື້ອ.
ການຕິດຕາມປີ່ນປົວຄົນເຈັບຢູ່ໂຮງໝໍ ປະຈຸບັນນີ້ ມີຜູ້ນອນຕິດຕາມຢູ່ໂຮງໝໍມິດຕະພາບ 6 ຄົນ ລວມທັງນ້ຳເບີ 14 ທີ່ເອົາກັບຄືນມານອນຕິດຕາມອາການຢູ່ໂຮງໝໍ, ທັງໝົດເຫັນວ່າມີອາການເບົາບາງ ແລະ ສືບຕໍ່ຕິດຕາມອາການ ແລະ ກວດວິເຄາະຊອກຫາເຊື້ອອີກໃນໜື່ງອາທິດຕໍ່ໜ້າ.
ທ່ານໃຫ້ຢໍ້າຕື່ມວ່າ: ການປະຕິບັດມາດຕະການຜ່ອນຜັນ ຮອດວັນທີ 17 ພຶດສະພາ ຍັງມີຄວາມຈຳເປັນທີ່ຈະຕ້ອງໄດ້ເອົາໃຈໃສ່ ວິທີປ້ອງກັນການຕິດເຊື້ອ ແລະ ການແຜ່ເຊື້ອພະຍາດ ເພື່ອສະກັດກັ້ນບໍ່ໃຫ້ມີກໍລະນີໃໝ່ເກີດຂຶ້ນ. ປັດໄຈສໍາຄັນທີ່ສຸດ ແມ່ນຂຶ້ນກັບພຶດຕິກໍາຂອງພວກເຮົາໝົດທຸກຄົນທີ່ຈະປັບປຸງວິຖີຊີວິດໃໝ່ຂອງຕົນ ຕາມຄຳແນະນຳຂອງຄະນະສະເພາະກິດ ເຊິ່ງຄະນະສະເພາະກິດຈະໄດ້ປະເມີນສະພາບການຄືນໃໝ່ ວ່າຄວນສືບຕໍ່ປະຕິບັດມາດຕະການໃດຕື່ມ ຫຼື ຄວນຈະຍົກເລິກມາດຕະການໃດຕື່ມອີກ.

ສະນັ້ນ, ຈຶ່ງຮຽກຮ້ອງໃຫ້ທຸກພາກສ່ວນໃນສັງຄົມ ມີຄວາມອົດທົນພະຍາຍາມ ເອົາໃຈໃສ່ ຮ່ວມແຮງຮ່ວມໃຈກັນ ຈັດຕັ້ງປະຕິບັດຄຳແນະນຳ ແລະ ມາດຕະການຕ່າງໆ ໃຫ້ຖືກຕ້ອງ ແລະ ເຂັ້ມງວດ. ໂດຍສະເພາະ ການລ້າງມືດ້ວຍນໍ້າສະອາດ ແລະ ສະບູ ຫຼື ໃຊ້ເຈວລ້າງມືຂ້າເຊື້ອດ້ວຍເຫຼົ້າ 70% ຂື້ນໄປ, ການປະຕິບັດໄລຍະຫ່າງ, ການໃສ່ຜ້າປິດປາກ-ດັງ ເວລາອອກຈາກບ້ານ ຫຼື ໄປສະຖານທີ່ບໍລິການຕ່າງໆ.