ທະຫານແຂວງອຸດົມໄຊ ມອບລົດຈັກໃຫ້ບັນດາກົມກອງປ້ອງກັນເສັ້ນທາງລົດໄຟລາວ-ຈີນ

611

ກອງບັນຊາການທະຫານແຂວງອຸດົມໄຊ ໄດ້ມອບລົດຈັກໃຫ້ບັນດາກົມກອງທີ່ເຄື່ອນໄຫວເຮັດໜ້າທີ່ປ້ອງກັນໂຄງການກໍ່ສ້າງເສັ້ນທາງລົດໄຟລາວ – ຈີນ, ໂດຍການເປັນກຽດເຂົ້າຮ່ວມຂອງ ພັນໂທ ວຽງໄຊ ຍົມມະລາ ຄະນະພັກກອງບັນຊາການ ຮອງຫົວໜ້າຫ້ອງເສນາທິການທະຫານແຂວງອຸດົມໄຊ, ມີຄະນະພັກ-ຄະນະບັນຊາກອງບັນຊາການທະຫານເມືອງນາໝໍ້, ເມືອງງາ, ເມືອງໄຊ, ກອງພັນນ້ອຍ 414, ກອງຮ້ອຍ 28 ແລະ ພະແນກການກ່ຽວຂ້ອງເຂົ້າຮ່ວມ.

ໂອກາດນີ້ ພັນຕີ ສົມອົກ ສຸວັນນະສິງ ຫົວໜ້າພະແນກສູ້ຮົບ ໄດ້ຜ່ານຂໍ້ຕົກລົງຂອງກອງບັນຊາການທະຫານແຂວງ ອຸດົມໄຊ ວ່າດ້ວຍການມອບພາຫະນະລົດຈັກໃຫ້ບັນດາກົມກອງທີ່ເຄື່ອນໄຫວເຮັດໜ້າທີ່ປ້ອງກັນໂຄງການກໍ່ສ້າງເສັ້ນທາງລົດໄຟລາວ-ຈີນ, ໂດຍອິງຕາມແຜນການ ເຄື່ອນໄຫວຂອງກົມໃຫຍ່ເສນາທິການກອງທັບ ວ່າດ້ວຍການປ້ອງກັນໂຄງການກໍ່ສ້າງ ເສັ້ນທາງລົດໄຟລາວ-ຈີນ ແລະ ການຄົ້ນຄວ້າເຫັນດີເປັນເອກະພາບຂອງຄະນະພັກ-ຄະນະກອງບັນຊາການທະຫານແຂວງ ອຸດົມໄຊ ແລະ ອານຸກຳມະການປ້ອງກັນໂຄງການກໍ່ສ້າງ ເສັ້ນທາງລົດໄຟລາວ-ຈີນ ໂດຍມອບລົດຈັກ ຮອນດ້າ ຈຳນວນ 9 ຄັນ ປະກອບມີ:

ລົດຈັກຮອນດ້າເວບໄອ 125 ຈໍານວນ 4 ຄັນ, ລົດຈັກຮອນດ້າເວບ 100 ຈໍານວນ 5 ຄັນໃຫ້ແຕ່ລະຈຸດປ້ອງກັນໂຄງການກໍ່ສ້າງເສັ້ນທາງລົດໄຟ, ໃນນີ້ໄດ້ປະກອບໃຫ້ກອງບັນຊາການທະຫານເມືອງ ນາໝໍ້ 2 ຄັນ, ເມືອງງາ 2 ຄັນ, ເມືອງໄຊ 1 ຄັນ, ກອງພັນນ້ອຍ 414 2 ຄັນ, ກອງຮ້ອຍ 28 1 ຄັນ, ກອງຮ້ອຍປ້ອງກັນທີ່ຕັ້ງ 1ຄັນ ເພື່ອນໍາໃຊ້ເຂົ້າໃນວຽກງານລວມຂອງກົມກອງ, ຕາມພາລະບົດບາດ ສິດໜ້າ ທີ່ຄວາມຮັບຜິດຊອບ, ເຊິ່ງກົມກອງມີໜ້າທີ່ປົກປັກຮັກສາ, ສ້ອມແປງໃຫ້ເປັນປົກກະຕິຮັບປະກັນຄວາມປອດໄພ ແລະ ນໍາໃຊ້ໄດ້ຍາວນານ ທັງນີ້ກໍເພື່ອຕອບສະໜອງຕາມຄວາມຮຽກຮ້ອງຕ້ອງການໃນການເຄື່ອນໄຫວປະຕິບັດໜ້າທີ່ ຂອງກົມກອງໃຫ້ມີຄວາມສະດວກວ່ອງໄວຕື່ມອີກ.

ໂດຍ: ທະນູວັນ