ເລື່ອນສະມາຊິກພັກສໍາຮອງ ຂຶ້ນເປັນສະມາຊິກພັກສົມບູນ 

525

ວັນທີ 7 ພຶດສະພາ 2020 ນີ້ ໜ່ວຍພັກສະຫະພັນແມ່ຍິງແຂວງ ຮ່ວມກັບໜ່ວຍພັກອົງການແນວລາວສ້າງຊາດແຂວງ ແລະ ໜ່ວຍໜ່ວຍພັກອົງການພັດທະນາ ແລະ ບໍລິຫານຕົວເມືອງ ໄດ້ຈັດພິທີເລື່ອນສະມາຊິກພັກສໍາຮອງຂຶ້ນເປັນສະມາຊິກພັກສົມບູນ ຂອງພັກປະຊາຊົນ ປະຕິວັດລາວຈໍານວນ 4 ສະຫາຍ ແລະ ພິທີມອບບັດສະມາຊິກພັກສົມບູນ ຈໍານວນ 2 ສຫາຍ ໂດຍການເປັນປະທານຂອງສະຫາຍເລຂາໜ່ວຍພັກຈາກ 3 ພາກສ່ວນ.

ໃຫ້ກຽດເຂົ້າຮ່ວມຂອງສະຫາຍ ດາລີວັນ ພູສະຫວັນ ກໍາມະການປະຈໍາພັກແຂວງ, ປະທານອົງການແນວລາວສ້າງຊາດແຂວງ, ຜູ້ຊີ້ນໍາອົງການຈັດຕັ້ງມະຫານຊົນແຂວງ ແລະ ຕາງໜ້າໃຫ້ຄະນະພັກຂັ້ນເທິງເຂົ້າຮ່ວມເປັນຄະນະປະທານ, ມີບັນດາສະຫາຍແຂກທີ່ມີກຽດຕາງໜ້າຄະນະຈັດຕັ້ງແຂວງ, ຄະນະກວດກາພັກແຂວງ, ສະຫະພັນກໍາມະບານແຂວງ, ພະແນກໄປສະນີໂທລະຄົມມະນາຄົມ ແລະ ການສື່ສານແຂວງ, ບັນດາສະຫາຍສະມາຊິກພັກສົມບູນ, ສໍາຮອງຂອງອົງການແນວລາວສ້າງຊາດແຂວງ, ສະຫະພັນແມ່ຍິງແຂວງ ແລະ ອົງການ ອພບຕ ເຂົ້າຮ່ວມ.

ເພື່ອເປັນການປະຕິບັດກົດລະບຽບຂອງພັກປະຊາຊົນປະຕິວັດລາວ ສະໄໝທີ X ໃຫ້ມີປະສິດທິພາບ ແລະ ປະສິດທິຜົນ, ມະຕິຂອງກົມການເມືອງສູນກາງພັກ ແລະ ບົດແນະນໍາຂອງຄະນະຈັດຕັ້ງສູນກາງພັກໃນການຈັດພິທີມອບບັດສະມາຊິກພັກໃຫ້ແກ່ສະມາຊິກພັກສົມບູນທີ່ໄດ້ມາດຖານ. ສະນັ້ນຄະນະພັກ 3 ອົງການດັ່ງກ່າວຈຶ່ງໄດ້ຈັດພິທີດັ່ງກ່າວເພື່ອສ້າງການສຸມໃສ່ການສ້າງຂະບວນການຮອບດ້ານ ເພື່ອຕ້ອນຮັບການດໍາເນີນກອງປະຊຸມໃຫຍ່ 3 ຂັ້ນຂອງພັກກໍ່ຄືກອງປະຊຸມໃຫຍ່ 3 ຂັ້ນຂອງອົງການຈັດຕັ້ງມະຫາຊົນ, ສຸມໃສ່ການຈັດຕັ້ງມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ກອງປະຊຸມໃຫຍ່ຂອງ 3 ອົງການດັ່ງກ່າວ ໃຫ້ມີເນື້ອໃນ, ມີຄວາມໝາຍສໍາຄັນ ແລະ ເປັນຂະບວນຟົດຟື້ນ ຕິດພັນກັບການສະຫູູບຕີລາຄາການຈັດຕັ້ງປະຕິບັດຂໍ້ແຂ່ງຂັນຮັກຊາດ ແລະ ພັດທະນາ ໃຫ້ປະກົດຜົນເປັນຈິງທາງດ້ານປະລິມານ ແລະ ຄຸນນະພາບເທື່ອລະກ້າວ.

ໃນຕອນທ້າຍພິທີດັ່ງກ່າວຍັງໄດ້ຮັບຟັງການໂອ້ລົມຈາກສະຫາຍ ດາລີວັນ ພູສະຫວັນ ກໍາມະການປະຈໍາພັກແຂວງ, ປະທານອົງການແນວລາວສ້າງຊາດແຂວງ, ຜູ້ຊີ້ນໍາອົງການຈັດຕັ້ງມະຫານຊົນແຂວງ ແລະ ຕາງໜ້າໃຫ້ຄະນະພັກຂັ້ນເທິງ ເພື່ອເປັນທິດໃຫ້ແກ່ສະມາຊິກພັກສົມບູນ ແລະ ສະມາຊິກພັກສົມບູນທີ່ໄດ້ຮັບບັດສະມາຊິກພັກ ໃນຄັ້ງນີ້ນໍາໄປຈັດຕັ້ງປະຕິບັດ ແລະ ກໍ່ສ້າງຕົນເອງໃຫ້ກາຍເປັນສະມາຊິກພັກທີ່ດີເດັ່ນຂອງພັກ.

ພາບ-ຂ່າວ: ດອນ ຜົນປະດິດ.