ເມືອງເຊບັ້ງໄຟ ສືບຕໍ່ເຂັ້ມງວດປ້ອງກັນ ແລະ ຄວບຄຸມພະຍາດ ໂຄວິດ-19

538

ໃນວັນທີ 9 ພຶດສະພາ 2020 ຜ່ານມານີ້ ທ່ານ ດຣ ຜາສຸກ ຄຳມະນີທອງ ຮອງຫົວໜ້າພະແນກສາທາລະນະສຸກແຂວງ ທັງເປັນຫົວໜ້າກອງເລຂາຄະນະສະເພາະກິດປ້ອງກັນ, ຄວບຄຸມ ແລະ ສະກັດກັ້ນ ພະຍາດໂຄວິດ-19 ຂອງແຂວງຄຳມ່ວນ ພ້ອມດ້ວຍຄະນະ ໄດ້ເຄື່ອນໄຫວຕິດຕາມສະພາບຢູ່ເມືອງເຊບັ້ງໄຟ ເຊິ່ງທ່ານ ດຣ ໄຊສົມຫວັງ ເດດທະວົງສັກ ອຳນວຍການໂຮງໝໍເມືອງເຊບັ້ງໄຟ ທັງເປັນຫົວໜ້າກອງເລຂາຂັ້ນເມືອງໄດ້ລາຍງານການຈັດຕັ້ງປະຕິບັດ ໄລຍະຜ່ານມາໄດ້ປິດສູນ ແລະ ຝົ່ນຢາ 42 ສູນ ໄດ້ 100% ແລະ ໄດ້ນຳແຮງງານທີ່ກັບມາຈາກຕ່າງປະເທດໃໝ່ໃໝ່ ໃນຄັ້ງວັນທີ 8 ພຶດສະພາ 2020 ຈຳນວນ 8 ຄົນ, ຍິງ 2 ຄົນແມ່ນໄດ້ນຳສົ່ງເຂົ້າກັກກັນຢູ່ສູນທີ່ເມືອງໄດ້ກະກຽມໄວ້ ແລະ ແຮງງານທີ່ກຳລັງເດີນທາງກັບມາ 5 ຄົນກໍ່ເຊັ່ນກັນ


ຈາກນັ້ນ ທ່ານ ທອງໄຊ ມັງໜໍ່ເມກ ເຈົ້າເມືອງໆເຊບັ້ງໄຟ ທັງເປັນຫົວໜ້າຄະນະສະເພາະກິດຂັ້ນເມືອງ ໄດ້ລາຍງານເພີ້ມຕື່ມກ່ຽວກັບວຽກງານປ້ອງກັນ, ຄວບຄຸມ ແລະ ສະກັດກັ້ນພະຍາດໂຄວິດ-19 ຂັ້ນເມືອງ ພາຍຫຼັງໄດ້ຈັດຕັັ້ງປະຕິບັດ ນັບແຕ່ວັນທີ 25 ມີນາ ມາຮອດປັດຈຸບັນ ເມືອງເຊບັ້ງໄຟໄດ້ມີການຈັດກອງປະຊຸມສະຫຼຸບຕີລາຄາ, ຖອດຖອນບົດຮຽນ ໃນການຈັດຕັ້ງປະຕິບັດໃນຄັ້ງວັນທີ 28 ເມສາ 2020. ເຊິ່ງເມືອງເຊບັ້ງໄຟ ມີສູນກັກກັນທັງໝົດ 42 ສູນ ມີ ຈຳນວນ ຄົນເຂົ້າກັກກັນທັງໝົດ 829 ຄົນ, ຍິງ 387 ຄົນ. ໃນນັ້ນໄດ້ກັກກັນບໍລິເວນຄົບຕາມຈໍານວນ 14 ວັນ ແລະ ໄດ້ປິດສູນກັກກັນໃນວັນທີ 19 ເມສາ 2020, ບໍ່ພົບຜູ້ຕິດເຊື້ອ ຫຼື ມີອາການ, ເຊິ່ງມາຮອດປັດຈຸບັນ ທຸກໆຫ້ອງການພາຍໃນເມືອງ ແລະ ບ້ານ ແມ່ນຍັງສືບຕໍ່ຈັດຕັ້ງປະຕິບັດ ບັນດາມາດຕະການຕ່າງໆຢ່າງເຂັ້ມງວດ ໂດຍສະເພາະແມ່ນໄດ້ອອກແຈ້ງການກ່ຽວກັບການຕໍ່ເວລາ ແລະ ການແນະນຳເພີ່ມເຕີມກ່ຽວກັບການປະຕິບັດຄຳສັ່ງຂອງນາຍົກລັກຖະມົນຕີ ສະບັບເລກທີ 06 /ນຍ.


ໃນຕອນທ້າຍ ທ່ານ ດຣ ຜາສຸກ ຄຳມະນີທອງ ກໍ່ໄດ້ເນັ້ນໜັກໃຫ້ທຸກພາກສ່ວນ ເພີ້ມທະວີຄວາມເປັນເຈົ້າການ ໃນການຕິດຕາມກວດກາເຝົ້າລະວັງແຮງງານທີ່ເດີນທາງມາຈາກຕ່າງປະເທດ ເພື່ອເຮັດໃຫ້ວຽກງານການປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ບໍ່ໃຫ້ມີການເກີດ ແລະ ແຜ່ລະບາດຢູ່ພາຍໃນເມືອງຂອງຕົນ. ໂອກາດດັ່ງກ່າວຄະນະສະເພາະກິດຂັ້ນແຂວງ, ຂັ້ນເມືອງ ຍັງໄດ້ລົງຢ້ຽມຢາມຢູ່ສູນກັກກັນໃໝ່ຂອງເມືອງ ຢູ່ບ້ານບຶງຫົວນາ ເຊິ່ງເປັນສູນທີ່ໄວ້ຮອງຮັບບັນດາແຮງງານທີ່ກັບມາໃໝ່ ເຂົ້່າກັກກັນບໍລິເວນເພື່ອຕິດຕາມອາການ.