ບໍລິຄຳໄຊ ປະກາດການນຳຂັ້ນແຂວງຮັບບຳນານ ແລະ ແຕ່ງຕັ້ງຍົກຍ້າຍຫຼາຍຕຳແໜ່ງ

1131

ພິທີປະກາດ-ປັບປຸງການຈັດຕັ້ງການນຳຂັ້ນສູງພັກການຮັບອຸດໜູນບຳນານ ແລະ ຍົກຍ້າຍບ່ອນປະຈຳການຂອງພະນັກງານຫຼັກແຫຼ່ງຈຳນວນໜຶ່ງ ໄດ້ຈັດຂຶ້ນໃນຕອນທ້າຍຂອງກອງປະຊຸມເປີດກວ້າງຄົບຄະນະບໍລິຫານງານພັກແຂວງ ຄັ້ງທີ 15 ສະໄໝທີ VI ໃນວັນທີ 7 ພຶດສະພານີ້ ຢູ່ຫ້ອງປະຊຸມຫ້ອງວ່າການແຂວງ ໂດຍການເປັນປະທານຂອງທ່ານ ປອ. ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີຄະນະປະຈຳພັກແຂວງ, ກຳມະການພັກແຂວງ ແລະ ຫົວໜ້າພະແນກການເຂົ້າຮ່ວມ.

 

ໃນພິທີ ໄດ້ຮັບຟັງການຜ່ານມະຕິຕົກລົງຂອງຄະນະເລຂາທິການສູນກາງພັກ ເລກທີ 27/ຄລສພ ລົງວັນທີ 10 ມີນາ 2020 ວ່າດ້ວຍການອະນຸມັດໃຫ້ ສະຫາຍ ແດນປີ ມູນທະດີ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງບໍລິຄຳໄຊ ອອກພັກການ-ຮັບອຸດໜູນບຳນານ; ມະຕິຕົກລົງຂອງຄະນະເລຂາທິການສູນກາງພັກ ເລກທີ 43/ຄລສພ ລົງວັນທີ 13 ມີນາ 2020 ວ່າດ້ວຍການອະນຸມັດໃຫ້ ສະຫາຍ ພອນທິລາດ ສິດສາທອນ ກຳມະການພັກແຂວງ ອາດີດຫົວໜ້າພະແນກແຜນການ ແລະ ການລົງທຶນແຂວງ ອອກພັກການ-ຮັບອຸດໜູນບຳນານ.

ນອກນັ້ນ, ຍັງມີຂໍ້ຕົກລົງທ່ານເຈົ້າແຂວງບໍລິຄຳໄຊ ສະບັບເລກທີ 209/ຂບຊ ລົງວັນທີ 28 ເມສາ 2020 ວ່າດ້ວຍການແຕ່ງຕັ້ງ ທ່ານ ບຸນສົງ ເພັດຈະເລີນ ເປັນຮັກສາການຫົວໜ້າຄະນະຈັດຕັ້ງແຂວງບໍລິຄຳໄຊ; ຂໍ້ຕົກລົງຂອງເຈົ້າແຂວງບໍລິຄຳໄຊ ສະບັບເລກທີ 212/ຂບຊ ລົງວັນທີ 28 ເມສາ 2020 ວ່າດ້ວຍການແຕ່ງຕັ້ງ ທ່ານ ພັນລອນ ແກ້ວວິເສດ ເປັນຮັກສາການຫົວໜ້າຫ້ອງວ່າການແຂວງບໍລິຄຳໄຊ ແລະ ຂໍ້ຕົກລົງຂອງເຈົ້າແຂວງບໍລິຄຳໄຊ ສະບັບເລກທີ 211/ຂບຊ ລົງວັນທີ 28 ເມສາ 2020 ວ່າດ້ວຍການແຕ່ງຕັ້ງ ທ່ານ ສາຍຄຳ ວົງຄຳທອງ ເປັນຮອງຫົວໜ້າຫ້ອງວ່າການແຂວງ.

(ເນື້ອໃນ-ພາບ: ວິນລີ)