ທ່ານ ສຸດສັກສິດ ຖຶກແຕ່ງຕັ້ງເປັນຫົວໜ້າຫ້ອງວ່າການປົກຄອງເມືອງກະລືມຜູ້ໃໝ່.

498

ໂດຍປະຕິບັດຕາມຂໍ້ຕົກລົງຂອງທ່ານເຈົ້າເມືອງ ສະບັບເລກທີ 154/ຈມກລ, ວ່າດ້ວຍຍົກຍ້າຍຫົວໜ້າຫ້ອງວ່າການລະຫວ່າງຜູ້ເກົ່າ ແລະ ຜູ້ໃໝ່ ດັ່ງນັ້ນ, ໃນວັນທີ 5 ພຶດສະພາ ນີ້ ເມືອງກະລຶມ, ແຂວງເຊກອງ ໄດ້ຈັດພິທີ ມອບ-ຮັບ ໜ້າທີ່ວຽກງານ ລະຫວ່າງ ທ່ານ ຄຳແກ້ວ ຈະເລີນສຸກ ກຳມະການພັກເມືອງ, ຫົວໜ້າຫ້ອງວ່າການເມືອງກະລຶມ ( ຜູ້ເກົ່າ ) ກັບ ທ່ານ ສຸດສັກສິດ ຍິດແສນຫວັງ ກຳມະການພັກເມືອງ, ອະດີດເປັນຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງກະລຶມ, ມາຮັບໜ້າທີ່ໃໝ່ເປັນຫົວໜ້າຫ້ອງວ່າການເມືອງກະລຶມ (ຜູ້ໃໝ່), ໂດຍພາຍໃຕ້ການເປັນປະທານ ຂອງທ່ານ ອໍບົວລາ ອ່ອນມະໄລວົງ ເລຂາພັກເມືອງ, ເຈົ້າເມືອງ-ເມືອງກະລຶມ, ມີບັນດາຄະນະພັກ, ຄະນະນຳຂັ້ນເມືອງຕະຫຼອດຮອດພະນັກງານຫ້ອງການດັ່ງກ່າວເຂົ້າຮ່ວມທັງໝົດ: 41 ຄົນ, ຍິງ 7 ຄົນ, ເຊິ່ງພິທີດັ່ງກ່າວໄດ້ຈັດຂຶ້ນຢູ່ທີ່ສະໂມສອນຫ້ອງວ່າການເມືອງ.

ໃນພິທີ ຫົວໜ້າຫ້ອງວ່າການປົກຄອງເມືອງ ( ຜູ້ເກົ່າ) ກໍໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານຂອງຫ້ອງວ່າການເມືອງໃນໄລຍະຜ່ານມາ ເຊິ່ງຍົກໃຫ້ເຫັນຜົນງານ ດ້ານດີ, ຂໍ້ຄົງຄ້າງ ແລະ ບາງບົດຮຽນທີ່ຖອດຖອນໄດ້ ເພື່ອປັບປຸງແກ້ໄຂໃຫ້ດີຂຶ້ນໃນຕໍ່ໜ້າ ພ້ອມນີ້ກໍໄດ້ເຊັນມອບ-ຮັບ ໜ້າທີ່ວຽກງານ ລະຫວ່າງຜູ້ເກົ່າ ແລະ ຜູ້ໃໝ່ ຢ່າງເປັນທາງການ.

ໂອກາດນີ້ທ່ານ ອໍບົວລາ ອ່ອນມະໄລວົງ ເລຂາພັກເມືອງ, ເຈົ້າເມືອງ-ເມືອງກະລຶມ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະຫ້ອງວ່າການປົກຄອງເມືອງຊຸດເກົ່າ ທີ່ຍາດມາໄດ້ຜົນງານໃນຫຼາຍໆດ້ານ ຄຽງຄູ່ກັນນັ້ນກໍໄດ້ໃຫ້ທິດຊີ້ນຳຫຼາຍບັນຫາຕໍ່ຜູ້ທີ່ມາຮັບໜ້າໃໝ່ ເປັນຕົ້ນແມ່ນ ໃຫ້ມີຄວາມຮັບຜິດຊອບໜ້າວຽກງານຂອງຕົນທີ່ພັກ-ລັດມອບໝາຍໃຫ້ສຳເລັດຜົນ, ມີການແບ່ງງານ – ແບ່ງຄວາມຮັບຜິດຊອບໃນໝູ່ຄະນະຢ່າງຈະແຈ້ງ, ການຄຸ້ມຄອງບັນດາເອກະສານ, ນິຕິກຳຕ່າງໆໃຫ້ເປັນລະບຽບຮຽບຮ້ອຍ, ສືບຕໍ່ຈັດຕັ້ງປະຕິບັນດາໜ້າວຽກງານທີ່ຍັງຄົງຄ້າງໃຫ້ມີຜົນສຳເລັດຕາມລະດັບຄາດໝາຍ.

ພາບ-ຂ່າວ: ຄຳເພົ້າ ຮຸ່ງໄຊຍະວົງ